برطانوی حکام کے جانب سے اتوار کو فراہم کی گئی معلومات کے مطابق ملک کے شمالی علاقوں میں شدید برفباری کے باعث وہاں کئی گاڑیاں سڑکوں پر پھنسی رہیں اور مسافروں کو یا تو کہیں عارضی طور پر پناہ لینی پڑی یا تمام رات اپنی گاڑیوں میں گزارنی پڑی۔

خراب موسم کی وجہ سے 2,500 سے زائد صارفین کو بجلی کی فراہمی بھی معطل رہی۔

برطانیہ سے موصول ہونے والی رپورٹس کے مطابق برف میں بالخصوص ٹرکوں کے پھنسنے کی وجہ سے وہاں کئی شاہراہیں بلاک رہیں۔ ٹرک ڈرائیوراں کا کہنا ہے کہ مختصر فاصلے طے کرنے میں بھی ان کو کئی گھنٹے لگے اور ان میں سے کئی کو ٹرک بیچ راستے روک کر کہیں عارضی طور پر پناہ لینی پڑی۔ 

لیک ڈسٹرکٹ کے علاقے ایمبل سائیڈ میں موجود ہیرسن واڑد نے اس صورتحال کی منظر کشی کرتے ہوئے بتایا، "یہاں اس لمحے ایسا لگ رہا ہے جیسے آپ کسی سکی ریزورٹ یا الپس سے گزر رہے ہوں۔" انہوں نے مزید کہا کہ اگر کوئی گاڑی بیچ راستے رکتی یا کسی حادثے کا شکار ہوتے ہے یا اس میں موجود مسافر اسے بند کر کہ کہیں چلے جاتے ہی، تو بس "سب رک جاتا ہے۔‘‘

اسی طرح ایک مسافر اینٹ بریٹ نے اتوار کو برطانوی خبر رساں ادارے بی بی سی کو بتایا کہ وہ ہفتے کی دوپہر سے، 19 گھنٹوں سے اپنی گاڑی میں برفباری کے باعث پھنسے ہوئے تھے۔

بریٹ ایسیکس سے کمبریا کی طرف جا رہے تھے، اور ان کے مطابق یہ سفر پانچ گھنٹوں سے زیادہ طویل نہیں ہونا چاہیے تھا۔ 

"میں اپنے خاندان کی ایک شادی میں شرکت کرنے جا رہا تھا۔ اب یہ کہنا صحیح ہوگا کہ میں وہاں نہیں پہنچ پایا۔"

بریٹ نے بی بی سی کو بتایا کہ ان پاس پینے کے لیے بہت تھوڑا پانی بچا تھا اور  وہ اس کو اب بہت خیال سے استعمال کر رہے تھے۔

حکام کے کارگردگی پر تنقید کرتے ہوئے انہوں نے کہا، "مجھے معلوم ہے کے ایمرجنسی سروسز (کے اہلکار) اس وقت بہت مصروف ہوں گے، لیکن ہمیں یہاں بالکل بے آسرا چھوڑ دیا گیا ہے۔"

دوسری جانب برطانوی علاقے کمبریا کی فائر اینڈ ریسکیو سروس کا کہنا ہے کہ برف میں پھنسے ٹرکوں اور افراد کو نکالنے کے لیے اس کو اہلکاروں نے رات بھر کام کیا۔

اس حوالے سے کمبریا پولیس کے سپرنٹنڈنٹ اینڈی ولکنسن کا کہنا تھا کہ محکمہ موسمیات نے جتنے شدید طوفان کی پیش گوئی کی تھی، یہ برفانی طوفان اس سے زیادہ شدید تھا۔ انہوں نے مزید کہا کہ حکام نے اتوار کو لوگوں کو کمبریا کا سفر نہ کرنے کی تاکید بھی کی تھی۔

ولکنسن کا مزید کہنا تھا کہ شاہراہوں پر تعینات اہلکاروں کے ساتھ لوگوں نے بدکلامی بھی کی ہے۔

انہوں نے کہا، "ہم اس وقت لوگوں کا غم و غصہ سمجھ سکتے ہیں لیکن (متعلقہ) ایجنسیاں کمبریا میں صورتحال کو بہتر بنانے کے لیے سخت محنت کر رہی ہیں اور اس دوران ہمیں سڑکوں پر بھی ایک چیلنجنگ صورتحال کا سامنا ہے۔"

کمبریا میں اتوار کو برف میں پھنس جانے والے افراد کو اسکولوں، گرجا گھروں اور ایک اسکاؤٹ ہٹ میں پناہ فراہم کی گئی تھی۔

اس کے علاوہ کمبریا میں بجلی فراہم کرنے والی کمپنی نارتھ ویسٹ الیکٹرسٹی کے مطابق وہاں 2,500 صارفین سے زیادہ افراد کو بجلی کی فراہمی معطل رہی۔ اس کے بیان کے مطابق بجلی کی فراہمی اتوار رات تک بحال ہونے کی توقع تھی۔

برطانوی محکمہ موسمیات کی جانب سے اتوار کی شام سے آج دوپہر تک کے لیے وہاں مڈلینڈز، ملک کے شمالی علاقوں، ویلز کے وسطی علاقوں اور اسکاٹ لیند کے مشرقی علاقوں میں برفباری کی وارننگ جاری کی گئی ہے۔ 

م ا/ ر ب (اے پی)