سکردو کے سیاحتی مقامات تک پہنچنے کے لئے طویل اور قدرے دشوار گزار راستوں پر سفر کرنا پڑتا ہے۔ لیکن یہ راستے خوبصورت وادیوں، کھیتوں،پگڈنڈیوں، دلکش جھرنوں اور بلند و بالا پہاڑوں سے مزین ہیں۔ اوریوں لگتا ہے کہ ہر منظر ہی خاص منظر ہے.

بابو سر ٹاپ سے سکردوکی طرف جاتے ہوئے راستے میں جگہ جگہ پہاڑوں پر سرسبز میدانی علاقے دیکھنے کو ملتے ہیں۔ ان علاقوں میں پہاڑ، بادل، آسمان ، خاموشی اور سکون دیکھ کر لگتا ہے کہ انسان قدرت سے ہمکلام ہو رہا ہے۔

سکردو اور اس کے گردونواح کا علاقہ قدرت کے حسین رنگوں کا عکاس ہے۔ موسم گرما میں یہاں دن قدرے گرم اور رات کا موسم سرد ہوتا ہے۔ بارش ہوجائے تو ان رنگوں میں قوس قزح کے رنگ بھی شامل ہو کر اس علاقے کی خوبصورتی بڑھا دیتے ہیں۔

سطح سمندر سے غیرمعمولی بلندی پر واقع ان سرسبز میدانوں میں قدرتی حسن کے بہت سے رنگ نمایاں ہیں۔ ایک طرف کچھ مویشی چارہ کھاتے نظر آ رہے ہیں۔

گلگت بلتستان کے علاقے سکردو سے تھوڑی دیر کی مسافت پر ایک صحرا موجود ہے جو اپنی آب و ہوا کے لحاظ سے گرم نہیں بلکہ سرد ہے ۔ سردیوں کے موسم میں اس صحرا کا درجۂ حرارت منفی 25 ڈگری سینٹی گریڈ تک گر جاتا ہے۔ اسے سرد صحرا (کولڈ ڈیزرٹ ) کے نام سے جانا جاتا ہے۔ اس صحرا میں رات کو کیمپنگ کرنے والے لوگ بتاتے ہیں کہ یہاں کی رات خاموش مگر رنگ برنگے تاروں سے جگمگ کرتی ہے۔

قدرتی حسن سے مالا مال شنگریلا جھیل دنیا بھر سے آنے والے سیاحوں کی توجہ کا مرکز بنی رہتی ہے۔ بلند د بالا پہاڑوں میں گھری ہوئی یہ جھیل سیاحتی قیام گاہوں ،خوبصورت نظاروں اور صاف شفاف پانیوں کی وجہ سے سیاحوں میں بہت مقبول ہے۔ شنگریلا چینی زبان کا لفظ ہے جس کے معنی ہیں زمین پر جنت۔

سکردو کے مضافات میں کئی دلکش وادیاں ہیں جہاں پر لوگ جھیلوں میں کشتی رانی کرتے ہیں، مچھلیاں پکڑتے ہیں، ہائیکنگ اور کیمپنگ کرتے ہیں۔ بعض لوگ ان سرسبز اور حسین وادیوں میں طویل واک بھی کرتے ہیں۔

خوبصورت نظاروں والی سدپارہ جھیل گلگت بلتستان میں واقع میٹھے پانی کی ایک قدرتی جھیل ہے۔ یہ شہر سکردوسے چند کلومیٹر کے فاصلے پر ہے ۔ اس کے اطراف میں سنگلاخ چٹانیں ہیں۔ موسم سرما میں ان پہاڑوں پر ہونے والی برفباری جب موسم گرما میں پانی بن کر پگھلتی ہے تو ان پہاڑوں سے آنے والا پانی جھیل میں اکٹھا ہو جاتا ہے۔

ہمالیہ کے دامن میں واقع دیوسائی دنیا کا سب سے بلند اور اپنی نوعیت کا واحد پہاڑی میدان ہے، جو اپنے کسی بھی مقام پر 4000 میٹر سے کم بلند نہیں۔ سال کے آٹھ ماہ یہ مقام برف سے ڈھکا رہتا ہے۔ دیوسائی نیشنل پارک موسم گرما میں ملک بھر سے آئے ہوئے سیاحوں سے بھرا رہتا ہے۔ اس علاقے کے بارے میں مقامی لوگوں میں کئی کہانیاں مشہور ہیں۔

سکردو سے آگے شگر کے علاقے میں ایک چار سو سال پرانا قلعہ موجود ہے، جسے شگر کے راجہ حسن خان اماچہ نے تعمیر کروایا تھا۔ یہاں پر ایک عجائب گھر بھی موجود ہے، جو اس علاقے کے پرانے باسیوں کی تاریخ و ثقافت کی تفصیلات لیے ہوئے ہے۔

