ادھرعسکری کشیدگی اور سرحدی تنازعہ کو حل کرنے کے لیے جاری کوششوں کے تحت آج بدھ 24 جون کو دونوں ملکوں کے درمیان جوائنٹ سکریٹری سطح پر بات چیت ہورہی ہے جبکہ بھارت کے آرمی چیف جنرل نروانے لداخ کے سرحدی علاقوں کا دورہ کر رہے ہیں۔

بھارت کے وزیر دفاع راج ناتھ سنگھ اور چین کے وزیر دفاع ویئی فینگے روس کے وکٹری ڈے کی 75ویں سالگرہ کے موقع پر منعقدہ پریڈ میں شرکت کے لیے ان دنوں ماسکو میں ہیں۔  چین کے سرکاری اخبار گلوبل ٹائمز نے خبر دی تھی کہ دونوں وزرائے دفاع وہاں ایک دوسرے سے ملاقات کریں گے اور سرحدی اور عسکری تنازعہ کو حل کرنے کے حوالے سے بات چیت کریں گے۔ تاہم بھارتی وزارت دفاع کے ترجمان نے آج واضح طور پر کہا کہ دونوں رہنماوں کے درمیان کوئی میٹنگ طے نہیں ہے۔

دوسری طرف بھارت اور چین سرحد پر جاری کشیدگی کو کم کرنے کے حوالے سے آج جوائنٹ سکریٹری کی سطح پر ورچوول میٹنگ کررہے ہیں۔  یہ میٹنگ 'بھارت چین سرحدی امور پر صلاح و مشورہ اور رابطہ کے لیے ورکنگ میکانزم‘ (ڈبلیو ایم سی سی) کے تحت ہورہی ہے۔  2012 میں قائم اس میکانز م کا مقصد بھارت اور چین کے سرحدی علاقوں پر امن و سکون برقرار رکھنے کے لیے صلاح و مشورہ اور رابطہ کرنا نیز کمیونیکیشن اور تعاون کو مضبوط کرنے کے لیے خیالات کا تبادلہ کرنا ہے۔

خیال رہے کہ ایشیا کی دو جوہری طاقت رکھنے والے پڑوسیوں کے درمیان مشرقی لداخ کے سرحدی علاقے گلوان وادی میں دونوں افواج کے درمیان 15جون کو ہونے والی پرتشدد جھڑپ کے بعد سے حالات کشیدہ ہیں۔ اس جھڑپ میں بھارت کے 20 جوان مارے گئے جن میں ایک کرنل شامل تھا۔ جب کہ درجنوں دیگر جوان زخمی ہوگئے تھے۔ بھارتی میڈیا نے چین کے 40 فوجیوں کی ہلاکت کی خبریں دی تھیں تاہم چینی وزارت خارجہ کے ترجمان نے گزشتہ دنوں اس کی تردید کردی۔

بھارت کے آرمی چیف جنرل ایم ایم نروانے آج لداخ میں سرحدی علاقے کا دورہ کرنے والے ہیں۔ اس سے قبل کل منگل کے روز انہوں نے لیہ میں فوجی ہسپتالوں کا دورہ کیا تھا اورگلوان وادی میں چینی فوج کے ساتھ جھڑپ میں زخمی ہونے والے بھارتی جوانوں کی عیادت کی تھی۔

دونوں ملکوں کے درمیان جاری کشیدگی کو کم کرنے کے متعدد اقدامات کے تحت پیر کے روز بھارت اور چین کے درمیان کور کمانڈر کی سطح پر میٹنگ ہوئی۔میٹنگ کے بعد جاری سرکاری بیان میں کہا گیا ہے کہ ”دونوں فریق اس امر پر متفق ہوگئے ہیں کہ صورت حال کو ٹھنڈا کرنے کے لیے ضروری اقدامات کیے جائیں گے۔"  لیکن دلچسپ بات یہ ہے کہ نہ تو ضروری اقدامات کی تفصیل بتائی گئی ہے اور نہ ہی اس کے لیے کسی وقت کا تعین کیا گیا ہے۔ دوسری طرف دونوں ممالک سرحد پر اپنے اپنے علاقوں میں فوجیوں کی تعداد میں مسلسل اضافہ کررہے ہیں۔

 اس صورت حال پر نگاہ رکھنے والے ماہرین کا کہنا ہے کہ دونوں ممالک سرحد پر اپنے فوجیوں کی تعداد میں فی الحال کسی بھی صورت میں کمی نہیں کریں گے۔ ڈی ڈبلیو کے ایک نمائندے کا کہنا ہے کہ کشمیر سے لداخ کی طرف جانے والی سڑک پر فوجی سازو سامان اوربڑی تعداد میں قافلوں کو جاتے ہوئے دیکھا جاسکتا ہے۔ جب کہ دفاعی تجزیہ نگار ریٹائرڈ کرنل اجے شکلا نے ایک ٹوئٹ کرکے بتایا ہے کہ چین نے  لداخ سرحد پر متنازعہ علاقوں میں اپنی فوج کی تعداد میں 30 فیصدکا اضافہ کردیا ہے۔

چین نے اس علاقے میں کم از کم دس ہزار فوجی تعینات کیے ہیں جبکہ جنگی طیارے، ہیلی کاپٹر، ٹینک، میزائل سسٹم اور ایئر ڈیفنس رڈار بھی نصب کردیے ہیں۔

 سابق آرمی کمانڈر لفٹننٹ جنرل ڈی ایس ہوڈا کا کہنا ہے کہ گلوان وادی میں جو کچھ ہوا ہے اس کے مدنظر بھارتی آرمی کو اپنے فوجیوں کی تعداد میں کمی کرتے وقت انتہائی چوکنا رہنا ہوگا اور احتیاط سے کام لینا ہوگا۔سینئر کمانڈروں کو اس پر نگاہ رکھنی ہوگی تاکہ کوئی غیرمتوقع صورت حال پیش نہ آجائے۔ اسی کے ساتھ ساتھ سفارتی سطح پر بات چیت بھی جاری رہنی چاہیے۔

اس دوران روس، بھارت اور چین کے وزرائے خارجہ کے درمیان منگل کے روز ہونے والی معمول کی ورچوول میٹنگ میں بھارتی وزیر خارجہ ایس جے شنکر نے چین کا نام لیے بغیر کہاکہ دنیا کی اہم طاقتوں کو ہر طرح سے دوسروں کے لیے مثال بننا چاہیے اور بین الاقوامی قوانین کااحترام کرنا چاہیے۔ ساتھ ہی پارٹنر ملکوں کے جائز مفادات کو تسلیم کرنا چاہیے کیوں کہ طویل مدتی عالمی نظام کو فروغ دینے کا یہی واحد راستہ ہے۔