جرمنی کے تاریخ ساز فٹ بال کلب بائرن میونخ کا بنڈس لیگا میں پہلا میچ گروئتھرفوئرتھ (Greuther Fuerth) کے ساتھ تھا۔ بائرن میونخ نے یہ میچ تین گول سے جیت لیا۔ درجہ دوم سے کوالیفائی کرنے والی ٹیم کی جانب سے کوئی گول نہیں کیا جا سکا۔ گروئتھرفوئرتھ کی ٹیم انچاس برسوں کے بعد بنڈس لیگا کے درجہ اول میں کھیل رہی ہے۔ فوئرتھ نے سن 1962 میں بنڈس لیگا میں آخری بار شرکت کی تھی۔ بائرن میونخ کی جانب سے کوسووو کے البانوی نژاد سوئس فٹ بالر جردان شاچیری (Xherdan Shaqiri) اور کروشیا کے فٹ بالر ماریو مانذُوکِچ (Mario Mandzukic) نے شاندا کھیل کا مظاہرہ کیا۔

وولفس برگ کی ٹیم اور اشٹٹ گارٹ کے درمیان میچ برابر جا رہا تھا لیکن میچ کے آخری منٹ میں وولفس برگ کی جانب سے گول نے میچ کا پانسہ پلٹ دیا۔ برابری پر ختم ہونے کی صورت میں اشٹٹ گارٹ کی ٹیم کو جوایک پوائنٹ ملنا تھا وہ اُس سے بھی محروم ہو گئی۔ اشٹٹ گارٹ کی ٹیم اسی میچ کے دوران ایک پنیلٹی کک پر بھی گول کرنے سے بھی قاصر رہی۔ اس کے علاوہ میچ شروع ہونے کے دو منٹ بعد ہی کھلے گول کا موقع بھی ضائع کیا گیا۔ گول کرنے کے دونوں موقع بوسنیا سے تعلق رکھنے والے فٹ بالر وداد ایبیسیوچ (Vedad Ibisevic) نے ضائع کیے۔

موئنشن گلاڈ باخ کی ٹیم کو چیمپئنز لیگ کے لیے کوالیفائی میچ میں یوکرائن کے فٹ بال کلب ڈائنموکییف سے شکست کے بعد اندازہ لگایا گیا تھا کہ وہ بنڈس لیگا میں کم مورال کے ساتھ شریک ہو گی مگر اس نے بہتر کھیل پیش کیا۔ موئنشن گلاڈ باخ نے ہوفن ہائم کی ٹیم کو شکست دے کر تین قیمتی پوائنٹس حاصل کر لیے ہیں۔ اس میچ میں وینزویلا سے تعلق رکھنے والے کھلاڑی ژوان ارانگو(Juan Arango) کی شاندار پرفارمنس تھی۔ ارانگو وینز ویلا کی ٹیم کے کپتان بھی ہیں۔

درجہ دوم سے کوالیفائی کرنے والی ایک اور ٹیم ڈُوسلڈورف کی ہے۔ اس نے بنڈس لیگا کے پہلے میچ ڈے میں آؤگس بُرگ کی ٹیم کو دو گول سے ہرایا۔ ایک اور میچ میں ہیمبرگ کی ٹیم کو نیورمبرگ کے ساتھ میچ میں شکست کا سامنا رہا۔ نیورمبرگ کی ٹیم دو گول سے یہ میچ جیت گئی۔ لیورکوزن اور آئنٹراخٹ فرینکفرٹ کے درمیان میچ بھی زوردار رہا۔ لیورکوزن کی ٹیم انجام کار جیتنے میں کامیاب رہی۔ بنڈس لیگا کے پہلے میچ ڈے میں ایک میچ رہ گیا ہے اور وہ آج اتوار کے روز شالکے اور ہینوور کے درمیان کھیلا جائے گا۔

(ah/at (dpa, Reuters