وزیر اعظم نریندر مودی نے اپوزیشن کانگریس پر سخت طنز کرتے ہوئے کہا کہ ’آپریشن سیندور‘ کے دوران جب پاکستان میں دھماکے ہو رہے تھے، تو کانگریس کے شاہی خاندان کی نیند اُڑ گئی تھی۔

وزیرِ اعظم مودی نے بہار کے آرہ میں ایک انتخابی جلسے سے خطاب کرتے ہوئے الزام لگایا کہ کانگریس کے "شاہی خاندان" کو پاکستان میں بھارتی فوج کی طرف سے کیے جانے والے حملے کے سبب ہونے والے دھماکوں کی وجہ سے نیند نہیں آتی تھی، اور کہا کہ پاکستان اور کانگریس کے 'نامدار‘ دونوں ابھی تک "آپریشن سیندور" سے سنبھل نہیں پائے ہیں۔

مودی نے مزید کہا، آج بھارت دہشت گردوں کو ان کے ٹھکانوں میں جا کر مارتا ہے۔ حال ہی میں ہم نے ’آپریشن سیندور‘ کیا۔ کیا ہم نے اپنا وعدہ پورا نہیں کیا؟ کیا ہر بھارتی کو اپنے بہادر فوجیوں پر فخر نہیں ہونا چاہیے؟ لیکن فوج کی کامیابی کے باوجود، کانگریس اور آر جے ڈی ناخوش نظر آتے ہیں۔

وزیرِ اعظم مودی اور وزیرِ داخلہ امیت شاہ نے بہار کی متعدد ریلیوں میں بار بار ’’آپریشن سیندور‘‘ کا ذکر کیا ہے، بی جے پی اسے حکومت کی بڑی کامیابی کے طور پر پیش کر رہی ہے تاکہ عوامی جذبات کو انتخابی فائدے میں بدلا جا سکے۔

خیال رہے کہ اپریل میں بھارت کے زیر انتظام کشمیر کے سیاحتی مقام پہلگام میں ہونے والے حملے میں تقریباﹰ چھبیس بھارتی شہری مارے گیے تھے۔ نئی دہلی نے اس کے لیے پاکستان کو مورد ال‍زام ٹھہرایا تھا لیکن اسلام آباد نے اس کی تردید کی تھی اور غیرجانبدارانہ بین الاقوامی انکوائری کی تجویز پیش کی تھی۔ لیکن بھارت نے اسے ٹھکرا دیا تھا۔

مئی میں دونوں جوہری ہتھیار رکھنے والے پڑوسیوں کے درمیان مختصر جھڑپ ہوئی تھی۔ بھارت نے اس کا نام آپریشن سیندور رکھا تھا، جس میں دونوں ملکوں کے مزید شہری ہلاک ہوئے۔ امریکہ کے صدر ڈونلڈ ٹرمپ کی مداخلت کے بعد فائر بندی ہوئی تھی۔

راہول گاندھی کا وزیرِ اعظم مودی پر طنز

بھارتی پارلیمان میں اپوزیشن لیڈر اور کانگریس پارٹی کے رہنما راہول گاندھی نے ’’آپریشن سیندور‘‘ کے بعد پاکستان کے ساتھ فائر بندی کے فیصلے پر تبصرہ کرتے ہوئے کہا کہ جب ٹرمپ نے انہیں فون کیا اور مبینہ طور پر دو دن میں جنگ ختم کرنے کو کہا تو مودی کو ’’ َپینِک اَٹیک‘‘ ہوا۔

مودی حکومت نے امریکہ کی کسی مداخلت کے دعوے کو ہمیشہ مسترد کیا ہے، مگر راہول گاندھی نے اپنا مؤقف دہراتے ہوئے کہا کہ ''بھارت نے امریکہ کے اشارے پر پاکستان سے لڑائی ختم کی۔‘‘

راہول گاندھی نے الزام لگایا کہ مودی نہ صرف امریکہ کے صدر ڈونلڈ ٹرمپ سے ’’ڈر گئے‘‘، بلکہ وہ بڑے سرمایہ داروں کے ’’ریموٹ کنٹرول‘‘ پر چلتے ہیں۔ ان کا اشارہ بزنس گھرانے امبانی اور اڈانی کی طرف تھا۔

انہوں نے مودی کے ’’56 انچ کی چھاتی‘‘ والے بیان پر طنز کرتے ہوئے کہا، ’’بڑی چھاتی ہونے سے انسان طاقتور نہیں بن جاتا۔‘‘

راہول گاندھی نے مثال دیتے ہوئے کہا، ’’مہاتما گاندھی کی جسمانی ساخت کمزور تھی، مگر انہوں نے اس وقت کی سپر پاور برطانیہ کا مقابلہ کیا۔‘‘

کانگریسی رہنما نے مزید کہا کہ 1971 میں جب امریکہ نے اندرا گاندھی کو دھمکایا تھا، تو انہوں نے ڈرنے کے بجائے وہی کیا جو ضروری تھا۔

خیال رہے کہ بہار میں اسمبلی انتخابات کی ووٹنگ 6 اور 11 نومبر کو ہو گی، اور ووٹوں کی گنتی 14 نومبر کو کی جائے گی۔

پاکستان کا ذکر جنوبی بھارت بھی پہونچ گیا

تلنگانہ کے وزیرِ اعلیٰ ریونت ریڈی کے ایک بیان نے جنوبی ریاست میں بھی سیاسی تنازع کھڑا کر دیا ہے۔ انہوں نے کہا کہ بی جے پی حکومت میں ’’ہمت نہیں تھی کہ بھارت پر حملے کے بعد پاکستان پر بمباری جاری رکھتی، لیکن آج تلنگانہ میں ووٹ مانگنے کے لیے 'کارپٹ بامبنگ‘ کا نعرہ لگا رہی ہے۔‘‘

تلنگانہ میں اپوزیشن بی جے پی نے ریونت ریڈی کے بیان کو ’’اشتعال گیز اور قابلِ اعتراض‘‘ قرار دیتے ہوئے الیکشن کمیشن آف انڈیا میں شکایت درج کرائی ہے۔

بی جے پی نے کہا کہ ریونت کے ریمارکس ’’بھارتی فوج کی توہین‘‘ ہیں اور خاص طور پر ’’سرجیکل اسٹرائکس‘‘ اور ’’آپریشن سیندور‘‘ کے حوالے سے پاکستان کے بیانیے کی تائید کے مترادف ہیں۔

تلنگانہ کی جوبلی ہلز اسمبلی سیٹ پر 11 نومبر کو ضمنی انتخابات ہونے والے ہیں۔

ادارت: صلاح الدین زین