رواں سال کے اواخر ميں ستائيس دسمبر کے روز بھارتی حکومت نے ملک کے کئی حصوں ميں سکيورٹی بڑھانے اور انٹرنيٹ کی ترسيل بند کرنے کے احکامات جاری کيے۔ شمالی رياست اتر پرديش ميں بھی اب انٹرنيٹ کی سروس معطل ہے۔ خدشہ ہے کہ شہريت ترميمی بل کی مخالفت ميں مظاہروں کی تازہ لہر شروع ہونے کو ہے۔ يہ متنازعہ بل گيارہ دسمبر کو منظور ہوا تھا۔

بھارت ميں منظور ہونے والا نيا قانون پاکستان، بنگلہ ديش اور افغانستان سے تعلق رکھنے والے ہندوؤں، سکھوں، پارسيوں، بدھ، جين اور مسيحيوں کے ليے بھارت ميں ’فاسٹ ٹريک‘ شہريت کے حصول کی راہ ہموار کرتا ہے۔ ناقدين کا کہنا ہے کہ يہ قانون مسلمانوں کے حوالے سے امتيازی ہے اور مذہب کی بنياد پر شہريت دينا بھارت کی سيکولر اقدار کی خلاف ورزی ہے۔

بھارتی حکومت ايک اور منصوبے پر کام کر رہی ہے، جس کے تحت بغير دستاويزات والے غير قانونی مہاجرين کو نکالا جا سکے گا۔ ناقدين کو خدشہ ہے کہ اگر ’نيشنل رجسٹر آف سيٹيزنز‘ پر ملک گير سطح پر عملدرآمد شروع ہو جاتا ہے، تو بھارت کے وہ شہری جو اس منصوبے کی شرائط کے تحت اپنی شہريت يا بھارت سے تعلق ثابت کرنے ميں ناکام رہے، ان کی شہريت ختم کی جا سکتی ہے۔

بھارت میں کئی آزاد خيال دانشور نئے قانون اور ’نيشنل رجسٹر آف سيٹيزنز‘ پر کھل کر تنقيد کر رہے ہيں۔ ان ميں معروف مصنفہ ارندھتی رائے پيش پيش ہيں۔ قدامت پسند سياستدان اور سابق کامرس منسٹر سبرامنين سوامی نے ارندھتی رائے کی گرفتاری کا مطالبہ کر رکھا ہے۔

بھارت کے متعدد شہروں کی ان گنت يونيورسٹيوں کے طلباء نے تازہ اقدامات کے خلاف احتجاج جاری رکھا ہوا ہے۔ ملک گير سطح پر جاری مظاہروں ميں کئی طلباء تنظيميں سرگرم عمل ہيں۔ نوجوان نسل اپنا پيغام پہنچانے اور لوگوں کو متحرک کرنے کے ليے سماجی رابطوں کی ويب سائٹس کا بھی سہارا لے رہے ہيں۔

بھارتی حکام نے احتجاج کچلنے کے ليے ہزاروں پوليس اہلکاروں کو تعينات کيا ہے۔ قانون نافذ کرنے والے اداروں کے اہلکاروں اور مظاہرين کے درميان جھڑپوں ميں اب تک پچيس سے زائد افراد ہلاک بھی ہو چکے ہيں۔ بھارتی آرمی چيف نے بھی احتجاجی مظاہروں ميں طلباء کی شموليت کو تنقيد کا نشانہ بنايا ہے۔

تمام تر مخالفت اور احتجاج کے باوجود وزير اعظم نریندر مودی کی ہندو قوم پرست بھارتيہ جنتا پارٹی اب بھی اپنے موقف پر ڈٹی ہوئی ہے۔ پارٹی رہنماوں کا کہنا ہے کہ احتجاج کرنے والوں کو غلط معلومات فراہم کی گئی ہيں اور لوگوں کو قانون کا مطلب نہيں معلوم۔ بی جے پی احتجاجی ريليوں کا الزام حزب اختلاف کی جماعت کانگريس پر عائد کرتی ہے۔

راشتريہ سوايمسيوک سانگھ يا آر ايس ايس انتہائی دائيں بازو کی ايک ہندو قوم پرست جماعت ہے۔ بی جی پی اسی جماعت سے نکلی ہے۔ آر ايس ايس کے کارکن بھی اس متنازعہ قانون کے حق ميں سڑکوں پر نکلے ديکھے گئے ہيں۔

بلقیس بانو’شاہین باغ کی دادی‘ کے نام سے مشہور ہیں۔ حالانکہ وہ اترپردیش کے بلند شہر ضلع کی رہنے والی ہیں اور ان کے شوہر کی تقریباً دس برس پہلے چل بسے تھے۔ جو کھیتوں میں مزدوری کرتے تھے۔ بلقیس ان دنوں دہلی میں اپنے بہو بیٹو ں کے ساتھ رہتی ہیں۔

بلقیس بانو مزاحمت کی علامت بن گئی تھیں۔ وہ سخت سردی اور زبردست بارش کے باوجود 100 دنوں سے زائد چلنے والے اس پرامن مظاہرے میں مستقل ڈٹی رہیں۔

