برطانیہ میں الیکشن، کیا بحرانی صورتحال ختم ہو سکے گی؟
12 دسمبر 2019
برطانیہ میں پارلیمانی انتخابات کے سسلے میں ووٹنگ کا عمل جاری ہے۔ کئی دہائیوں بعد اس انتخابی عمل کو اہم ترین قرار دیا جا رہا ہے۔ کئی اہم موضوعات کے علاوہ اس مرتبہ بریگزٹ کا معاملہ بھی ووٹروں کی دلچسپی کا باعث بنا ہوا ہے۔
اشتہار
برطانیہ میں بارہ اکتوبر بروز جمعرات کو ہونے والے الیکشن کو انتہائی اہم قرار دیا جا رہا ہے۔ ووٹنگ سے قبل جاری کیے گئے آخری عوامی جائزوں کے مطابق قدامت پسندوں کا اتحاد معمولی برتری حاصل کیے ہوئے ہے۔ بتایا گیا ہے کہ وزیر اعظم بورس جانسن کی سربراہی میں اس اتحاد کو اٹھائیس نشستوں کی برتری حاصل ہو سکتی ہے۔
دوسری طرف حالیہ ہفتوں کے دوران اہم اپوزیشن لیبر پارٹی کی عوامی حمایت میں بھی اضافہ دیکھا گیا ہے۔ قدامت پسند سیاسی اتحاد یا لیبر پارٹی اگر دونوں ہی واضح اکثریت حاصل کرنے میں کامیاب نہ ہو سکے تو دیگر چھوٹی پارٹیوں کا کردار انتہائی اہم ہو جائے گا۔ اس صورت میں وزیر اعظم جانسن کے قدامت پسند اتحاد یا جیرمی کوربن کی لیبر پارٹی کو حکومت سازی کے لیے چھوٹی سیاسی جماعتوں کے اتحاد کی ضرورت پڑ جائے گی۔
برطانیہ میں عام انتخابات، اہم امور کیا ہیں؟
02:20
برطانیہ میں سن دو ہزار پندرہ کے بعد یہ چوتھے الیکشن ہیں۔ برطانیہ کے یورپی یونین سے الگ ہونے کے معاملے پر برطانوی پارلیمان میں متفقہ حکمت عملی پر اتفاق نہ ہو سکنے پر ایک بحرانی صورتحال پیدا ہو چکی ہے۔ اگرچہ اس الیکشن میں ہیلتھ کیئر اور ماحولیات جیسے بڑے اور اہم موضوعات بھی عوامی دلچسپی کا باعث ہیں لیکن بریگزٹ کا معاملہ ان پر حاوی ہی رہے گا۔
ووٹنگ کا عمل مقامی وقت کے مطابق رات دس بجے تک جاری رہے گا۔ ابتدائی ایگزٹ پولز ووٹنگ ختم ہونے کے فوری بعد ہی سامنے آ جائیں گے۔ برطانیہ میں موسم سرما کی وجہ سے کئی علاقوں میں شدید ٹھنڈ ہے جبکہ بارش اور برفباری کی پیش گوئی بھی کی گئی ہے، اس صورتحال میں ووٹ ڈالنے کی شرح پر فرق پڑنے کا خدشہ بھی ظاہر کیا جا رہا ہے۔
الیکشن سے ایک روز قبل بورس جانسن نے اپنے حامیوں کے لیے ایک ویڈیو پیغام جاری کیا، جس میں انہوں نے عوام سے اپیل کی کہ وہ قدامت پسندوں کو ووٹ دیں تاکہ ان کی حکومت بریگزٹ کو عملی شکل دیتے ہوئے قوم کو آگے بڑھانے میں کامیاب ہو سکے۔ دوسری طرف اپوزیشن رہنما جیریمی کوربن نے وزیر اعظم جانسن کو تنقید کا نشانہ بناتے ہوئے کہا ہے کہ عوام حقیقی تبدیلی کی خاطر اپنا حق رائے دہی استعمال کریں۔
ع ب / ع ا / خبر رساں ادارے
برطانوی الیکشن: چھ اہم معاملات
حالیہ برطانوی انتخابات کو کئی دہائیوں کے دوران انتہائی اہم انتخابات قرار دیا جا رہا ہے۔ بورس جانسن اپنی اکثریت بڑھانے جبکہ مخالفین بریگزٹ کا راستہ بدلنے کے خواہاں ہیں۔ آئیے دیکھتے ہیں کہ اہم ترین معاملات ہیں کیا؟
تصویر: picture-alliance/Newscom
بریگزٹ کا مطلب ہے بریگزٹ
