سال میں ایک بار بچے اپنی ماؤں کا شکریہ ادا کرتے ہیں اور ماؤں کو اس دن تحائف اور پھول پیش کرنے کے علاوہ انہیں بستر پر ہی ناشتہ بھی کراتے ہیں۔ لیکن اس تصویر میں امریکی ریاست الاسکا سے تعلق رکھنے والی ماں اور اس کا بچہ دنیا بھر کی ماؤں کو درپیش خطرات کی نشاندہی کرتے ہیں۔ زچگی کے بعد کے پہلے 24 گھنٹے ماں کے لیے سب سے زیادہ خطرناک ہوتے ہیں اور بہت سی مائیں ہلاک ہو سکتی ہیں۔

ماؤں کو سب سے زیادہ مسائل کا سامنا ڈیموکریٹک ری پبلک کانگو میں کرنا پڑتا ہے۔ ’سیو دا چلڈرن‘ نامی غیر سرکاری تنظیم دنیا بھر میں خواتین کی تعلیم، صحت اور سماجی حالات سے متعلق اعداد وشمار اکٹھا کرتی ہے۔ وسطی افریقی ریاست کانگو اس حوالے سے مرتب کی گئی 176 ممالک کی فہرست میں آخری نمبر پر رہی ہے۔ وہاں اوسطاﹰ 30 میں سے ایک ماں زچگی کے دوران یا اس کے فوری بعد ہلاک ہو جاتی ہے۔

سیو دا چلڈرن کی مرتب کردہ ’مدر انڈیکس‘ کے مطابق شورش اور قحط کا شکار مشرقی افریقی ریاست صومالیہ میں خواتین کانگو کے بعد بد ترین حالات کا شکار ہیں۔ اس درجہ بندی کے دیگر اہم عناصر میں ماؤں کی شرح اموات، مناسب تعلیم کی عدم دستیابی اور ان کی کم تر معاشی حالت کا جائزہ بھی شامل تھا۔

یہ ایک تکلیف دہ حقیقت ہے کہ ’مدر انڈیکس‘ میں آخری دس پوزیشنوں پر جو ممالک ہیں وہ براعظم افریقہ سے ہی ہیں۔ ان میں مالی، سیرالیون، سینٹرل افریقن ری پبلک، چاڈ اور آئیوری کوسٹ بھی شامل ہیں۔ تاہم کینیا میں مائیں، جیسا کہ تصویر میں دکھائی گئی مسائے خاتون، کسی حد تک خوش قسمت ہیں۔ کینیا میں حالات کسی حد تک بہتر ہیں اور وہاں ہونے والے حالیہ انتخابات میں خواتین کے لیے مخصوص نشستیں بھی رکھی کی گئی ہیں۔

افغانستان میں ہونے والے حملے تو اکثر خبروں میں رہتے ہیں تاہم وہاں خواتین کو درپیش خطرناک صورت حال پر توجہ کم ہی دی جاتی ہے۔ صحت کے حوالے سے حالات میں بہتری کی وجہ سے یہ ملک ’مدر انڈیکس‘ میں آخری پوزیشن سے اب 145ویں نمبر پر آ گیا ہے۔ تاہم اب بھی وہاں صرف 14 فیصد مائیں ہی ایک تربیت یافتہ دایہ کی موجودگی میں زچگی کے عمل سے گزرتی ہیں۔

ایک فلپائنی محاورے کے مطابق ’زچگی کے دوران عورت کا ایک پاؤں قبر میں ہوتا ہے‘۔ قابل افسوس حقیقت یہ ہے کہ فلپائن میں ہر برس 4,600 کے قریب خواتین زچگی کے عمل کے دوران ہلاک ہو جاتی ہیں۔ ہلاکت کی بڑی وجوہات ضروت سے زیادہ خون بہہ جانا، ناکافی خوراک اور ملیریا اور ایچ آئی وی ایڈز جیسی بیماریاں ہیں۔

سیو دا چلڈرن تنظیم کی طرف سے نو مولود بچوں کی صورت حال کا جائزہ بھی لیا جاتا ہے اور اس جائزے کا ایک حیران کن نتیجہ بھی سامنے آیا۔ امریکا میں دنیا کے دیگر صنعتی ممالک کے مقابلے میں بچوں کی شرح اموات سب سے زیادہ ہے۔ وہاں ہر برس قریب 11,300 بچے اس نازک مرحلے کے دوران ہلاک ہوجاتے ہیں۔ یہ تعداد باقی تمام صنعتی ممالک کی مجموعی تعداد سے بھی 50 فیصد زائد ہے۔

جرمنی میں ماؤں کی صورت حال بتدریج بہتر ہو رہی ہے۔ تعلیم، آمدنی اور صحت کے شعبوں میں بہتری کے سبب جرمنی رواں برس ’مدر انڈیکس‘ میں نویں نمبر پر آگیا ہے۔ گزشتہ برس یہ 12ویں پوزیشن پر تھا۔ تاہم جرمنی کے مرکزی دفتر شماریات کے مطابق یہاں فی خاتون بچوں کی شرح پیدائش محض 1.36 بچے ہیں جو دیگر مغربی ممالک کے مقابلے میں کہیں کم ہے۔

دنیا کے کسی ملک میں ماؤں کے حالات اس قدر اچھے نہیں ہیں جتنے فن لینڈ میں۔ اس شمالی یورپی ملک نے سیو دا چلڈرن کی اسٹڈی میں پہلی پوزیشن حاصل کی۔ کامیابی کی وجوہات میں انتہائی مناسب صحت کی سہولیات، ریاست کی طرف سے مالی معاونت اور پورے دن بچوں کی نگہداشت کے ادارے شامل ہیں۔ نئی ماؤں کو بچے کی دیکھ بھال کے لیے ایک خصوصی پیکج بھی فراہم کیا جاتا ہے جس میں نئے خاندان کی ضروریات کا مکمل سامان موجود ہوتا ہے۔