بلقیس بانو کہتی ہیں کہ وہ کئی مرتبہ صبح آٹھ بجے سے رات 12بجے تک مظاہرے میں شامل رہتی تھیں۔ ان کے ساتھ ہزاروں خواتین وہاں موجود ہوتی تھیں۔

خواتین کی اس منفرد تحریک سے حوصلہ پاکر بھارت کے تقریباً تمام بڑے شہروں میں خواتین نے مظاہرے شروع کردیے تھے۔اسے ’مزاحمت کی علامت‘ قرار دیا گیا۔ شاہین باغ کے مظاہرے نے پوری دنیا کی توجہ اپنی جانب مبذول کی۔

بھارتی وزیر داخلہ امیت شاہ نے جب کہا کہ وہ متنازعہ سی اے اے قانون سے ایک انچ بھی پیچھے نہیں ہٹیں گے تو بلقیس بانو کا جواب تھا’اگر وہ ایک انچ بھی پیچھے نہیں ہٹیں گے تو ہم ایک بال برابر بھی پیچھے نہیں ہٹنے والے۔“

بلقیس بانو نے مظاہرے کے دوران ایک بار کہا تھا’وہ ہمیں غدار کہتے ہیں۔ جب ہم انگریزوں کو ملک سے باہر نکال چکے ہیں تو نریندر مود ی اور امیت شاہ کون ہیں؟ آپ سی اے اے اور این آر سی ہٹالیں، تو ہم ایک لمحہ بھی ضائع کیے بغیر دھرنا ختم کردیں گے۔“

ٹائم میگزین نے بلقیس بانو کو ’آئیکون‘ کی فہرست میں جگہ دیتے ہوئے لکھا ہے”بلقیس نے آمریت کی طرف پھسلتے جارہے ملک میں، سچ بولنے کی وجہ سے جیلوں میں ڈالے جانے والے کارکنوں اور طلبہ لیڈروں کو امید اور طاقت دی اور ملک بھر کی عورتوں کوشاہین باغ جیسا پرامن مظاہرہ کرنے کا حوصلہ بخشا۔“

پرامن مظاہرہ کرنے والی ان خواتین کو اس بات سے مایوسی بھی ہوئی کہ بھارتی پارلیمان گوکہ شاہین باغ سے صرف چند کلومیٹر کے فاصلے پر واقع ہے لیکن حکومت کا کوئی نمائندہ ان کی بات سننے کے لیے نہیں آیا البتہ ان پر انتہائی گھٹیا اور جھوٹے الزامات ضرور لگائے۔

شاہین باغ ایک اس لحاظ سے بھی ایک منفرد تحریک تھی کہ لوگوں نے عملی تحریک کے ساتھ ساتھ علمی معلومات بھی حاصل کی۔ سڑک کے کنارے ایک عارضی لائبریری بنائی گئی تھی اور بچوں کے لیے ایک خیمے میں اسکول۔

شاہین باغ تحریک ایک کل مذہبی عوامی تحریک تھی۔ ہندو، مسلمان، سکھ، عیسائی سب نے اپنی صلاحیت اور اپنی بساط کے مطابق اس میں اپنا تعاون ادا کیا۔

ما ئیں اپنے دودھ پیتے بچے کو لے کر اس مظاہرے میں شامل رہتی تھیں۔ ان کا کہنا تھا کہ ہم اپنے آنے والی نسلوں کے سامنے شرمندہ نہیں ہونا چاہتے۔

ٹائم میگزین کی اس فہرست میں وزیر اعظم نریندرمودی کا نام بھی شامل ہے۔ میگزین نے اس حوالے سے لکھا ہے ” نریندر مودی کے عروج کے بعد بھارتی جمہوریت کی تکثیریت حملے کی زد میں ہے۔ خاص طورپر مسلمانوں کو ٹارگیٹ کیا گیا اور دنیا کی سب سے متحرک جمہوریت گہری تاریکی میں گر گئی ہے۔“

متنازعہ شہریت ترمیمی قانون میں پاکستان، بنگلہ دیش اور افغانستان میں ستائے جانے والے ہندو، سکھ، بودھ، جین، پارسی اور عیسائی مذہبی اقلیتوں کو بھارت آنے پر شہریت دینے کی گنجائش ہے لیکن مسلمانوں کو اس کے اہل نہیں ہوں گے۔

شاہین باغ کی تحریک نے مستقبل کی نسل کو بھی عوامی تحریک کی اہمیت اور افادیت سے عملی طور پر آگاہ کرنے میں اہم رول ادا کیا ہے۔

ٹائم میگزین نے لکھا ہے سات دہائیوں سے بھارت دنیا کا سب سے عظیم جمہوری ملک ہے۔ اس کی 130کروڑ آبادی میں ہندو، مسلم، سکھ عیسائی، بودھ، جین او ر دیگر مذاہب کے لوگ شامل ہیں۔ لیکن اس میں الزام لگایا گیا ہے کہ بی جے پی حکومت نے بھارت میں تکثیریت کو ختم کردیا ہے۔ تحریر: جاوید اختر، نئی دہلی