اپنے موجودہ دورہ پاکستان کے دوران بنگلہ دیشی ٹیم نے میزبان ملک کی قومی کرکٹ ٹیم کے خلاف دو ٹیسٹ میچ کھیلے۔ پہلے ٹیسٹ میچ میں، جو راولپنڈی ہی میں کھیلا گیا تھا، مہمان ٹیم نے پاکستان کو دس وکٹوں سے ہرا کر شاندار کامیابی حاصل کی تھی۔

راولپنڈی ہی میں کھیلے گئے اور آج ختم ہونے والے دوسرے ٹیسٹ میچ کے پانچویں اور آخری روز مہمان ٹیم نے میزبان ٹیم کو چھ وکٹوں سے ہرا یہ سیریز بھی دو صفر سے جیت لی۔

’پاکستان کی کرکٹ ختم ہو گئی‘

اس سیریز کی خاص بات یہ رہی کہ اس میں بنگلہ دیشی ٹیم نے دونوں ہی میچوں میں نئے ریکارڈ قائم کر دیے۔ پہلے میچ کا نتیجہ یہ تھا کہ بنگلہ دیش نے پاکستان کو پہلی بار کسی ٹیسٹ میچ میں ہرایا تھا۔ دوسرے میچ کا نتیجہ یہ نکلا کہ مہمان ٹیم نے بنگلہ دیشی کرکٹ کی تاریخ میں پہلی بار نہ صرف پاکستان کے خلاف کوئی ٹیسٹ سیریز جیتی بلکہ نتیجہ دو صفر رہنے کے ساتھ یہ سیریز سویپ بھی کر لی۔

دوسرے ٹیسٹ میچ کا اسکور

دوسرے ٹیسٹ میچ میں پاکستان نے اپنی پہلی اننگز میں 274 رنز بنائے تھے، جن کے جواب میں مہمان ٹیم کا پہلی اننگز کا اسکور 262 رہا تھا۔ پھر اپنی دوسری اننگز میں پاکستانی ٹیم محض 172 رنز بنا سکی تھی اور بنگلہ دیش کو جیت کے لیے 185 رنز کا ہدف ملا تھا۔

اس میچ میں پہلے دن کوئی کھیل نہیں ہو سکا تھا، جس کی وجہ بارش رہی تھی۔ کل پیر دو ستمبر کو چوتھے دن کا کھیل جب ختم ہوا تو بنگلہ دیش کا دوسری اننگز میں اسکور بغیر کسی نقصان کے 42 رنز تھا۔

اس کے بعد آج آخری دن چائے کے وقفے سے 25 منٹ قبل بنگلہ دیش نے مجموعی طور پر صرف چار وکٹوں کے نقصان پر 185 رنز بنا لیے اور ٹیسٹ کرکٹ میں پاکستان کے خلاف ایک نئی تاریخ رقم کر دی۔

ٹی ٹوئنٹی ورلڈ کپ میں جیت کے بعد بھارتی ٹیم کی ستائش

میچ اور سیریز کے بہترین کھلاڑی

دوسرے ٹیسٹ میچ کا بہترین کھلاڑی بنگلہ دیشی وکٹ کیپر لٹن داس کو قرار دیا گیا۔ انہوں نے پہلی اننگز میں چار چھکوں اور 13 چوکوں کی مدد سے 138 رنز بنائے تھے۔ دوسری اننگز میں مہمان ٹیم نے ان کے ساتویں نمبر پر کریز پر آنے سے پہلے ہی میچ جیت لیا۔

اس سیریز کا بہترین کھلاڑی بنگلہ دیشی آل راؤنڈر مہدی حسن میراز کو قرار دیا گیا۔ انہوں نے دونوں میچوں میں مجموعی طور پر 155 رنز بنائے اور 10 وکٹیں بھی حاصل کیں۔

اس سیریز کے بعد آئی سی سی کی ٹیسٹ چیمپئن شپ کے لیے پوائنٹس ٹیبل پر بھارت اب بھی پہلے نمبر پر ہی ہے اور بنگلہ دیش چوتھے نمبر پر آ گیا ہے جبکہ پاکستان نو ممالک کی اس فہرست میں اب آٹھویں نمبر پر اور صرف ویسٹ انڈیز سے اوپر ہے۔

م م / ا ا (روئٹرز، اے ایف پی)