امریکا کی اولین ایک ٹریلین ڈالر مالیاتی قدر والی کمپنی بننے کے محض ایک سال بعد ہی ایپل نے ایک اور چوٹی سر کر لی ہے۔ آئی فون بنانے والی ایپل کمپنی امریکا کی پہلی ایسی پبلک کمپنی بن گئی ہے جس نے دو ٹریلین یا دو کھرب کی مالیاتی قدر کا سنگ میل عبور کر لیا ہے۔ کورونا وائرس کی وبا کے دوران باہمی رابطوں کے لیے لوگوں نے ایپل کی مصنوعات کی خریداری بڑے پیمانے پر کی ہے۔

ایپل دنیا کی پہلی ایسی کمپنی نہیں ہے جس نے دو ٹریلین ڈالر کی مالیاتی قدر حاصل کی ہے۔ یہ فخر سعودی کمپنی آرامکو کو حاصل ہے جس نے گزشتہ برس دسمبر میں اپنی پبلک ٹریڈنگ کے دوسرے ہی روز دو کھرب ڈالر کی مالیاتی قدر حاصل کرنے والی اولین کمپنی کا ریکارڈ بنایا تھا۔ تاہم تیل پیدا کرنے والی یہ سعودی کمپنی عالمی سطح پر تیل کی قیمتوں میں کمی کے سبب دنیا کی سب سے زیادہ قدر والی کمپنی کا اعزاز برقرار نہ رکھ سکی۔

توقع ہے کہ جلد دو دیگر امریکی کمپنیاں مائیکروسافٹ اور ایمیزون بھی دو ٹریلین ڈالر کی قدر حاصل کر لیں گی کیونکہ کورونا وبا کے دوران ان کے شیئرز کی قیمتیں بھی تیزی سے بڑھ رہی ہیں۔ مائیکروسافٹ کی مصنوعات گھر سے ہی کام کرنے والے افراد کے لیے مددگار ثابت ہو رہی ہیں تو ساتھ ہی آن لائن شاپنگ کے لیے ایمیزون پر لوگوں کا انحصار بڑھ رہا ہے۔ یہ دونوں کمپنیاں ڈیڑھ ٹریلین ڈالر کی قدر کا سنگ میل عبور کر چکی ہیں۔

ایپل کمپنی کی مالیاتی قدر میں اضافے کا فائدہ اس کے سربراہ ٹِم کُک کو بھی پہنچا ہے۔ بلومبرگ کے مطابق وہ اب ارب پتی افراد کی فہرست میں شامل ہو گئے ہیں۔ کک نے جب 2011ء میں کمپنی کی سربراہی سنبھالی تھی تو اس کی قدر 350 بلین ڈالر تھی۔ اس وقت یہ سوال بھی اٹھا کہ آیا وہ کمپنی کی اختراعات کی روایت کو برقرار رکھ بھی سکیں گے یا نہیں۔ کُک نے اپنی دولت کا زیادہ تر حصہ فلاحی اداروں کو دینے کا اعلان کر رکھا ہے۔

ایپل کمپنی کا آغاز اسٹیو جابز اور ان کے ہائی اسکول کے کلاس فیلو اسٹیو وزنیاک نے 1976ء میں کیا تھا۔ انہوں نے کام کا آغاز اسٹیو جابز خاندان کے گیراج میں کیا اور اسے پہلا کامیاب پرسنل کمپیوٹر بنانے والی کمپنی کا اعزاز ملا۔ اس کے چار سال بعد اسے پبلک کمپنی بنا دیا گیا۔ 1980ء کی دہائی کے آخر تک یہ کمپنی دو بلین ڈالر کی قدر کے ساتھ امریکی کارساز کمپنی فورڈ سے زیادہ مالیاتی قدر والی کمپنی بن چکی تھی۔

