اتوار دس مارچ کو ایتھوپین ہوائی کمپنی  کا جو ہوائی جہاز تباہی سے دوچار ہوا، وہ بوئنگ 737 میکس 8 طرز کا مسافر بردار طیارہ تھا۔ گزشتہ برس اکتوبر میں انڈونیشی ہوائی کمپنی لائن ایئر کا تباہ ہونے والا ہوائی جہاز ملکی دارالحکومت جکارتہ سے پرواز کے تھوڑی ہی دیر بعد تباہ ہو گیا تھا۔ یہ بھی بوئنگ 737 میکس ایٹ ماڈل کا طیارہ تھا۔ اس ہوائی جہاز پر 189 افراد سوار تھے جب کہ افریقی ملک ایتھوپیا کے تباہ ہونے والے طیارے پر 159 مسافر سوار تھے۔

ان دونوں حادثوں کے بعد بوئنگ 737 میکس ایٹ کے ماڈل کے حوالے سے تشویش کی لہر پیدا ہو گئی ہے۔ اس نئے طیارے کو امریکی طیارہ ساز کمپنی بوئنگ نے صرف دو برس قبل ہی متعارف کرایا تھا۔ میکس ایٹ کو بوئنگ کمپنی کا ایک انتہائی کامیاب طیارہ خیال کیا جاتا ہے۔ یہ دو انجنوں والا ہوائی جہاز ہے۔ اس طیارے کو میکس سیریز کا سب سے پائیدار طیارہ قرار دیا گیا تھا۔ اس میں 138 سے لے کر 204 مسافر سوار ہو سکتے ہیں اور یہ درمیانی مسافت کے لیے خاص طور پر تیار کیا گیا تھا۔

اب تک بوئنگ کمپنی میکس ایٹ قسم کے ساڑھے تین سو ہوائی جہاز فروخت کر چکی ہے۔ اس کی سب سے پہلی فراہمی ملائیشین ہوائی کمپنی کو سن 2017 میں کی گئی تھی۔ ایتھوپین ایئر لائن کا میکس ایٹ طیارہ پرواز کے چھ منٹ بعد ادیس آبابا سے پچاس کلومیٹر کی مسافت پر گر کر تباہ ہو گیا۔ پرواز کے فوری بعد پائلٹ نے کنٹرول روم کو مطلع کیا تھا کہ اُسے طیارے کو کنٹرول کرنے میں مشکلات کا سامنا ہے اور وہ واپس آنا چاہتا ہے۔ نیوز ایجنسی اے ایف پی نے عینی شاہدین کے حوالے سے رپورٹ کیا تھا کہ طیارہ لوٹنے سے قبل ہی اس ميں آگ لگ چکی تھی۔

لائن ایئر کا بوئنگ 737 میکس ایٹ پرواز کے بارہ منٹ بعد بحیرہ جاوا میں گر گیا تھا۔ اس طیارے کی تباہی سے قبل پائلٹ نے واپس لوٹنے کے لیے کنٹرول روم کو بتایا تھا۔ اس اطلاع کے دو ہی منٹ بعد ہوائی جہاز سمندر میں گر گیا۔

ان حادثات کے بعد بوئنگ کمپنی نے میکس ایٹ قسم کے طیاروں کی آزمائشی پروازوں کا سلسلہ روک دیا ہے۔ اس سلسلے میں کمپنی کے مطابق طیارے کے انجن میں پیدا ہونے والی ممکنہ خرابی کو بظاہر رفع کر دیا گیا ہے۔ لائن ایئر کی پرواز کی تباہی کے سلسلے میں جاری تفتیش میں بوئنگ کمپنی کی ٹیم شامل ہے۔ ادھر امریکا میں کم از کم دو ہوائی کمپنی کے پائلٹوں نے میکس ایٹ طیارے کے انجن میں پائی جانے والی خرابی پر احتجاج کیا ہے۔