بھارتی زیرانتظام کشمیر میں فوج کی فائرنگ، ایک شہری ہلاک
24 اپریل 2010اشتہار
اس واقعے کے بعد علاقے کے لوگوں نے بھارت مخالف نعرے لگائے اور فوجی گاڑیوں پر پتھراؤ کیا۔ اس موقع پر دو فوجی گاڑیوں کو نذرآتش بھی کر دیا گیا۔ مقامی پولیس کے مطابق یہ واقعہ اس وقت پیش آیا، جب فوجی چیواں کیلر کے گاؤں سے مسلح عسکریت پسندوں کےگزرنے کی اطلاع پر گھات لگائے بیٹھے تھے اور ’مشتبہ سرگرمیوں‘ کے بعد انہوں نے وہاں فائرکھول دیا۔
اس واقعے کے بعد مقامی افراد سڑکوں پر نکل آئے اور انہوں نے فوجی قافلے کا گھیراؤ کر لیا۔ اس فوجی قافلے کو علاقے سے نکالنے کے لئے دیگر فوجیوں کی جانب سے احتجاج کرنے والوں پر فائرنگ کے واقعے میں چار شہری زخمی ہو گئے۔
دوسری جانب بھارتی فوج نے ڈوڈہ کے علاقے میں ایک کارروائی کے دوران ایک عسکریت پسند تنظیم کے دو جنگجوؤں کی ہلاکت کا دعویٰ بھی کیا ہے۔
رپورٹ : عاطف توقیر
ادارت : افسر اعوان