بنڈس لیگا، اشٹٹ گارٹ نے فرینکفرٹ کو شکست دے دی
18 مارچ 2013![](https://static.dw.com/image/16680045_800.webp)
بنڈس لیگا پوائنٹس ٹیبل میں انتہائی نیچے جا پہنچنے والی اشٹٹ گارٹ کی ٹیم اس فتح کے بعد ٹورنامنٹ سے اخراج اور دوسرے درجے میں چلے جانےکے خطرے سے خاصی دور جا پہنچی ہے۔ اتوار کے روز کھیلے گئے اس میچ میں اشٹٹ گارٹ نے فرینکفرٹ کو ایک کے مقابلے میں دو گول سے شکست دی۔ بنڈس لیگا کے ٹیبل پر اب اشٹٹ گارٹ کی پوزیشن بارہویں ہو گئی ہے۔
دونوں ٹیموں کے مابین پہلے ہاف میں مقابلہ دوسرے ہاف کے مقابلہ میں خاصا سست تھا۔ تاہم دوسرے ہاف میں دونوں ٹیموں نے ایک دوسرے کے گول پر مسلسل حملے کیے جب کہ اس ہاف میں متعدد فاؤل بھی دیکھنے میں آئے۔
ابتدا میں فرینکفرٹ کی جانب سے آئیگنر نے کھیل کے 17ویں منٹ میں اپنی ٹیم کو برتری دلائی جو پہلے ہاف کے اختتام تک برقرار رہی، تاہم دوسرے ہاف کے آغاز کے کچھ دیر بعد اشٹٹ گارٹ کی جانب سے ابیسیوچ( Ibisevic) نے گول کر کے یہ برتری ختم کر دی اور کھیل کے 71ویں منٹ میں نیدرمائیر نے ایک اور گول کر کے اشٹٹ گارٹ کو برتری دلا دی، جو کھیل کے اختتام تک قائم رہی۔
اتوار ہی کے روز کھیلے گئے ایک دوسرے میچ میں مؤنشن گلاڈباخ نے ہینوور کو صفر کے مقابلے میں ایک گول سے ہرا دیا۔
کھیل کا واحد گول مؤنشن گلاڈباخ کی جانب سے ڈی جونگ نے کھیل کے 36 ویں منٹ میں کیا۔ بعد میں دونوں ٹیموں کے جانب سے ایک دوسرے کے گول پر حملے ہوتے رہے، تاہم کوئی بھی ٹیم بال کو گول میں پہنچانے میں کامیاب نہ ہوئی۔
رواں میچ ڈے کے اختتام پر بائرن میونخ کی ٹیم پوائنٹس ٹیبل پر بدستور سب سے آگے ہے اور اسے بنڈس لیگا کا ٹائٹل جیتنے کے لیے اب صرف دو میچز جیتنا ہیں۔ بائرن میونخ پوائنٹس ٹیبل پر دوسرے نمبر کی ٹیم اور دفاع چیمپیئن ڈورٹمنڈ سے 20 پوائنٹس کا فرق بنائے ہوئے ہے۔ گزشتہ روز ایک میچ میں بائرن میونخ نے لیورکوزن کو شکست دے دی تھی۔
(at/ah (AP, dpa