امریکی صدر ڈونلڈ ٹرمپ سابق صدر اوباما پر اس حوالے سے بہت تنقید کیا کرتے تھے کہ وہ چھٹیاں بہت لیتے ہیں۔ تاہم ٹرمپ خود گرما گرم سیاسی معاملات سے فرار حاصل کر کے سترہ روز کے لیے نیو جرسی میں واقع اپنے ریزورٹ روانہ ہوئے۔ یہ الگ بات کہ ٹرمپ کو چھٹیوں میں بھی کام سے فراغت نہیں مل سکتی۔

روسی صدر ولادیمیر پوٹن اپنی چھٹیاں ایسی مقامات پر گزارنا پسند کرتے ہیں جہاں انہیں زیادہ کپڑے نہ پہننے پڑیں۔ پوٹن نے رواں برس موسم گرما کی چھٹیوں کے لیے سائبیریا کا انتخاب کیا اور اپنے ہمراہ میڈیا کی ایک ٹیم بھی لے گئے تاکہ مچھلیاں پکڑتے اور کشتی رانی کرتے ہوئے لمحات کو تصویروں میں قید کر کے روسی عوام تک بھی پہنچایا جا سکے۔

جرمن چانسلر انگیلا میرکل گزشتہ دس برسوں سے گرمیوں میں شمالی اٹلی کے الپائن کے علاقے میں اپنے شوہر کے ہمراہ چھٹیاں گزارتی ہیں۔ تاہم سفر پر روانہ ہونے سے قبل وہ اپنی ٹریڈ مارک لال رنگ کی کیپ لینا نہیں بھولتیں۔ جرمن میڈیا اس کیپ کو ’ چانسلرز کیپی‘ کہتا ہے۔ سن 2014 میں سکیٹنک کرتے ہوئے اسی علاقے میں چانسلر میرکل گر گئی تھیں اور اُن کے کولہے کی ہڈی ٹوٹ گئی تھی۔

اپنی جرمن ہم منصب کی طرح برطانوی وزیر اعظم ٹیریزا مے بھی ہائکنگ کی شوقین ہیں۔ سن دو ہزار سولہ میں مے نے اپنے شوہر کے ہمراہ سویٹزر لینڈ میں کوہ پیمائی کی۔ البتہ سن 2017 اپریل میں اُنہوں نے چھٹیوں کے پانچ دن ویلز میں نیشنل پارک سنوڈونیا میں گزارے۔

اگرچہ نو منتخب فرانسیسی وزیر اعظم ماکروں اور اُن کی بیگم کے پاس فی الحال تفریح کرنے کے لیے زیادہ وقت نہیں۔ تاہم جب بھی اُن کے پاس کچھ وقت ہوتا ہے وہ اس کا استعمال بھرپور طور پر کرتے ہیں۔ اس تصویر میں یہ جوڑا اپریل سن دو ہزار سترہ میں ایک پہاڑ پر دوپہر کے کھانے کے وقفے میں لطف اندوز ہوتا نظر آ رہا ہے۔

کینیڈین وزیر اعظم کا بہاماس کے جزیرے پر نئے سال کے ہالی ڈے ٹرپ کو عوام کی جانب سے اُس وقت تنقید کا نشانہ بنایا گیا جب یہ پتہ چلا،کہ وہ اس ٹور کے لیے سرکاری ہیلی کاپٹر کے بجائے ایک پرائیویٹ ہیلی کاپٹر لے گئے ہیں۔ ٹروڈائے گرمیوں میں گھر سے قریب رہنا چاہتے ہیں۔

ہسپانوی وزیر اعظم ماریانو راخوئے کے لیے گرمیوں کی تعطیلات اتنے آرام سے نہیں آئیں۔ اُنہیں جولائی سن 2017 میں اپنی قدامت پسند جماعت پیپلز پارٹی کے فراڈ اور رشوت خوری کے حوالے سے ایک مقدمے میں بطور گواہ عدالت میں پیش ہونا پڑا۔ تاہم ایک پریس کانفرنس کے بعد راخوئے اپنے من پسند تفریحی مقام گلیشیا کی جانب روانہ ہو گئے۔

