سولہواں میچ ڈے شروع تو ہو گیا لیکن ہوفن ہائم کلب کے لیے کوئی اچھی خبر نہیں ہے۔ اس بار بھی ماضی کے اس مشہور کلب کو ہیمبرگ سے صفر دو سے شکست کا سامنا رہا۔ ہوفن ہائم کی یہ مسلسل پانچویں شکست ہے۔ پہلے ہی یہ ٹیم بنڈس لیگا کے انتہائی نچلے مقام پر موجود ہے اور اس نئی شکست نے اس کے لیے بنڈس لیگا کے درجہ اول کی لیگ میں جگہ بنانا مشکل کر دیا ہے۔ اب تک کھیلے گئے سولہ میچوں میں ہوفن ہائم کے خلاف 38 گول ہو چکے ہیں۔

ابھی مزید اٹھارہ میچ ڈیز باقی ہیں اور ہوفن ہائم کی ٹیم ہمت کرے تو مزید مشکلات سے بچ سکتی ہے۔ پوائنٹس ٹیبل پر ہوفن ہائم کی پوزیشن سولہویں ہے اور اس کے پوائنٹس کی تعداد بارہ ہے۔ یہ پوائنٹس اس نے سولہ میچ کھیل کر حاصل کیے ہیں۔ ان سولہ میچوں میں ہوفن ہائم کو دس بار شکست کھانا پڑی، تین میچ برابر رہے جبکہ یہ تین ہی جیتنے میں کامیاب رہی۔

ہوفن ہائم کلب کی انتظامیہ نے ٹیم کی قسمت بدلنے کے لیے کوچ مارکوس بابل (Markus Babbel) کو فارغ کرتے ہوئے ایک نئے کوچ فرینک کرامر (Frank Kramer) کو یہ ذمہ داری عبوری طور پر سونپ دی ہے۔کوچ ضرور بدلا گیا ہے لیکن ہوفن ہائم پر ابھی تک قسمت کی دیوی مہربان نہیں ہوئی ہے۔ کوچ بابل کو پیر کے روز ہوفن ہائم کلب سے فارغ کیا گیا تھا۔ وہ گزشتہ نو ماہ سے کوچنگ کے فرائض انجام دے رہے تھے۔

جمعے کے روز ہوفن ہائم کا سامنا ہیمبرگ کی ٹیم سے تھا۔ اس میں ہوفن ہائیم کی ٹیم کوئی بھی گول کرنے سے قاصر رہی۔ جواباً ہیمبرگ کی ٹیم دو گول کر کے میچ میں فتح مند رہی۔ دونوں گول براعظم یورپ کے بالٹک خطے کے ملک لَٹوِیا سے تعلق رکھنے والے فارورڈ کھلاڑی Artjoms Rudnevs نے کیے۔ پہلا گول میچ کے 27 ویں منٹ میں ہوا اور دوسرا 74 ویں منٹ میں کیا گیا۔

آج بروز ہفتہ بنڈس لیگا کے سولہویں میچ ڈے کے دوسرے دن چھ میچ کھیلے جائیں گے۔ دو میچ کل اتوار کے روز شیڈیول ہیں۔ ان میچوں میں دفاعی چیمپئن ڈورٹمنڈ کا میچ وولفس برگ سے ہو گا جبکہ لیگ ٹیبل کی ٹاپ ٹیم بائرن میونخ کو آؤگس بُرگ کے خلاف نبرد آزما ہونا ہے۔

بنڈس لیگا کے پہلے حصے کا آخری میچ ڈے آئندہ اتوار یعنی چودہ دسمبر سے شروع ہو گا۔ پہلے حصے کی چیمپئن کو موسم خزاں کی چیمپئن قرار دیا جاتا ہے اور یہ اعزاز ایک طرح سے بائرن میونخ کو حاصل ہو چکا ہے کیونکہ اگلے اتوار تک کوئی ٹیم پوائنٹس ٹیبل پر اِسے پیچھے نہیں ہٹا سکتی۔

(ah / ab (Reuters