ہفتے کی رات جرمن دارالحکومت برلن میں امسالہ برلینالے کی تقریب انعامات منعقد کی گئی۔ اس مرتبہ اس معتبر فلم میلے میں ایشیائی فلم صنعت کو نمایاں کامیابیاں حاصل ہوئی ہیں۔ بہترین فلم کا گولڈن بیئر ایوارڈ تو چین کی فلم ’بلیک کول، تِھن آئس‘ کو ملا ہی لیکن ساتھ ہی بہترین اداکار کا سلور بیئر ایوارڈ بھی اسی فلم میں نمایاں کردار ادا کرنے والے لی آؤ فان کے حصے میں آیا۔

گولڈن بیئر ایوارڈ وصول کرنے کے بعد چینی ہداہیتکار ڈی آؤ ینان نے پر نم آنکھوں سے اپنی خوشی کا اظہار کرتے ہوئے، ’’ اس بات کا یقین کرنا انتہائی مشکل ہے کہ مجھے میرے خواب کی تعبیر مل گئی ہے۔‘‘ 1997ء کے بعد پہلی مرتبہ کسی چینی فلم نے یورپ کے اس معتبر فلم میلے میں بہترین فلم کا ایوارڈ جیتا ہے۔ قبل ازیں چینی لوَ اسٹوری Tuya's Marriage نے یہ اعزاز حاصل کیا تھا۔ اس مرتبہ بہترین اسکرین پلے کا انعام جرمن بہن بھائی ڈیٹرش اور آنا بروگمان کو ان کی فلم ’اسٹیشنز آف دی کراس‘ پر دیا گیا۔

اس مرتبہ یورپ کے اس معتبر فلم میلے کی آٹھ رکنی جیوری نے جاپانی فلم ’دی لٹل ہاؤس‘ میں مرکزی کردار ادا کرنے والی ہارو کُوروکی کو بہترین اداکارہ کے انعام سے نوازا ہے۔ انہوں نے یہ ایوارڈ وصول کرتے ہوئے کہا کہ وہ اس انعام جیتنے کا سہانا احساس اور خوشی اپنے ملک جاپان واپس لے کر جائیں گی۔‘‘ اس فیسٹیول کا رنر اَپ سلور بیئر گرانڈ جیوری پرائز امریکی ہدایتکار ویس ایںڈرسن کو ان کی فلم ’دی گرینڈ بوڈا پیسٹ ہوٹل‘ پر ملا۔ اسی فلم کی نمائش سے سن 2014 کے اس فلم فیسٹیول کا آغاز ہوا تھا۔

جرمن فلم فیسٹیول یا برلینالے کی جیوری نے بہترین ہدایتکار کے لیے ٹیکساس کے فلم میکر رچرڈ لنک لیٹر کو منتخب کیا۔ انہیں یہ انعام ان کی فلم ’بوائے ہڈ‘ پر دیا گیا۔ جب چھ فروری کو اس فلم میلے کا آغاز ہوا تھا، تو مبصرین کا کہنا تھا کہ لنک لیٹر کی یہ فلم گولڈن بیئر حاصل کرنے کے لیے فیورٹ ہو گی۔ انعام وصول کرنے کے بعد رچرڈ لنک لیٹر نے جیوری کا شکریہ ادا کرتے ہوئے کہا کہ کہنے کو تو یہ بہترین ہدایتکار کا انعام ہے لیکن اس فلم کی تیاری میں بہت سے لوگوں نے کام کیا ہے، ’’میں یہ انعام ان چار سے زائد لوگوں کی ایماء پر وصول کر رہا ہوں، جنہوں نے اس فلم کی تیاری میں اہم کردار ادا کیا ہے۔

یورپ میں سال کے اس پہلے اہم فلم میلے کا باقاعدہ اختتام آج بروز اتوار کو ہو گا۔ برلینالے کے ڈائریکٹر کوسلک نے بتایا ہے کہ اس مرتبہ ریکارڈ تین لاکھ تیس ہزار ٹکٹیں فروخت ہوئی ہیں۔ ان کا کہنا تھا کہ 2014ء کے اس ایڈیشن میں مجموعی طور پر چار سو آٹھ فلمیں نمائش کے لیے پیش کی گئی ہیں اور انہیں عوام کی ایک بڑی تعداد نے دل کھول کر داد دی ہے۔