بنڈس لیگا: دسواں میچ ڈے شروع
3 نومبر 2012![](https://static.dw.com/image/16353020_800.webp)
جمعے کے روز بنڈس لیگا کے رواں سیزن کے دسویں میچ ڈے کے آغاز پر آئنٹراخٹ فرینکفرٹ (Eintracht Frankfurt) اور گروئتھرفیُورتھ (Greuther Fuerth) کے درمیان میچ ایک ایک گول سے برابر رہا۔ میچ شروع ہونے کے پہلے منٹ ہی کے دوران فرینکفرٹ کی ٹیم نے گول کیا۔ حقیقت میں یہ گول پہلے منٹ کے پچیسویں سیکنڈ میں کیا گیا۔ یہ گول الیگزینڈر مائر (Alexander Meier) نے کیا۔ اس گول کے بعد گروئتھر فیورتھ کی ٹیم نے میچ کو برابر کرنے کی جدو جہد شروع کر دی۔ فرینکفرٹ ٹیم کے گول کیپر کیون ٹراپ (Kevin Trapp) نے بلاشبہ غیر معمولی کھیل کا مظاہرہ کرتے ہوئے فیُورتھ کے حملوں کو خاصی ہمت سے روکا۔
گروئتھرفیُورتھ نے پہلا ہاف ایک گول کے خسارے پر کیا۔ دوسرے ہاف کے آٹھویں منٹ میں فیُورتھ کے مسلسل حملوں کے نتیجے میں سولٹان شٹیبر (Zoltan Stieber) نے گول کر کے میچ کو برابر کر دیا۔ میچ کے بقیہ حصے میں دونوں ٹیموں نے دفاعی کھیل پر توجہ دی اور دسویں میچ ڈے کا پہلا میچ ایک ایک گول سے برابر رہا۔
بنڈس لیگا کے پوائنٹس ٹیبل پر دس میچ کھیل کر فرینکفرٹ کی ٹیم تیسرے مقام پر ہے اور اس کے پوائنٹس کی تعداد بیس ہے۔ فیُورتھ کی ٹیم سترہویں پوزیشن پر ہے اور اگر یہی پوزیشن رہی تو اُسے انجام کار تنزلی کا سامنا ہو سکتا ہے۔
بنڈس لیگا کے دسویں میچ ڈے کے دوسرے روز یعنی ہفتے کو چھ میچ کھیلے جائیں گے۔ کل اتوار کے روز دو مزید میچوں کی تکمیل پر بنڈس لیگا کا دسواں میچ ڈے اپنی منزل کو پہنچ جائے گا۔ جرمن بنڈس لیگا کا اگلا میچ ڈے نو نومبر سے شروع ہو گا۔ ہفتے کے روز دفاعی چیمپئن ڈورٹمنڈ اپنا میچ اشٹٹ گارٹ کے خلاف کھیل رہی ہے۔ رواں سیزن کی ٹاپ ٹیم بائرن میونخ اپنا میچ کھیلنے ہیمبرگ پہنچی ہوئی ہے۔
بنڈس لیگا کا پہلا حصہ وسط دسمبر میں مکمل ہو گا۔ اس لحاظ پہلے ہاف سے قبل سات میچ ڈیز رہ گئے ہیں۔ پہلے ہاف کی ٹاپ ٹیم کو موسم خزاں کی چیمپئن قرار دیا جاتا ہے۔ ابھی تک بائرن میونخ کی ٹیم گولڈن جوبلی سیزن کو جیتنے کی جانب گامزن ہے۔ نو میچ کھیل کر اس کے کُل پوائنٹس کی تعداد چوبیس ہے۔ دوسری پوزیشن پر شالکے کلب ہے اور اس کے پوائنٹس کی تعداد بیس ہے۔ ابتدائی میچ ڈیز کے دوران دفاعی چیمپئن ڈورٹمنڈ کی پوزیشن نیچے چلی گئی تھی مگر اب وہ سنبھلنے کے عمل سے گزر رہی ہے اور چو تھے مقام پر فائز ہے۔ اس کے پوائنٹس کی تعداد پندرہ ہے۔ دسویں میچ ڈے کے مکمل ہونے پر غیر متوقع نتائج کے باوجود پوزیشنوں میں تبدیلی کا کوئی امکان موجود نہیں ہے۔
(ah / ia (AP, DW