اتوار کو کھیلے گئے ایک میچ میں بورسیا ڈورٹمنڈ نے ہیمبرگ کو ایک کے مقابلے میں پانچ گول سے شکست دے کر بنڈس لیگا میں پوزیشنوں کی مجموعی صورت حال کو مزید غیر یقینی بنا دیا۔ گزشتہ ہفتے تک بائرن میونخ کی ٹیم سر فہرست تھی اور بظاہر لگتا یہی تھا کہ فیڈرل لیگ میں میونخ کی برتری کو کوئی خطرہ نہیں ہے۔

تاہم ہفتے کے روز شالکے نے اپنا میچ جیت کر خود کو پوائنٹس ٹیبل پر میونخ کے ہم پلہ بنا لیا جبکہ یہی کام اتوار کے روز ڈورٹمنڈ کی ٹیم نے بھی کیا۔ جمعے کے روز بائرن میونخ کی ٹیم مؤنشن گلاڈباخ سے ہار گئی تھی۔ اس کے باوجود گول اوسط کی وجہ سے بائرن میونخ اب بھی لیگ لیڈر ہے۔

ڈورٹمنڈ کے کوچ نے میچ جیتنے کے بعد اپنی ٹیم کی کارکردگی کو سراہا۔ لیگ میں سر فہرست آنے پر کوچ کا کہنا تھا کہ بائرن میونخ اس وقت بھی بہترین ٹیم ہے اور لیگ ٹائٹل جیتنے کے لیے اسی کو فیورٹ سمجھنا چاہیے۔ کچھ یہی بات ہفتے کے روز شالکے کے کوچ نے بھی کہی تھی۔

تاہم فٹ بال کے ماہرین کی رائے ہے کہ جرمن فٹ بال لیگ میں ٹائٹل کی دوڑ اب پیچیدہ ہوتی جا رہی ہے۔ میونخ کو اپنے دیگر میچ جیتنا ہوں گے اور اچھی کارکردگی کا مظاہرہ کرنا ہوگا۔ ان کی رائے میں کوئی بھی غلطی بائرن میونخ کو ناقابل تلافی نقصان پہنچا سکتی ہے۔

اتوار کو کھیلے گئے ایک اور میچ میں بائر لیورکوزن نے مائنز کی ٹیم کو تین دو سے مات دے دی۔

رپورٹ: شامل شمس ⁄  خبر رساں ادارے

ادارت: مقبول ملک