زمبابوے کے طویل عرصے سے چلے آ رہے صدر جب بھی چھٹیوں پر جاتے ہیں، اُن پر تنقید ہوتی ہے۔ اس کی وجہ یہ ہے کہ اقتصادی بدحالی کے شکار ملک زمبابوے کو ترانوے سالہ موگابےکی ہر سال موسم سرما میں ایک ماہ سے زیادہ کی تعطیلات کا خرچہ برداشت کرنا پڑتا ہے۔ سن 2017 کے آغاز میں سنگاپور میں اُن کی تعطیلات پر آنے والے اخراجات مبینہ طور پر چھ ملین ڈالر تھے۔

شمالی کوریا کے سربراہ کم جونگ اُن اپنے بین الاقوامی طور پر الگ تھلگ ملک تک محدود سہی لیکن اس کا یہ مطلب ہر گز نہیں کہ وہ تعطیلات کا خواب نہیں دیکھ سکتے۔ کم جونگ اُن کے بارے میں کہا جاتا ہے کہ وہ چھوٹی عمر ہی سے ڈزنی ورلڈ کو جنون کی حد تک پسند کرتے ہیں اور جاپانی ذرائع ابلاغ کے مطابق سن انیس سو اکیانوے میں ایک فرضی نام سے وہ ٹوکیو کے ڈزنی لینڈ کی سیر بھی کر چکے ہیں۔

اس سال دنیا کے مختلف ملکوں کے پچیس ملین یا ڈھائی کروڑ سے زائد انسان کروز بحری جہازوں پر سمندری تعطیلات گزاریں گے۔ یہ تعداد 2016ء کے مقابلے میں ایک ملین زیادہ ہے۔ زیادہ مسافروں کا مطلب ہے زیادہ جہازوں کی ضرورت۔ اس سال دنیا بھر میں 448 کروز سپش کے عالمی بیڑے میں 26 نئے شپ شامل کیے جا رہے ہیں۔ ان میں چھوٹے دریاؤں کے لیے بنائے گئے شپ بھی شامل ہوں گے اور گہرے سمندروں کے لیے بہت بڑے بڑے بحری جہاز بھی۔

صرف اسی سال کروز بحری جہازوں کے عالمی بیڑے میں گہرے سمندروں میں سفر کرنے والے جو نئے کروز شپ شامل کیے جا رہے ہیں، ان کی تعداد 12 ہے۔ ان بحری جہازوں پر ایک وقت میں مجموعی طور پر 28 ہزار سے زیادہ مسافر سفر کر سکیں گے۔ بحری جہاز سازی کی صنعت کی تنظیم CLIA کے مطابق عالمی سطح پر ایسا ہر چوتھا نیا کروز شپ کسی نہ کسی جرمن شپ یارڈ یا اس کی کسی ذیلی کمپنی کا تیار کردہ ہو گا۔

یورپی کمپنیوں کو بہت بڑے بڑے پرتعیش کروز شپ تیار کرنے کا عشروں کا تجربہ ہے۔ یہ کام بہت مہارت رکھنے والی کمپنیاں اپنے بہت ماہر اور تجربہ کار کارکنوں کے ذریعے کرتی ہیں۔ جرمنی میں فولاد کی صنعت کی نمائندہ ٹریڈ یونین آئی جی میٹل کا کہنا ہے کہ یورپی شپ بلڈنگ کمپنیوں کے پاس ایسے باصلاحیت انجینئر اور تکنیکی ماہر موجود ہیں، جو شپ بلڈنگ سے متعلق کسی بھی خواب کو حقیقت کا روپ دے سکتے ہیں۔

دنیا بھر میں کروز شپ بلڈنگ کی صنعت پر تین بڑے یورپی شپ یارڈ چھائے ہوئے ہیں۔ ان میں اٹلی کی کمپنی فنکانتیئری، فرانس کی ایس ٹی ایکس اور جرمنی کے شہر پاپن برگ میں قائم مائر شپ یارڈ شامل ہیں۔ 2016ء کے اوائل تک اطالوی کمپنی Fincantieri کے پاس 24 نئے بحری جہازوں کی تیاری کے آرڈر تھے، جرمنی کے مائر شپ یارڈ (تصویر) کے پاس 21 اور فرانس کی STX کے پاس 12 نئے کروز بحری جہازوں کی تیاری کے آرڈر۔

