بھارتی دارالحکومت نئی دہلی سے منگل سترہ جولائی کو ملنے والی نیوز ایجنسی اے ایف پی کی رپورٹوں کے مطابق بھارت میں عام شہریوں کے قتل کے یہ قریب دو درجن واقعات ملک کے مختلف حصوں میں اس وقت رونما ہوئے جب مقامی باشندوں کے مشتعل گروہوں نے کسی نہ کسی شخص کو مشتبہ سمجھتے ہوئے اس پر حملہ کر دیا۔

ان واقعات کی وجہ اکثر سوشل میڈیا پر پھیلنے والی ایسی افواہیں بنیں کہ مثال کے طور پر کسی شہر میں بچوں کو اغوا کرنے والے مجرموں کے گروہ سرگرم تھے یا پھر کسی ضلع میں ایسے جرائم پیشہ گروہوں کے ارکان جگہ جگہ گھوم رہے تھے، جو مبینہ طور پر بچیوں اور عورتوں کو اغوا کر کے انہیں جسم فروشی کروانے والے گروہوں کے ہاتھ فروخت کر دیتے تھے۔

لیکن اکثر واقعات میں ایسے عوامی دعوے سوشل میڈیا پر محض افواہیں ہی ثابت ہوئے تھے، تاہم ان افواہوں کے بعد بظاہر اپنے ’بچوں اور خواتین کی سلامتی کی وجہ سے تشویش کا شکار‘ ہو جانے والے مشتعل شہریوں کے گروہ اب تک 22 افراد کو قتل کر چکے ہیں۔

یہ مقتولین تقریباﹰ سارے ہی ایسے بھارتی باشندے تھے، جو اپنے اپنے آبائی علاقوں سے دور بھارت کے کسی دوسرے حصے میں گئے ہوئے تھے اور مقامی زبانیں نہیں بولتے تھے۔ اسی لیے ان پر حملے کرنے والے مشتعل شہریوں اور بلوائیوں نے انہیں غلطی سے جرائم پیشہ سمجھ لیا تھا۔

بھارت میں ایسی افواہیں سوشل میڈیا پر اکثر وٹس ایپ جیسی ایپلیکیشنز کے ذریعے پھیلتی ہیں، جن کے بارے میں نئی دہلی میں ملکی سپریم کورٹ نے اب وزیر اعظم نریندر مودی کی حکومت کو یہ حکم دیا ہے کہ وہ ہر چند روز بعد کہیں نہ کہیں پیش آنے والے ایسے ’خوفناک اور قابل مذمت‘ واقعات کی روک تھام کے لیے خصوصی قانون سازی کرے۔

آبادی کے لحاظ سے دنیا کے دوسرے سب سے بڑے ملک بھارت میں مقامی شہریوں کے مشتعل گروہوں کے ہاتھوں قتل کا تازہ ترین واقعہ گزشتہ ہفتے جنوبی ریاست کرناٹک میں پیش آیا تھا، جہاں بلوائیوں نے امریکی سافٹ ویئر کمپنی گوگل کے ایک انجینیئر کو مبینہ طور پر بچے اغوا کرنے والا ایک مجرم سمجھتے ہوئے مار مار کر ہلاک کر دیا تھا۔

اس سے قبل اسی مہینے کی یکم تاریخ کو کرناٹک کی ہمسایہ بھارتی ریاست مہاراشٹر میں بھی اکٹھے پانچ افراد مشتعل شہریوں کے متعدد گروپوں کے حملوں کا نشانہ بننے کے بعد دم توڑ گئے تھے۔

اسی طرح بھارت میں حالیہ ہفتوں اور مہینوں میں کئی ایسے مسلمان بھی اکثریتی ہندو آبادی سے تعلق رکھنے والے نام نہاد ’رضاکار محافظوں‘ کے ہاتھوں مارے جا چکے ہیں، جن کے بارے میں سڑکوں پر نگرانی کرنے والے ہندوؤں کو شبہ ہو گیا تھا کہ وہ مبینہ طور پر ذبح کیے جانے کے لیے گائیوں کی نقل وحمل میں ملوث تھے۔ ہندو مت میں گائے کو ایک مقدس جانور سمجھا جاتا ہے اور اس کو ذبح کرنا ایک انتہائی ناپسندیدہ فعل ہے۔ بھارت میں افواہوں کی صورت میں ایسے غیر مصدقہ پیغامات عام صارفین کے مابین اس لیے بھی فوری طور پر تیزی سے گردش کرنے لگتے ہیں کہ بھارت وٹس ایپ کے صارفین کی دنیا بھر میں سب سے بڑی قومی منڈی ہے، جہاں وٹس ایپ استعمال کرنے والے شہریوں کی تعداد 200 ملین یا 20 کروڑ بنتی ہے۔

خود وٹس ایپ کمپنی کی انتظامیہ کی طرف سے بھی کہا جا چکا ہے کہ اسے یہ جان کر شدید تشویش ہوئی کہ بھارت میں اس ایپ کو کس طرح پرتشدد واقعات کے لیے استعمال کیا جا رہا ہے اور کیسے وٹس ایپ صارفین کے مابین پھیلنے والی افواہیں قریب دو درجن بھارتی شہریوں کی جانیں لے چکی ہیں۔

م م / ع ب / اے ایف پی