جمعے کی شام کھیلے گئے اس میچ میں گلاڈباخ کی فتح سے بنڈس لیگا کی صورت حال مزید غیر یقینی ہو گئی ہے۔ لیگ میں پہلے نمبر پر براجمان بائرن میونخ کی اس شکست کے بعد گلاڈباخ دوسرے نمبر پر آ گئی ہے اور اب وہ بائرن میونخ سے صرف ایک ہی پوائنٹ پیچھے ہے۔

دفاعی چیمپئن بوروسیا ڈورٹمنڈ اور شالکے کی ٹیمیں اپنے اگلے میچ جیت کر بائرن میونخ کے برابر آ سکتی ہیں۔ اس سیزن میں بائرن میونخ کی یہ پانچویں شکست ہے۔

گلاڈباخ کی جانب سے دو گول میچ کے پہلے حصے میں ہی کر دیے گئے تھے۔ ایک گول بیس سالہ پیٹرک ہرمان نے جبکہ دوسرا مارکو روئس نے کیا۔ گلاڈباخ کی جانب سے تیسرا گول میچ کے دوسرے ہاف میں کیا گیا۔ گلاڈ باخ کی ٹیم مجموعی طور پر اس میچ پر حاوی رہی۔ بائرن میونخ کی جانب سے واحد گول شوائن اشٹائگر نے کیا۔

اس سے قبل گلاڈباخ کی ٹیم نے بائرن میونخ کو میونخ میں ایک صفر سے شکست دی تھی۔ جمعے کے میچ میں فتح کے بعد گلاڈباخ نے اب بائرن کے خلاف اپنے دونوں میچ جیت لیے ہیں۔

مجموعی طور پر فیڈرل لیگ میں میونخ کے گول سب سے زیادہ ہیں۔ اس لیے، اس بات سے قطع نظر کہ موجودہ ویک اینڈ پر کون سی ٹیم کس ٹیم پر بازی لے جاتی ہے، بائرن میونخ کی پوزیشن سر فہرست ہی رہے گی۔

بائرن میونخ کے کپتان فلپ لاہم کا کہنا تھا کہ ان کی ٹیم برا نہیں کھیلی تاہم اس کے باوجود انہیں میچ میں شکست ہوئی۔

رپورٹ: شامل شمس ⁄ خبر رساں ادارے

ادارت: مقبول ملک