بائرن میونخ کے سٹار فٹ بالر باستیان شوائن شٹائیگر نے میچ کے بعد اپنے ایک بیان میں اعتراف کیا کہ بنڈس لیگا میں اگر ان کی ٹیم لیگ کی ٹاپ ٹیم ڈورٹمنڈ کے ساتھ پوائنٹس کا فرق کم کرنا چاہتی ہے، تو اسے شدید محنت کرنا ہو گی۔ شوائن شٹائیگر نے کہا کہ ان کی ٹیم نے میچ میں اپنی بھرپور کارکردگی کا مظاہرہ نہیں کیا۔ لیگ چارٹ پر سرفہرست ٹیم ڈورٹمنڈ کے ساتھ بائرن میونخ کا پوائنٹس کا فرق اب 14 تک پہنچ چکا ہے۔

اس میچ میں بائرن میونخ کی طرف سے کھیل کے پہلے ہاف میں ماریو گومیس نے گول کر کے اپنی ٹیم کو برتری دلائی، جسے چلی سے تعلق رکھنے والے کھلاڑی مِڈ فیلڈر Arturo Vidal نے برابرکر دیا۔ اس کے بعد بائرن میونخ کی ٹیم کھیل کو اپنی گرفت میں کرنے کی تمام تر کوششوں کے باوجود کامیاب نہ ہو سکی اور میچ برابری کی بنیاد پر ختم ہو گیا۔

اس میچ کے ڈرا ہونے کے بعد اب بائرن میونخ لیگ میں 20 پوائنٹس کے ساتھ آٹھویں پوزیشن پر ہے، جبکہ لیورکوزن 25 پوائنٹس کے ساتھ تیسری پوزیشن پر آگئی ہے۔

لیگ میں مائنز کی ٹیم نے ہفتے کے روز کھیلے گئے ایک میچ میں اپنے مدمقابل میونشن گلاڈباخ کو تین دو سے شکست دے کر ایک مرتبہ پھر لیگ میں دوسری پوزیشن حاصل کر لی ہے۔ ہفتے کے روز کھیلے گئے دیگر میچوں میں کائزرزلاؤٹرن نے نیومبرگ کو تین ایک سے شکست دی۔ فرنیکفرٹ کو ہوفن ہائم کے مقابلے میں چار صفر کے واضح فرق سے ہار کا سامنا کرنا پڑا۔ ہینوور اور نے ہیمبرگ کو تین دو سے ہرایا۔ لیگ کی سرفہرست ٹیم ڈورٹمنڈ نے فرائی برگ کے خلاف ایک کے مقابلے میں دو گول سے فتح حاصل کی جبکہ شالکے نے بریمن کو چار صفر سے ہرا دیا۔

اتوار کے روز شٹٹ گارٹ کا مقابلہ کولون سے ہو رہا ہے جبکہ سینٹ پاؤلی کی ٹیم وولفس برگ کے مدمقابل آ رہی ہے۔

رپورٹ : عاطف توقیر

ادارت : امتیاز احمد