ہوفن ہائم کے خلاف میچ میں فرینکفرٹ کی ٹیم نے گو کہ اپنی بہترین کارکردگی نہیں دکھائی تاہم ہوفن ہائم کی چند غلطیوں کے باعث یہ میچ فرینکفرٹ جیت کر چوتھی پوزیشن پر براجمان رہا۔

فرینکفرٹ کی ٹیم کی جانب سے پہلا گول چونتیسویں منٹ میں تاکاشی انوئی نے کیا۔ میچ کے دوسرے ہاف میں فرینکفرٹ کی ٹیم خاصی کمزور دکھائی دی اور میچ کے تریسٹھویں منٹ میں ہوفن ہائم کے کھلاڑی کیوین فولانڈ نے گول کر کے میچ برابر کر دیا۔

میچ زیادہ دیر برابر نہ رہ سکا اور دو منٹ بعد ہی ہوفن ہائم کی غلطی کا فائدہ اٹھاتے ہوئے اشٹیفان آئگنر نے ایک کارنر پر گول کر کے فرینکفرٹ کو سبقت دلا دی جو میچ کے اختتام تک برقرار رہی۔

اس میچ میں فتح نے فرینکفرٹ کو چیمپئنز لیگ میں کوالیفائی کرنے کی دوڑ میں شامل کر رکھا ہے۔ میچ کے بعد فرینکفرٹ کے اسپورٹس ڈائریکٹر برونو ہوئبنر نے صحافیوں سے بات کرتے ہوئے کہا کہ وہ ’ٹرانسفر پیریئڈ‘ کے اختتام سے قبل ایک اسٹرائیکر سائن کرنے کا ارادہ رکھتے ہیں۔ اس سے یہ امکان ہو چلا ہے کہ فرینکفرٹ کی ٹیم آئندہ دنوں میں زیادہ بہتر کارکردگی دکھا پائے گی۔

ایک دوسرے میچ میں ڈسلڈورف کی ٹیم نے موئنشن گلاڈ باخ کو دو ایک سے شکست دی۔

بنڈس لیگا کے پوائنٹس ٹیبل پر آخری پوزیشن پر براجمان ٹیم گرؤئتھر فؤرتھ نے گو کہ بہادری سے اپنے گول کا دفاع کیا مگر جارحانہ کھیل کے فقدان کے باعث یہ ٹیم مائنز کے خلاف میچ ہار گئی۔ مائنز نے پہلا گول دوسرے ہاف کے آٹھویں منٹ میں کیا۔ یہ گول ایڈم زالائی نے کیا۔ اس کے بارہ منٹ بعد یونس مالی نے گول کر کے مائنز کو دو گولوں کی سبقت دلا دی۔ چھ منٹ بعد ہی زالائی نے اپنا دوسرا اور مائنز کا تیسرا گول کر کے فؤرتھ کی میچ جیتنے کی امیدوں پر پانی پھیر دیا۔ رواں سیزن میں زالائی گیارہ گول کر چکے ہیں۔

جمعے کو بنڈس لیگا میں کھیلے گئے ایک میچ میں ڈورٹمنڈ کی ٹیم نے نیورمبرگ کو تین صفر سے شکست دی۔

آج اتوار کو ہیمبرگ کا مقابلہ بریمین سے اور اشٹٹ گارٹ کا مقابلہ پہلی پوزیشن پر قائم بائرن میونخ کی ٹیم سے ہوگا۔

رپورٹ: جیفرسن چیز (shs)

ادارت: عابد حسین