بنڈس لیگا یعنی جرمن فیڈرل فٹ بال لیگ کے پندرہویں میچ ڈے کے پہلے دن لیور کوزن اور ہوفن ہائم کی ٹیمیں مد مقابل تھیں۔ اس میچ میں لیورکوزن نے عمدہ کھیل کا مظاہرہ کیا اور دسویں منٹ میں ایک گول کی برتری حاصل کر لی۔ لیورکوزن کی طرف سے یہ گول Eren Derdiyok نے کیا۔ انہوں نے گزشتہ میچ ڈے کے دوران برلن کے خلاف کھیلے گئے میچ میں ہیٹ ٹرک کرنے کا اعزاز حاصل کیا تھا۔ اس میچ کا دوسرا گول سڈنی سام نے کیا۔

لیور کوزن نے یہ میچ جیت کر پوائنٹس ٹیبل پر چھٹی پوزیشن حاصل کر لی ہے۔ اس کے مجموعی پوائنٹس 25 بنتے ہیں جبکہ ہوفن ہائم کی ٹیم اس میچ میں شکست کے بعد اٹھارہ پوائنٹس کے ساتھ دسویں نمبر پر ہے۔

بنڈس لیگا کے پندرہویں میچ ڈےکے دوسرے روز یعنی آج ہفتہ کو چھ اور تیسرے روز اتوار کو دو میچ کھیلے جائیں گے۔ ہفتہ کے دن پوائنٹس ٹیبل پر ٹاپ کی دو ٹیمیں مد مقابل ہوں گی۔ اگرچہ ڈورٹمنڈ اور مؤنشن گلاڈ باخ دونوں کے ہی انتیس انتیس پوائنٹس ہیں تاہم ڈورٹمنڈ اچھی گول اوسط کے باعث پہلے نمبر پر ہے۔ ان دونوں کے مابین ہونے والے میچ کو انتہائی اہم خیال کیا جا رہا ہے۔

ہفتہ کو ایک اور دلچسپ میچ میں میونخ اور ویردر بریمن کی ٹیمیں ایک دوسرے کے آمنے سامنے ہوں گی۔ بنڈس لیگا کے پوائنٹس ٹیبل پر یہ دونوں ٹیمیں بالترتیب تیسرے اور چوتھے نمبر پر ہیں۔ میونخ کے اٹھائیس جبکہ ویردر بریمن کے چھبیس پوائنٹس ہیں۔

ہفتہ کو کھیلے جا رہے دیگر میچوں میں کائزرز لاؤٹرن اور برلن، وولفسبرگ اور مائنز جبکہ اشٹٹ گارٹ اور کولون کی ٹیمیں آمنے سامنے ہوں گی۔ پندرہویں میچ ڈے کے تیسرے اور آخری روز کھیلے جانے والے دو میچوں میں ہیمبرگ کا مقابلہ نیورمبرگ سے ہو گا جبکہ شالکے اور آؤگسبرگ کی ٹیمیں ایک دوسرے کے خلاف میدان میں اتریں گی۔

رپورٹ: عاطف بلوچ

ادارت: مقبول ملک