قریب 50 ملین کی آبادی والے ملک کولمبیا کے دارالحکومت بوگوٹا سے بدھ 22 اپریل کو ملنے والی نیوز ایجنسی اے ایف پی کی رپورٹوں کے مطابق اٹارنی جنرل کے دفتر کی طرف سے بتایا گیا کہ بچوں سے جنسی زیادتیوں کے مرتکب افراد کے خلاف ملک کے مختلف شہروں اور قصبوں میں مارے جانے والے ان چھاپوں کے دوران مجموعی طور پر 298 ملزمان کو حراست میں لیا گیا۔

ریاستی دفتر استغاثہ کے اہلکاروں نے منگل کی رات اے ایف پی کو بتایا کہ بیس اور اکیس اپریل کے روز مارے جانے والے ان چھاپوں کے دوران 21 اپریل کی رات تک قریب تین سو ملزمان کو گرفتار کیا جا چکا تھا جبکہ مجموعی طور پر 1180 ملزمان کے خلاف وارنٹ گرفتاری جاری کیے گئے تھے۔

حکام نے کولمبیا میں بچوں سے جنسی زیادتی کے واقعات سے متعلق تازہ ترین اعداد و شمار جاری کرتے ہوئے کہا کہ سال رواں کےدوران اب تک ملک میں جنسی زیادتی کے 11 ہزار 729 واقعات سے متعلق مقدمات درج کیے جا چکے ہیں اور ان جرائم کا نشانہ بننے والے نابالغ افراد کی تعداد 12 ہزار 921 بنتی ہے۔

جنوبی امریکا میں کولمبیا کو بچوں سے جنسی زیادتی کے واقعات کے حوالے سے ایک ’خطرناک‘ ملک سمجھا جاتا ہے اور وہاں اس سال کے دوران اب تک جنسی زیادتی اور جنسی تشدد کے جتنے بھی واقعات رونما ہوئے، ان میں سے زیادہ تر کا نشانہ ایسے بچے بنے جن کی عمریں 14 سال سے کم تھیں۔

اقوام متحدہ کے بچوں کے امدادی ادارے یونیسیف نے بھی ابھی حال ہی میں اپنی ایک تازہ ترین رپورٹ میں کہا تھا کہ کولمبیا میں جنسی زیادتی کے جتنے بھی واقعات کی سرکاری سطح پر چھان بین کی جاتی ہے، ان میں سے 86 فیصد جرائم میں ایسے حملوں کا نشانہ بننے والے افراد نابالغ لڑکے اور لڑکیاں ہوتے ہیں۔