کروز شپ بلڈنگ کے شعبے میں سرگرم واحد غیر یورپی ادارہ جاپانی کمپنی مِٹسوبیشی ہیوی انڈسٹریز ہے، جس کے پاس 2016ء کے اوائل تک صرف ایک شپ کی تیاری کا آرڈر تھا۔ پھر مِٹسوبیشی نے کروز شپ بلڈنگ کا کام ترک کر دیا۔ جرمنی کا مائر شپ یارڈ 2013ء تک صرف ایک کروز کمپنی آئیڈا کے لیے سات بہت بڑے بڑے لگژری شپ تیار کر چکا تھا۔ آئیڈا نے 2011ء میں مِٹسوبیشی کو دو جہازوں کے آرڈر دیے لیکن یہ کام تکمیل کو نہ پہنچ سکا۔

2015ء میں آئیڈا نے تصدیق کر دی کہ جرمنی کا مائر شپ یارڈ اس کے لیے دو نئے بحری جہاز تیار کرے گا۔ ہر شپ میں ڈھائی ہزار سے زائد مسافروں کے لیے کیبن ہوں گے اور دونوں شپ مائع قدرتی گیس سے چلیں گے۔ ایک بحری جہاز 2018ء کے موسم خزاں میں آئیڈا کے حوالے کیا جائے گا اور دوسرا 2021ء کے موسم بہار میں۔ یہ جہاز ماحول کے لیے کم نقصان دہ ہوں گے۔

آج کل اکثر جدید ترین شپ ایسے ڈیزائن کیے جاتے ہیں کہ وہ پٹرول یا ڈیزل کے بجائے مائع قدرتی گیس پر چلتے ہیں۔ یوں ماحول کے لیے ضرر رساں گیسوں کا اخراج کم ہوتا ہے۔ ان دنوں الیکٹرک موٹروں اور کم بجلی استعمال کرنے والی ایل ای ڈی لائٹوں کے استعمال پر بھی زیادہ توجہ دی جا رہی ہے۔ ان جہازوں کی تیاری میں کم وزن بلڈنگ مٹیریل کے استعمال سے توانائی کے شعبے میں ان کی کارکردگی کو مزید بہتر بنایا جا سکتا ہے۔

’ہارمنی آف دا سیز‘ اس وقت دنیا کا سب سے بڑا کروز شپ ہے۔ یہ 66 میٹر چوڑا ہے اور 362 میٹر لمبا۔ اس 16 منزلہ بحری جہاز میں 20 ڈائننگ رومز، 23 سوئمنگ پولز اور ایک پارک بھی جس میں 12 ہزار پودے لگے ہیں۔ اس جہاز پر 5,480 مسافروں اور عملے کے 2000 سے زائد ارکان کے لیے گنجائش ہے۔ اس شپ کو ’تیرتا ہوا شہر‘ بھی کہا جاتا ہے، جسے بنانے والی فرانسیسی کمپنی کو ایک بلین یورو سے زائد کی قیمت ادا کی گئی۔

’ٹائٹینک‘ 269 میٹر لمبا ایک نو منزلہ کروز شپ تھا۔، جس میں 2687 مسافروں اور عملے کے 860 ارکان کے لیے گنجائش تھی۔ اس کے پہلے اور آخری سفر کے وقت اس میں 2200 مسافر اور عملے کے سینکڑوں ارکان بھی سوار تھے۔ ان میں سے 1500 ہلاک ہو گئے تھے۔ ان سب کو بچایا جا سکتا تھا۔ لیکن تب کارپیتھیا نامی ایک اور کروز شپ صرف ایک گھنٹے اور بیس منٹ کی تاخیر سے سمندر میں اس جگہ پر پہنچا تھا، جہاں ٹائٹینک ڈوبا تھا۔

چین مستقبل میں یورپی کروز شپ بلڈنگ کمپنیوں کے لیے نیا کاروباری حریف ثابت ہو سکتا ہے۔ گزشتہ برس قریب ایک ملین چینی باشندوں نے کروز شپنگ کی۔ 2030ء تک یہ تعداد آٹھ ملین تک پہنچ سکتی ہے۔ جولائی 2015ء میں اطالوی ادارے Fincantieri نے چینی شپ بلڈنگ کارپوریشن (CSSC) کے ساتھ مل کر ایک نیا منصوبہ شروع کیا، جس کے تحت کروز شپنگ کی چینی منڈی کے لیے بحری جہاز تیار کیے جائیں گے۔