اس کے بعد ایپل کا نیا کمپیوٹر میکن ٹوش تھا جس میں گرافیکل انٹرفیس استعمال ہوا۔ مگر ناکافی میموری اور بظاہر ایک کھلونے کی شکل والے اس کمپیوٹر کو زیادہ پذیرائی نہ ملی اور نتیجتاﹰ اسٹیو جابز کو 1985ء میں یہ کمپنی چھوڑنا پڑی۔ 1997ء میں جابز دوبارہ اس کے سربراہ بنے جب ایپل کمپنی دیوالیہ ہونے کے خطرات سے دوچار تھی۔ اس کے بعد ایپل نے صرف کامیابیاں ہی دیکھی ہیں۔

ایپل کی سب سے کامیاب پراڈکٹ ابھی بھی آئی فون ہی ہے۔ سب سے پہلے آئی فون میں میوزک پلیئر، ویب براؤزر اور ای میل کرنے کی صلاحیتوں کو یکجا کر دیا گیا تھا۔ 2007ء میں متعارف کرائے گئے اولین آئی فون نے اپنے تمام حریفوں کو پیچھے چھوڑ دیا۔ ایپل کے لیے آج بھی کمائی کا سب سے بڑا ذریعہ آئی فون ہی ہے۔

اس کا آغاز 1976ء میں اکیس سالہ سٹیو جابز (دائیں جانب) کے والدین کے گیراج سے کیلیفورنیا میں ہوا۔ سٹیو جابز نے اپنے دوستوں سٹیو وسنیاک(بائیں جانب) اور رونالڈ وین کے ساتھ ایپل کمپیوٹر کمپنی کی بنیاد رکھی۔ وین نے گیارہ دن بعد ہی اس کمپنی کا ساتھ چھوڑ دیا۔ انہوں نے اپنا حصہ تئیس سو امریکی ڈالر میں فروخت کیا تھا۔

سب سے پہلی پراڈکٹ کا نام ایپل ون رکھا گیا۔ یہ کمپیوٹر بنیادی طور پر ایک سرکٹ بورڈ، ایک کی بورڈ اور ایک مونیٹر پر مشتمل تھا۔ سی پی یو نما ایک ڈبہ علیحدہ خریدنا پڑتا تھا۔ اس میں ٹیپ ریکارڈر کی تکنیک استعمال کی گئی تھی۔ آوازوں کو محفوظ کیا جا سکتا تھا اور پھر اپ لوڈ بھی۔

1977ء میں ایپل ٹو مارکیٹ میں لایا گیا۔ ایپل ون کے صرف دو سو سیٹ فروخت ہوئے۔ ہر سیٹ کی قیمت 666 امریکی ڈالر تھی۔ یہ آمدنی ناکافی تھی۔ اسی سال ایپل کو ایک کارپوریشن میں تبدیل کر دیا گیا۔ امریکی تاجر مائیک مارکولا نے ڈھائی لاکھ ڈالر کی سرمایہ کاری کی اور کمپنی کے چھبیس فیصد حصص کے مالک بن گئے۔ انیس سو اکیاسی سے انیس سو تریاسی تک وہ کمپنی کے سربراہ رہے۔ اس دوران ایپل ٹو کے دو ملین کمپیوٹر فروخت ہوئے۔

1983ء میں جان سکیلی (دائیں جانب) ایپل کے نئے سربراہ بنے۔ انہوں نے سٹیو جابز(بائیں جانب) کے ساتھ مل کر ماؤس والا پرسنل کمپیوٹر ’لیزا‘ پیش کیا۔ 1985ء میں دونوں کے مابین اختلافات پیدا ہوئے۔ جابز نے کمپنی چھوڑ دی اور نئی کمپیوٹر کمپنی نیکسٹ (NeXT) کی بنیاد رکھی۔