کنزرویٹو پارٹی ہر صورت بریگزٹ کو پایہ تکمیل تک پہنچانا چاہتی ہے۔ وزارت عظمیٰ کے امیدوار بورس جانسن کا وعدہ ہے کہ کامیابی کی صورت میں برطانیہ اکتیس جنوری کو یورپی یونین سے نکل جائے گا۔ لیبر پارٹی کو موقف ہے کہ یورپی یونین کے ساتھ بریگزٹ معاہدے پر نظر ثانی کی ضرورت ہے اور اس پر ایک اور عوامی ریفرنڈم ہونا چاہیے۔ جبکہ لبرل ڈیموکریٹ پارٹی سرے سے بریگزٹ کے ہی خلاف ہے۔
تصویر: picture-alliance/AP Photo/H. McKay
صحت کی سہولیات برائے فروخت؟
انتخابی مہم کے دوران برطانیہ میں صحت کے سرکاری نظام میں خرابیوں پر خاصی بحث ہوئی۔ لیبر پارٹی کا کہنا ہے کہ اگر وہ اقتدار میں آ کر نیشنل ہیلتھ سروس کے بجٹ میں چار اشاریہ تین فیصد اضافہ کرے گی۔ اپوزیشن کا بورس جانسن پر الزام ہے کہ وہ امریکا کے ساتھ کسی تجارتی معاہدے کے صورت میں نیشنل ہیلتھ سروس کی نجکاری کا اردہ رکھتے ہیں۔ جانسن نے اس الزام سے انکار کیا ہے۔
تصویر: picture-alliance/empics/S. Rousseau
اقتصادی معاملات
بجٹ اور مالیاتی پالیسی پر تین بڑی جماعتوں کی الگ الگ سوچ ہے۔ لبرل ڈیموکریٹ کے سربراہ جو سوئنسن کا موقف ہے کہ ٹیکسوں میں کچھ اضافہ کرنا ہوگا اور حکومتی اخراجات میں بھی۔ کنزرویٹو پارٹی نے ٹیکسوں میں کٹوتی لیکن ساتھ ہی لوگوں کی بہبود پر مزید رقم خرچ کرنے کا وعدہ کیا ہے۔ جبکہ لیبر پارٹی نے معیشت میں وسیع تر اصلاحات کی بات کی ہے تاکہ اس سے سب لوگ اجتماعی طور پر مستفید ہو سکیں۔
تصویر: picture-alliance/empics/A. Chown
توجہ کا مرکز تبدیل
جرائم کی روک تھام اور جیل اصلاحات کا معاملہ اس انتخابی مہم کے شروع میں اتنا زیر بحث نہیں تھا۔ لیکن لندن برج پر چاقو سے حملے کے بعد اس پرسوالات اٹھے اور پارٹیوں نے کھل کر اپنی اپنی پوزیشن واضح کی۔ جانسن نے لیبر پارٹی کی حکومت کے دور میں منظور کیے گئے ان قوانین پر تنقید کی جن کے تحت تخریب کاری میں پکڑے جانے کے باوجود ایک حملہ آور جیل سے جلد رہا ہوگیا تھا۔ انہوں نے قوانین کو سخت بنانے کی بات کی ہے۔
تصویر: picture-alliance/NurPhoto/D. Zarzycka
فوری معاملات کتنے اہم؟
گرین پارٹی کی رہنما کیرولائن لوکس گزشتہ پارلیمان میں اپنی جماعت کی واحد نمائندہ تھیں۔ ان کی پارٹی ماحول کے تحفظ پربڑے اور واضح اقدامات چاہتی ہے تاکہ فضا میں کاربن کا اخراج جلد کنٹرول کیا جائے۔ اس شعبے میں کنزرویٹو پارٹی کے اہداف سب سے زیادہ نرم اور لچک دار ہیں اور ان کے لیے ماحولیاتی تحفظ بظاہر اتنی بڑی ترجیح نہیں جتنی گرین پارٹی یا لیبر پارٹی کے لیے ہے۔
تصویر: picture-alliance/NurPhoto/W. Szymanowicz
شمال اور جنوب میں تقسیم
برطانیہ میں انتخابی عمل پر شمال اور جنوب کے درمیان سیاسی خلیج ایک حقیقت ہے، جو اس بار بھی حاوی ہے۔ 2014ء میں اسکاٹ لینڈ نے ریفرنڈم کے ذریعے برطانیہ سے آزاد ی کی کوشش کی، جو کامیاب نہیں ہو سکی۔ اسکاٹش ووٹر بورس جانسن کی بریگزٹ مہم کے خلاف ہیں۔ ان کی اکثریت یورپی یونین کا حصہ رہنے کے حق میں ہے۔ اسکاٹ لینڈ کی سیاسی قیادت کو خدشہ ہے کہ انہیں ان کی اپنی مرضی کے بغیر یورپی یونین سے نکالا جا رہا ہے۔