کیٹ اور ولیم ممبئی کے شاندار تاج محل پیلس ہوٹل میں ٹھہرے ہوئے ہیں لیکن کسی لگژری حصے کی بجائے اُن کا قیام اس ہوٹل کے عام سے کمروں میں ہے۔ دوسری جانب اُن کی ایشوریا رائے بچن اور شاہ رخ خان جیسے نامور فلمی ستاروں کے ساتھ ملاقاتیں بہرحال ہو رہی ہیں۔ ایک بڑی پارٹی میں شاہی جوڑے نے غریب بچوں کے لیے عطیات جمع کیے۔

شاہی جوڑے کے ارکان نئی دہلی میں مہاتما گاندھی کی یادگار کے اندر جانے سے پہلے اپنے جوتے باہر ہی اتار رہے ہیں۔ بتایا گیا ہے کہ سب دیکھنے والے اس جوڑے کی سادگی اور بھارت اور اُس کے عوام کے لیے یہ عقیدت اور احترام دیکھ کر بہت متاثر ہوئے۔

ممبئی میں کیٹ اور ولیم بان گنگا میں پھول بہا رہے ہیں۔ ویسے تو یہ ایک عام سی مذہبی رسم ہے لیکن اس مخصوص جگہ پر اس طرح سے پھول بہانے کا مطلب ہے، محبت کے اُس جذبے کو خراجِ تحسین پیش کرنا، جو ہر چیز پر غالب اور حاوی ہے۔

سرکاری مصروفیات کے بعد کیٹ نے اپنا سرکاری لباس چھوڑ کر بھارت ہی کی ایک فیشن ڈیزائنر کا تیار کیا ہوا یہ آرام دہ روایتی لباس زیب تن کیا اور گلیوں میں کھیلنے والے بچوں کے ساتھ کرکٹ کھیلی۔ کرکٹ بھارت میں بھی اُتنی ہی مقبول ہے، جتنی کہ انگلینڈ میں۔

اور ظاہر ہے، بچوں کا یہ اصرار بھی تھا کہ تاجِ برطانیہ کا جانشین شہزادہ ولیم اُن کے ساتھ فٹ بال کھیلے۔ شہزادہ ولیم اور اُن کی اہلیہ کیٹ بھارت کے غریب اور پسماندہ بچوں کی بہبود کے لیے اپنی سرگرمیاں جاری رکھے ہوئے ہیں۔

ممبئی میں تفریح کے ساتھ ساتھ شاہی جوڑے نے اقتصادی ترقی کو بھی اپنے دورے کا حصہ بنایا۔ نوجوان آجرین کے ساتھ ایک ملاقات کے موقع پر پرنس ولیم موٹر ریسنگ میں استعمال ہونے والی ایک ایسی گاڑی میں بیٹھے ہوئے ہیں، جسے سامنے لگی اسکرین کے ساتھ ڈرائیونگ سیکھنے یا محض تفریح کے لیے بھی استعمال کیا جا سکتا ہے۔

اس شاہی جوڑے کے سرکاری پروگرام میں اُن ہندوستانی فوجیوں کو خراجِ عقیدت پیش کرنا بھی شامل تھا، جنہوں نے پہلی عالمی جنگ کے دوران سلطنتِ برطانیہ کے لیے لڑائی میں حصہ لیا۔ ساتھ ہی ساتھ اس جوڑے نے 2008ء میں ممبئی میں ہونے والے دہشت پسندانہ حملوں میں مرنے والوں کو بھی یاد کیا۔

کیٹ اور ولیم اپنے دورہٴ بھارت کے دوران ہی بھوٹان کے ایک مختصر سفر پر بھی چلے گئے لیکن پھر ہفتے کے روز بھارتی شہر آگرہ پہنچ گئے، جہاں انہوں نے تاج محل دیکھا۔ محبت کی یہ یادگار پرنس ولیم کے لیے بہت علامتی اہمیت بھی رکھتی ہے کیونکہ برسوں پہلے اس یادگار کے سامنے اُن کی والدہ شہزادی ڈیانا نے اپنے شوہر پرنس چارلس کے بغیر اکیلے ہی اپنی تصویر بنوائی تھی۔

ملکہ الزبتھ ثانی اپنے والد کی وفات کے بعد چھ فروری 1962ء کو برطانیہ کی ملکہ بنی تھیں۔ تب سے ہی وہ نہ صرف برطانیہ کی ملکہ ہیں بلکہ دولت مشترکہ ممالک اور چرچ آف انگلینڈ کی بھی سربراہ ہیں۔ وہ نو سمتبر 2015ء سے برطانیہ میں طویل ترین راج کرنے والی شخصیت بن گئی ہیں۔

