اس شاندار کامیابی کے باوجود بائرن میونخ اور نمبر وَن ٹیم ڈورٹمنڈ کے درمیان پوائنٹس ٹیبل کا فرق بدستور پانچ ہے۔ اس کی وجہ یہ ہے کہ ہفتے ہی کو ڈورٹمنڈ نے بھی بریمن کے خلاف میچ صفر کے مقابلے میں ایک گول سے جیت لیا۔ یوں یہ ٹیم اپنی سر فہرست کی پوزیشن قدرے مستحکم رکھنے میں کامیاب رہی ہے۔

دوسری جانب بائرن میونخ نے مسلسل تیسرے میچ میں گول در گول کا سلسلہ جاری رکھا۔ تاہم اس مرتبہ یہ ٹیم قبل ازیں کھیلے گئے دو میچز کی طرح مخالف ٹیم کے خلاف سات سات گول کرنے کی بجائے صرف چھ گول کرنے میں کامیاب ہو سکی۔ اس کی اس نوعیت کی کامیابیوں کو ڈروٹمنڈ پر دباؤ کی وجہ بھی قرار دیا جا رہا ہے۔

بریمن کے خلاف کھیلے گئے میچ کا واحد گول ڈورٹمنڈ کے شانجی کاگوا نے کیا اور یوں اپنی ٹیم کی جیت پر مہر ثبت کی۔ کاگوا کے لیے یہ گول یقینی طور پر دہری خوشی سے کم نہ تھا کیونکہ ہفتے کو ہی ان کی تیئسویں سالگرہ بھی تھی۔

ڈورٹمنڈ مسلسل بیسویں میچ میں ناقابلِ شکست رہی ہے جبکہ گزشتہ دس میں سے نو میچز میں جیت اس کے حصے میں آئی ہے۔ اس کے کوچ یرگن کلوپ نے بعد ازاں کہا کہ یہ کٹھن مرحلہ تھا لیکن ان کے کھلاڑی حاوی رہے۔

ہفتے کو پوائنٹس ٹیبل پر تیسرے نمبر کی ٹیم بورسیا موئنشن گلاڈ باخ نے لیور کوزن کو ایک کے مقابلےمیں دو گول سے شکست دی۔ ہیمبرگ کو ہوم گراؤنڈ پر فرائی برگ کے ہاتھوں تین ایک سے شکست ہوئی۔ یوں اسے مسلسل تیسرے میچ میں شکست کا سامنا رہا ہے۔

دیگر میچز میں آؤگس برگ نے مائنز کو ایک دو سے پچھاڑا۔ وولفس برگ نے نیوریمبرگ کو ایک تین سے مات دی۔ قبل ازیں جمعے کو کھیلے گئے چھبیسویں میچ ڈے کے واحد کھیل میں ہوفن ہائیم نے شٹٹ گارٹ کو ایک کے مقابلے میں دو گول سے شکست دی تھی۔

پوائنٹس ٹیبل:

اس ہفتے ابھی تک بنڈس لیگا کے پوائنٹس ٹیبل پر پہلی چھ پوزیشنوں میں کوئی تبدیلی نہیں آئی ہے اور ان پر بالترتیب ڈورٹمنڈ، بائرن میونخ، موئنشن گلاڈ باخ، شالکے، لیور کوزن اور بریمن کی ٹیمیں ہیں۔

رپورٹ: ندیم گِل

ادارت: امجد علی