بنڈس لیگا کا رواں سیزن، ڈورٹمنڈ تاحال ناقابل شکست
2 ستمبر 2013![](https://static.dw.com/image/17059105_800.webp)
فیڈرل جرمن فٹ بال لیگ بنڈس لیگا کے چوتھے میچ ڈے کے سلسلے میں اتوار کو ہوئے ایک دلچسپ مقابلے میں فرینکفرٹ کو شکست سے دوچار کرتے ہوئے ڈورٹمنڈ کی ٹیم اپنی فتوحات کا تسلسل قائم رکھنے میں کامیاب ہو گئی۔ ڈورٹمنڈ کی طرف سے دونوں گول ہینرک میکا ٹارین نے کیے جبکہ فرینکفرٹ کی طرف سے واحد گول واسلاف کڈلیس نے کیا۔
27.5 ملین یورو کی ڈیل کے تحت ڈورٹمنڈ کی ٹیم کا رکن بننے والے میکا ٹارین نے میچ کے بعد اپنی خوشی کا اظہار کرتے ہوئے کہا، ’’میں ڈورٹمنڈ کی ٹیم کا حصہ بننے پر بہت اچھا محسوس کر رہا ہوں۔ مجھے بہت خوشی ہے کہ میں نے اپنی نئی ٹیم کے لیے پہلا گول کیا۔‘‘ انہوں نے مزید کہا کہ یہ اور زیادہ اچھی بات ہے کہ وہ دوسرا گول کرنے میں بھی کامیاب ہو گئے۔
ڈورٹمنڈ کے کوچ ژُرگن کلاپ نے کہا، ’’اس میں کوئی شک نہیں کہ ہم نے اچھے کھیل کا مظاہرہ کیا۔‘‘ کلاپ نے مزید کہا کہ البتہ انہوں نے ٹیم کے دفاع میں کچھ خامیاں نوٹ کی ہیں، جنہیں دور کرنے کی ضرورت ہے۔ ڈورٹمنڈ نے رواں سیزن کے دوران اپنے اب تک کے چاروں میچوں میں کامیابی حاصل کرنے کے بعد مجموعی طور پر بارہ پوائنٹس حاصل کر لیے ہیں۔
جمعرات کے دن دفاعی چیمپئن بائرن میونخ اور فرائی برگ کے مابین کھیلا گیا میچ ایک ایک گول سے برابر ہو گیا تھا، جس کے نتیجے میں میونخ چار میں سے تین میچوں میں فتحیاب رہنے کے بعد پوائنٹس ٹیبل پر اب دوسری پوزیشن پر ہے۔ اس کے پوائنٹس کی تعداد دس بنتی ہے۔
بنڈس لیگا کے چوتھے میچ ڈے کے آخری روز اتوار کو کھیلے گئے ایک اور میچ میں اشٹٹ گارٹ نے بھی کامیابی حاصل کر لی۔ اس میچ میں ویدد آبیزاوِچ نے ہیٹ ٹرک کرنے کا اعزاز حاصل کیا۔ اشٹٹ گارٹ کے نئے کوچ تھوماس شنائڈر کے لیے بنڈس لیگا کے اس سیزن میں یہ پہلی کامیابی تھی۔ انہوں نے بعد ازاں کہا، ’’کھلاڑیوں نے ٹٰیم پلان پر بہت عمدہ طریقے سے عمل کیا۔ ابتدائی تین میچوں میں مسلسل ناکامی کے بعد اششٹ گارٹ کے کوچ برونو لابادیا کو برطرف کر دیا گیا تھا، جس کے بعد شنائڈر نے پیر کے دن ہی اس کلب کی کوچنگ سنبھالی تھی۔
چوتھے میچ ڈے کے دوسرے روز ہفتے کو مجموعی طور پر چھ میچ کھیلے گئے تھے۔ ان میں مؤنشن گلاڈ باخ نے بریمن کو ایک چار، ہینوور نے بھی مائنز کو ایک چار، وولفسبرگ نے برلن کو صفر دو، آؤگسبرگ نے نیورمبرگ کو ایک صفر جب کہ شالکے نے لیور کوزن کو صفر دو سے مات دی تھی۔