اسّی کی دہائی کے اواخر میں پہلا پورٹیبل کمپیوٹر پیش کیا گیا۔ 1990ء میں حریف کمپنی مائیکروسافٹ کی وجہ سے ایپل شدید دباؤ کا شکار ہو گئی۔ 1993ء میں ایپل کمپنی خسارے میں چلی گئی اور جان سکیلی کو جانا پڑا۔ 1996ء میں ایک بہتر آپریٹنگ سسٹم کی تلاش میں ایپل نے چار سو ملین کے عوض نیکسٹ کو خرید لیا۔ اس طرح سٹیو جابز کی واپسی ہوئی اور ایک سال بعد وہ ایپل کے سربراہ بن گئے۔

1998ء میں ایپل نے نئے ڈیزائن کے ساتھ آئی میک لانچ کر دیا۔ ایپل کی اس کامیاب کمرشل واپسی نے مارکیٹ میں ایک ہلچل پیدا کر دی تھی۔ میک سے پہلے ’آئی‘ کا مطلب ’انٹرنیٹ، انفرادی، انفارم اور انسپائر پیش کیا گیا۔ یہ ایپل کی متعدد مصنوعات کی شناخت بنا۔

2001ء میں جان روبن سٹائن نے ایپل کے سی ای او جابز کو ایک اعشاریہ آٹھ انچ کی ڈسک کے ساتھ ایک ایم پی تھری پلیئر کا خیال پیش کیا۔ جابز نے فوری طور پر گرین سگنل دے دیا۔ اس کے بعد آئی پوڈ وجود میں آیا اور پھر آئی ٹیونز میوزک اسٹور۔ دیکھتے ہی دیکھتے یہ مصنوعات مارکیٹ پر چھا گئیں۔

2007ء میں ایپل نے آئی فون اور ایپل ٹی وی لانچ کر دیا۔ ایپل کپمنی پرسنل کمپیوٹرز کی مارکیٹ سے کہیں آگے جانا چاہتی تھی، یوں ’ایپل کمپیوٹر‘ کو ’ایپل انک‘ یعنی ایپل انکارپوریٹڈ کا نام دے دیا گیا۔ ٹچ سکرین والا فون دھماکہ خیز ثابت ہوا۔ 2015ء تک دنیا بھر میں 900 ملین آئی فون فروخت کیے جا چکے تھے۔

2010ء میں سٹیو جابز نے اپنی کمپنی کی تازہ ترین ایجاد آئی پیڈ مارکیٹ میں پیش کی۔ ایک برس بعد طبی مسائل کی وجہ سے جابز نے اپنے عہدے سے استعفیٰ دے دیا۔ ٹِم کُک نئے سربراہ بنے۔ پانچ اکتوبر 2011ء کو کینسر کی وجہ سے سٹیو جابز وفات پا گئے۔

2011ء سے ایپل اور سام سنگ کے مابین رسہ کشی جاری ہے۔ ایپل کا الزام ہے کہ جنوبی کوریا کی کمپنی سام سنگ نے ان کی ٹیکنالوجی چرائی ہے۔ دونوں کے مابین عالمی سطح پر حقوق کی ملکیت کی جنگ جاری ہے۔ امریکا میں بدستور جاری مقدموں کو چھوڑ کر باقی زیادہ تر مقدمے اپنے اختتام کو پہنچ چکے ہیں۔

2014ء میں ایپل کی مارکیٹ ویلیو 700 ارب ڈالر سے بھی تجاوز کر گئی تھی۔ اس حد کو عبور کرنے والی یہ دنیا کی واحد کمپنی تھی۔ ایک سال بعد ایپل واچ لانچ کرنے کی وجہ سے بھی یہ کپمنی سرفہرست رہی۔

2016ء کا آغاز ایپل کے لیے زیادہ اچھا نہیں رہا۔ ایپل کی جگہ گوگل کا ادارہ ’الفابیٹ‘ سب سے زیادہ مالیت والا ادارہ بن چکا ہے۔ تجزیہ کاروں کے مطابق مغربی ملکوں میں سمارٹ فونز کی مارکیٹ سیر ہونے کو ہے۔ ایپل کو اپنی کامیابی کے لیے نئی اختراعات کے ساتھ مارکیٹ میں آنا ہو گا۔