نو ستمبر 2015ء تک برطانیہ پر طویل ترین راج کرنے کا اعزاز ملکہ وکٹوریہ کو حاصل تھا۔ وہ 1819ء میں پیدا ہوئی تھیں جبکہ 1837ء میں ان کی تاج پوشی کی گئی تھی۔ وہ 1901ء میں اپنے انتقال تک برطانیہ پر راج کرتی رہیں۔ ان کا دور تریسٹھ برس اور سات مہینوں پر محیط رہا۔ وکٹوریہ کے دور میں ہی برطانیہ نے اقتصادی ترقی کی منزلیں طے کیں اور برطانیہ کا راج تقریباً دنیا بھر تک پھیل گیا۔

ملکہ الزبتھ ثانی کو 20 دسمبر2007ء سے ہی برطانیہ کی عمر رسیدہ ترین ملکہ ہونے کا اعزاز ہے۔ قبل ازیں یہ اعزاز بھی وکٹوریہ کو ہی حاصل تھا۔ جب ملکہ وکٹوریہ کا انتقال ہوا تھا تو وہ 81 برس، سات مہینے اور29 دن کی تھیں۔ ملکہ الزبتھ اس سال اکیس اپریل کو 89 برس کی ہو گئیں۔ تئیس جنوری 2015ء کو سعودی بادشاہ عبداللہ کی وفات کے بعد ملکہ الزبتھ نے دنیا بھر میں عمر رسیدہ ترین حکمران ہونے کا اعزاز حاصل کیا تھا۔

ملکہ وکٹوریہ کو ایک ایسا اعزاز حاصل رہا، جو ملکہ الزبتھ ثانی بھی نہ چھین سکیں۔ ملکہ وکٹوریہ یکم جنوری 1877ء کو برطانیہ کی ایسی پہلی ملکہ بنیں، جنہیں ’ایمپرس آف انڈیا‘ کا ٹائیٹل دیا گیا۔ اس وقت بھارت، پاکستان، بنگلہ دیش اور میانمار انڈیا کا ہی حصہ تھے۔ 1947ء میں برصغیر کی تقسیم ہو گئی تھی۔

ملکہ الزبتھ ثانی اپنے دور اقتدار میں سات مرتبہ جرمنی کا دورہ کر چکی ہیں۔ انہوں نے پہلی مرتبہ 1965ء میں جرمنی کا دورہ کیا۔ اس تصویر میں وہ بون شہر میں جرمن صدر ہائنرش لُبکے کے ہمراہ دیکھی جا سکتی ہیں۔ اس پہلے دورے میں ملکہ نے گیارہ روز تک جرمنی میں قیام کیا۔ اس دوران وہ سابق دارالحکومت بون کے علاوہ اس وقت کے منقسم برلن اور دیگر سولہ شہروں میں بھی گھومی پھریں۔

ملکہ الزبتھ نے حال ہی میں جون 2015ء میں جرمنی کا دورہ کیا تھا۔ اس تصویر میں وہ اپنے شوہر فیلپ، جرمن صدر یوآخم گاؤک اور ان کی اہلیہ کی ہمراہ دیکھی جا سکتی ہیں۔ یہ تصویر برلن میں صدر کی رہاش گاہ کے سامنے ہی لی گئی تھی۔

کوئین وکٹوریہ اوّل نے 1840ء میں پرنس البرٹ سے شادی کی۔ ان کے نو بچے ہوئے۔ البرٹ 1861ء میں صرف بیالیس برس کی عمر میں انتقال کر گئے تھے۔ البرٹ کی موت نے ملکہ الزبتھ اوّل کو شدید غم میں مبتلا کر دیا تھا، جس کی وجہ سے وہ برسوں عوامی زندگی سے دور رہیں۔

ملکہ الزبتھ ثانی برطانوی پارلیمان سے اب تک 62 مرتبہ سالانہ خطاب کر چکی ہیں۔ برطانوی شاہی خاندان کی سربراہی سنبھالنے کے بعد موجودہ ملکہ نے اب تک 97 غیر ملکی دورے کیے ہیں، جن میں سے پہلا 1955ء میں سربراہ مملکت کے طور پر ان کا ناروے کا دورہ تھا اور آخری ابھی اسی سال جون میں جرمنی کا کئی روزہ سرکاری دورہ۔

دوسری عالمی جنگ کے دوران الزبتھ نے برطانوی فوج کے لیے ذمہ داریاں نبھائی تھیں۔ انہوں نے مکینیکس میں تعلیم حاصل کی تھی جبکہ وہ ٹرک چلانا بھی جانتی تھیں۔ یہ تصویر 1945ء میں لی گئی تھی۔

ملکہ الزبتھ نے 1972ء میں تھائی بادشاہ بھومی بول کی کے ہمراہ۔ اس وقت دنیا کے کسی بھی ملک میں طویل ترین عرصے تک حکمرانی کرنے والی شاہی شخصیت تھائی لینڈ کے بادشاہ بھومی بول کی ہے، جنہیں تخت پر براجمان ہوئے قریب 69 برس ہو چکے ہیں۔ وہ برطانیہ میں ملکہ الزبتھ کے تخت پر براجمان ہونے سے بھی چھ برس پہلے تھائی لینڈ میں بادشاہ کے منصب پر فائز ہوئے تھے۔