یوں بائرن میونخ کی جرمن فٹ بال لیگ یا بنڈس لیگا میں برتری خطرے میں پڑ گئی ہے۔ گو کہ گول اوسط کی وجہ سے وہ اب بھی لیگ لیڈر ہے، تاہم شالکے نے ہفتے کو اشٹٹ گارٹ کی ٹیم کو ہرا کر میونخ کے لیے شدید خطرہ پیدا کر دیا ہے۔

شالکے کے کوچ ہوب اشٹیفنزکا کہنا ہے کہ ان کی ٹیم کو حقیقت پسند طرز عمل اختیار کرنا چاہیے۔ ’’ہمیں ٹرافی کے بارے میں نہیں سوچا چاہیے۔ اس سے معاملہ صرف خراب ہی ہو سکتا ہے۔ بائرن اب بھی لیگ جیتنے کی امیدوار ٹیموں میں پہلے نمبر پر ہے۔‘‘

دوسری طرف فرائی برگ کی ٹیم نے آؤگسبرگ کو ایک صفر سے ہرا دیا ہے۔ فرائی برگ کی جانب سے واحد گول میچ کے 88 ویں منٹ میں 18 سالہ ماتھیاس گنٹر نے کیا، جن کا یہ پہلا میچ تھا۔

نیورمبرگ نے ہیرتھا برلن کو دو صفر سے ہرا کر پوائنٹس ٹیبل پر اپنی پوزیشن بہتر کر لی ہے۔ ہفتے کو کھیلے گئے ایک اور میچ میں ہوفن ہائم اور ہینوور کا میچ برابر رہا۔ وولفسبرگ نے کولون کو ایک صفر سے ہرا دیا۔ وولفسبرگ کی طرف سے سباستیان پولٹر نے میچ کے 78 ویں منٹ میں گول کر کے اپنی ٹیم کو سبقت دلا دی جو میچ کے اختتام تک برقرار رہی۔

ہفتے ہی کی شام کھیلا جانے والا کائزرز لاؤٹرن کی ٹیم کا بریمن کے ساتھ میچ برابر رہا۔

رپورٹ: شامل شمس ⁄ خبر رساں ادارے

ادارت: مقبول ملک