یہ میچ بنڈس لیگا کے تیرہویں میچ ڈے کے تیسرے اور آخری دن یعنی بیس نومبر کو کھیلا جانا تھا۔ تاہم اس میچ کے ریفری کی طرف سے کھیل کے آغاز سے قبل خودکشی کی کوشش کے بعد اس میچ کو مؤخر کر دیا گیا تھا۔ تاخیر کے بعد منگل کو کھیلے گئے اس میچ میں کولون اور مائنز کی ٹیموں نے ایک ایک گول کیا اور یوں یہ میچ برابر ہو گیا۔

پوائنٹس ٹیبل پر دسویں نمبر پر براجمان کولون کی ٹیم اس میچ میں فیورٹ خیال کی جا رہی تھی تاہم لیگ ٹیبل پر بارہویں نمبر کی ٹیم مائنز نے اسے کڑا وقت دیا۔ پہلے ہاف میں دونوں ٹیموں نے گول کرنے کی بھرپور کوشش کی تاہم کوئی بھی اس میں کامیاب نہ ہوسکا۔

کولون کے اسٹیڈیم میں کھیلے گئے اس میچ کا پہلا گول مہمان ٹیم نے 70ویں منٹ میں کیا۔ کولون کے گول کیپر Michael Rensing ، مائنز کے اسٹرائیکر Sami Allagui کی طرف سے کیے گئے اس عمدہ گول کو نہ روک سکے۔ اس گول کے بعد کولون کی نمائندگی کرنے والے جرمن قومی فٹ بال ٹیم کے اسٹار کھلاڑی لوکاس پوڈولسکی حرکت میں دیکھے گئے اور انہوں نے مائنز کے گول پر حملے کرنا شروع کر دیے تاہم مائنز کے گول کیپر کرسٹیان ویٹکلو نے عمدہ گول کیپنگ کا مظاہرہ کیا اور لوکاس پوڈولسکی کا راستہ روکے رکھا۔

تاہم جب کھیل ختم ہونے میں صرف پانچ منٹ رہ گئے تو لوکاس پوڈولسکی نے مائنز کے گول پر ایک اور حملہ کیا اور اس بار کوئی بھی اس شاٹ کو نہ روک سکا اور فٹ بال سیدھا گول پوسٹ میں داخل ہو گیا۔ بنڈس لیگا کے رواں سیزن میں پوڈولسکی کا یہ 14 واں انفرادی گول تھا۔ پوڈولسکی نے اس سیزن میں پندرہ میچ کھیلے ہیں۔

اس میچ کے برابر ہونے کے بعد کولون کے مجموعی پوائنٹس اکیس ہو گئے ہیں جبکہ مائنز کےاٹھارہ۔ بنڈس لیگا کے سولہ میچ ڈے مکمل ہو چکے ہیں۔ ابھی تک بائرن میونخ چونتیس پوائنٹس کے ساتھ لیگ ٹیبل پر پہلے نمبر پر براجمان ہے۔ دفاعی چیمپیئن ڈورٹمنڈ اور شالکے کی ٹیموں کے پوائنٹس اکتیس اکتیس ہیں تاہم اچھی گول اوسط کی بنیاد پر ڈورٹمنڈ کی ٹیم دوسرے نمبر پر ہے۔

رپورٹ: عاطف بلوچ

ادارت: ندیم گِل