ڈیوڈ کیمرون نے دارالعوام میں اکثریت حاصل کرتے ہوئے مزید پانچ سالوں کے لیے ڈاؤننگ اسٹریٹ میں اپنی موجودگی کو یقینی بنا لیا ہے۔ کیمرون کی حیرت انگیز فتح اور فیصلہ کُن جیت برطانیہ کے سیاسی نقشے کی تشکیل نو اور یورپ میں اس ملک کے مستقبل کی از سرنو وضاحت کا سبب بنی ہے۔ اس بار کے الیکشن میں ووٹنگ کے بعد جمعرات اور جمعے کی درمیانی شب نہایت ڈرامائی تھی۔ برطانیہ کے مختلف حصوں سے موصول ہونے والے انتخابی نتائج نے ایک سنسنی پھیلا رکھی تھی۔ ایک طرف اسکاٹ لینڈ میں قوم پرستوں یا نیشنلسٹ پارٹی نے تاریخی کامیابی حاصل کی تو دوسری جانب لیبر پارٹی، لبرل ڈیموکریٹس اور یورپی یونین کے مخالف UKIP کو ووٹوں کے بھاری نقصان کے بعد بُری طرح کی شکست کا سامنا کرنا پڑا۔ اور ان تینوں جماعتوں کے سربراہوں نے اپنے عہدے سے استعفیٰ دے دیا۔

جمعہ کی شب جنوبی انگلینڈ کے علاقے Witney کی اپنی نشست پر دوبارہ فتح حاصل کرنے کے بعد کیمرون کا کہنا تھا، ’’یہ قدامت پسندوں یا کنزرویٹیو پارٹی کے لیے ایک مضبوط رات ہے۔‘‘ بعد ازاں کیمرون اور اُن کی اہلیہ سمانتھا نے ملکہ الیزبتھ دوم سے بکھنگم پیلس میں ملاقات کی جہاں ملکہ کی طرف سے کیمرون کے دوبارہ وزیر اعظم بننے کی تصدیق اور نئی حکومت کی تشکیل کا سرکاری حکم نامہ جاری ہونا تھا۔

اپنے انتخابی حلقے Witney میں کیمرون نے اپنے وعدے کو پورا کرنے کا عہد کرتے ہوئے کہا کہ وہ 2017ء تک برطانیہ کے یورپی یونین کا رکن بننے کے معاملے پر ریفرنڈم کرائیں گے۔ اس امر سے یہ امکانات سامنے آسکتے ہیں کہ برطانیہ یورپی بلاک کو چھوڑ دے گا۔

تجزیہ کاروں کے مطابق برطانیہ کے ان انتخابات کے نتائج کنزرویٹیو حکومت کے بچتی پروگرام کی توثیق کی حیثیت رکھتے ہیں اور اس بات کے قوی امکانات ہیں کہ لندن حکومت عوامی اخراجات میں کٹوتی کا تسلسل برقرار رکھتے ہوئے اپنے ماضی کے پروگرام کو جاری رکھے گی جس کا مقصد برطانیہ کو قریب 120 بلین یورو کے خسارے سے باہر نکالنا ہے۔

اُدھر لیبر پارٹی کے لیڈر ایڈ ملی بینڈ نے اپنی شکست تسلیم کر لی ہے۔ اُن کا کہنا تھا کہ اُن کی سینٹر لفٹ پارٹی کے لیے گزشتہ شب نہایت کٹھن اور مایوس کُن ثابت ہوئی۔ ملی بینڈ کی پارٹی نے قریب دو درجن نشستیں کھو دی ہیں جن میں سے ایک مالیاتی امور کے ترجمان ایڈ بالز کی سیٹ بھی شامل ہے۔

اُدھر لندن میں ایک پریس کانفرنس سے خطاب کرتے ہوئے اُداس نظر آنے والے ملی بینڈ نے کہا کہ انہوں نے کیمرون کو مبارکباد پیش کی ہے اور اب وہ پارٹی کی سربراہی سے سبکدوش ہو کر کسی اور کو پارٹی کی تشکیل نو کا موقع فراہم کرنا چاہتے ہیں۔

واضح رہے کہ لیبر پارٹی کو اسکاٹ لینڈ میں بُری طرح کی شکست کا سامنا ہوا ہے۔ جہاں پانچ برس قبل ہونے والے الیکشن میں لیبر پارٹی کو 41 نشستیں ملی تھیں وہاں اس بار یہ جماعت محض ایک سیٹ حاصل کر پائی۔ ان کی اس شکست کی وجہ اسکاٹ لینڈ کی نیشنلسٹ پارٹی بنی ہے جس نے 59 میں سے 56 نشستیں اپنے نام کر لیں۔