پاکستان کے سیاسی مبصرین کے مطابق بشریٰ بی بی کا بیان نہ صرف تحریک انصاف کو نقصان پہنچا سکتا ہے بلکہ مخالفین کی طرف سے پی ٹی آئی کو منفی قوت قرار دینے کے مؤقف کو بھی تقویت ملے گی۔ تجزیہ کاروں کا کہنا ہے کہ اس طرح کی مذہبی سیاست پاکستان کے دوسرے ملکوں سے تعلقات کو بھی خراب کر سکتی ہے۔

 پاکستان کے سابق وزیر اعظم عمران خان کی اہلیہ بشریٰ بی بی نے حال ہی میں اپنے ایک ویڈیو پیغام میں دعویٰ کیا کہ جب عمران خان ننگے پاؤں مدینہ کا دورہ کرنے کے بعد واپس آئے تو اس وقت کے آرمی چیف جنرل قمر جاوید باجوہ کو کالز موصول ہوئیں، جن میں کہا گیا، ''ہم اس ملک سے شریعت ختم کرنے جا رہے ہیں اور آپ شریعت کے حامی کو لے آئے ہیں، ہم انہیں نہیں چاہتے۔‘‘

بشریٰ بی بی نے کسی ملک کا نام لیے بغیر یہ الزامات عائد کیے لیکن کیونکہ بیان سعودی عرب کے دورے کے حوالے سے تھا تو مبصرین اور سیاسی حلقے اسے سعودی عرب کے خلاف ہی تصور کر رہے ہیں۔ اس بیان کی مختلف حلقوں کی جانب سے مخالفت کی جا رہی ہے حتیٰ کہ پی ٹی آئی کے سیاسی رہنما بھی اسے بشریٰ بی بی کا ذاتی بیان کہتے ہوئے اس سے لاتعلقی کا اظہار کر رہے ہیں۔

پی ٹی آئی کے لیڈر بیرسٹر سیف نے اسے بشریٰ بی بی کا ذاتی بیان قرار دیا اور کہا کہ وہ ہی اپنے اس بیان کی وضاحت کر سکتی ہیں۔ بعد میں گو کہ انہوں نے بشریٰ بی بی کے بیان کی یہ کہتے ہوئے وضاحت دینے کی کوشش کی کہ ان کے بیان میں سعودی عرب کا نام نہیں لیا گیا۔

 اس بیان کے ساتھ ساتھ بشریٰ بی بی نے اپنے اسی ویڈیو بیان میں یہ بھی اشارہ دیا کہ آنے والے دنوں میں اُسی پارٹی لیڈر کو ٹکٹ دیا جائے گا، جو 24 نومبر کے لانگ مارچ میں لوگوں کو جمع کرنے کے حوالے سے بہتر کارکردگی دکھائے گا۔

بشریٰ بی بی کے ویڈیو بیان کے مقاصد کیا ہیں؟

سیاسی مبصر مظہر عباس کا خیال ہے کہ سعودی عرب کے حوالے سے بشریٰ بی بی کا بیان اور پارٹی رہنماؤں پر دباؤ ڈالنا دونوں ہی 24 نومبر کے احتجاج کو کامیاب بنانے کی کوشش ہیں۔ تاہم انہوں نے کہا، ''سعودی عرب کے بارے میں بیان بالکل غیر ضروری تھا۔‘‘

مظہر عباس کا کہنا ہے، ''پارٹیاں اپنے ورکرز پر بعض اوقات دباؤ ڈالتی ہیں اور ٹکٹ کے حوالے سے ان کا بیان کسی حد تک سمجھ آتا ہے لیکن ان کے سعودی عرب کے حوالے سے بیان نے پارٹی کے لیے مشکل کھڑی کر دی ہے۔ ایسا بیان کسی بھی موقع پر دینا مناسب نہیں تھا اور اس سے پی ٹی آئی کے اندر بھی ابہام پیدا ہوگیا ہے۔ پارٹی کے بہت سے لیڈر اس بیان سے پریشان ہیں اور پارٹی قیادت نے بھی اسے مثبت انداز میں نہیں لیا، خاص طور پر جب وہ 24 نومبر کو ہونے والے احتجاج کی تیاری کر رہے ہیں۔‘‘

زیادہ تر مبصرین یہ سمجھتے ہیں کہ ایسے متنازع بیانات سے پارٹی مخالف بیانیے کو تقویت ملے گی لیکن کچھ کا یہ بھی خیال ہے کہ پی ٹی آئی کا ووٹر کسی بھی صورت اپنی پارٹی کی سپورٹ نہیں چھوڑے گا، لہٰذہ پارٹی کی حمایت کم ہونے کا کوئی خطرہ موجود نہیں۔

سیاسی اور سماجی معاملات کی مبصر فرزانہ باری کا کہنا ہے کہ عمران خان کو سعودی عرب سے بہت سے تحائف دے کر  واپس بھیجا گیا تھا مگر بعد میں شاید تعلقات میں تناؤ آیا۔ ان کے مطابق بشری بی بی کا بیان مذہبی جذبات کو بھڑکانے اور مذہبی حلقوں کی حمایت حاصل کرنے کے لیے ہے۔ ان کا کہنا ہے، ''سعودی عرب کے حوالے سے بشریٰ بی بی کا بیان ایک منفی بیان ہے لیکن پی ٹی آئی کے، جو پختہ حامی ہیں، وہ اس بیان سے زیادہ متاثر نہیں ہوں گے۔ ہاں! البتہ مخالف بیانیہ رکھنے والوں کو یہ تنقید کا موقع ضرور فراہم کرے گا۔‘‘

سیاسی اور پارلیمانی امور کے مبصر ظفر اللہ خان نے پارٹی پر دباؤ ڈالنے کے حوالے سے بشری ٰبی بی کے بیان پر اپنا نقطہ نظر بتاتے ہوئے کہا، ''دباؤ کی تکنیک کام کر جائے تو ٹھیک، نہ کرے تب بھی ٹھیک، پارٹی ٹکٹوں پر ایسی باتوں سے کوئی فرق نہیں پڑتا کیونکہ جب پارٹی ٹکٹ کی بات آتی ہے تو یہ دیکھا جاتا ہے کہ کون جیت سکتا ہے؟‘‘

بشریٰ بی نی کے بیان میں کتنا وزن ہے؟

فرزانہ باری کہتی ہیں، ''یہ بات غیر منطقی ہے۔ انہوں نے حالیہ واقعات کو غلط طریقے سے پیش کیا ہے۔ سعودی عرب اپنے معاشرتی معاملات میں کھل رہا ہے لیکن وہ کبھی یہ نہیں کہے گا کہ ہم اپنے معاشرتی اصولوں کو ختم کر رہے ہیں۔ بشریٰ بی بی شاید یہ سوچ رہی ہوں کہ لوگ ان کے بیان کو مان لیں گے کیونکہ حال ہی میں سوعدی عرب میں کچھ موسیقی کے پروگرام ہوئے تھے۔ اس طرح کے بیانات کا عالمی سطح پر کوئی فائدہ نہیں ہو گا اور پاکستان کو عالمی سطح پر مزید نقصان ہو سکتا ہے۔ تاہم یہ بیان طالبان اور عسکریت پسند عناصر کو خوش کرنے کی کوشش ہو سکتی ہے۔‘‘

ظفر اللہ خان بھی کہتے ہیں کہ سعودی عرب کے حوالے سے کی جانے والی بات ''ناقابل یقین‘‘ لگتی ہے۔