گلگت بلتستان کی طرف جانے والے سیاحوں کی تعداد میں اضافہ ہونے کے ساتھ ساتھ یہاں مقامی مصنوعات کی فروخت میں بھی اضافہ ہوتا جا رہا ہے۔ سیاح اس علاقے کے روایتی لباس اور قیمتی پتھروں سمیت مختلف مقامی مصنوعات خریدتے ہیں۔

کراچی ایکسپو سینٹر میں ہونے والی اس سالانہ نمائش میں رواں برس 20 ممالک شریک ہیں۔ ملکی اور غیر ملکی مندوبین کی جانب سے 400 سے زائد اسٹالز لگائے گئے ہیں۔

خدمات کے موضوع پر انتہائی اہم کانفرنس بھی اس نمائش کا حصہ رہی جس میں سندھ کے صوبائی وزیر سیاحت سید سردار علی شاہ کے علاوہ آواری، سرینا اور ہاشو گروپس کے سربراہان بطور پینلسٹ نے اس انڈسٹری کے حوالے سے اپنے خیالات کا اظہار کیا۔

نمائش میں معتدد غیر ملکی ائیرلائنز بھی اپنے نمائندگان کے ساتھ شریک ہیں۔ کئی غیر ملکی ائیر لائنز نے پاکستان سے دیگر ممالک کے لیے نئی پروازوں کا اعلان بھی کیا۔

اس برس ملائشیا کی جانب سے بھر پور شرکت کی جا رہی ہے۔ اس ملک سے ٹریول ایجنٹس، سیاحت کی خدمات فراہم کرنے والے اداروں سمیت ہوٹلز اور سیاحت کے شعبہ میں خدمات فراہم کرنے والے 23 ادارے شرکت کر رہے ہیں۔

دو سے چار ستمبر تک جاری رہنے والی ٹریول مارٹ 2018ء میں ملک کے تمام صوبوں کی نمائندگی کی گئی ہے اور مختلف ثقافتی رنگوں کو بھی اجاگر کیا جا رہا ہے۔

مشکلات کا شکار پاکستان کی قومی فضائی کمپنی پی آئی اے بھی ٹریول مارٹ 2018ء میں اپنی پروازوں اور خدمات کے حوالے سے نئی حکمت عملی کے ساتھ سیاحوں کے لیے پُر کشش پیکجز کے ساتھ پُر عزم نظر آئی۔

کراچی کے ایکسپو سنٹر میں سیاحت کے فروغ کے لیے منعقد ہونے والی اس نمائش میں شریک عوام کی بڑی تعداد نہ صرف ملکی بلکہ بیرون ممالک سیاحت سے متعلق بھی معلومات حاصل کرنے میں دلچسپی کا مظاہرہ کرتی نظر آئی۔

پاکستان کے سیاحتی مقامات کی جانب توجہ مبذول کروانے کے لیے سیاحت کے صوبائی محکموں کی جانب سے نہ صرف سیاحتی اسٹالز لگائے گئے ہیں بلکہ نمائش میں صوبائی سیاحت پر بنائی گئی خصوصی ڈاکومنٹریز بھی دکھائی جا رہی ہیں۔

ٹریول مارٹ 2018 میں چین، سعودی عرب، تھائی لینڈ، ملیشیا، سری لنکا، ترکی، آذربائیجان، متحدہ عرب امارات، بنگلادیش، ویتنام، ایران، کویت، قطر اور بحرین سمیت کئی دیگر ممالک کے سفارت کار اپنے ٹورازم بورڈز اور ٹورازم کمپنیوں کے ساتھ شریک ہیں۔

ملک میں سیاحت کو فروغ دینے کے لیے پاکستان ٹریول مارٹ نامی بین الاقوامی نمائش کا آغاز گزشتہ برس کیا گیا تھا۔ اس سلسلے کی اولین نمائش یعنی ٹریول مارٹ 2017 میں دس ممالک سے تعلق رکھنے والی 145 کمپنیاں شریک ہوئی تھیں۔ جبکہ اس سال 20 ممالک کی 200 سے زائد کمپنیاں اس مارٹ میں شریک ہیں۔

ٹریول مارٹ 2018ء کے دوران مختلف صوبائی اور علاقائی رقص بھی پیش کیے گئے۔ اس تصویر میں شیدی افراد اپنا روایتی رقص پیش کر رہے ہیں۔ کہا جاتا ہے شیدی قبائل افریقہ سے تعلق رکھتے ہیں۔