اس معاہدے پر ایک دہائی سے زائد عرصے تک بات چیت جاری رہی اور اب یہ معاہدہ طے پا گیا ہے۔

بھارت کے وزیر تجارت پیوش گوئل کے مطابق یہ معاہدہ یورپی فری ٹریڈ ایسوسی ایشن، جس میں سوئٹزرلینڈ، ناروے، آئس لینڈ اور لیکٹنسٹائن شامل ہیں، کے ساتھ کیا گیا ہے۔ مجموعی طور پر یہ 1.4 بلین آبادی والے اس خطے میں تیزی سے ترقی کی جانب گامزن مارکیٹ میں 100 بلین ڈالر کی سرمایہ کاری کا ایک معاہدہ ہے۔

گوئل نے ایک پریس کانفرنس میں کہا، "یہ ایک جدید تجارتی معاہدہ ہے، جو پانچوں ممالک کے لیے یکساں طور پر فائدہ مند ثابت ہوگا۔"

یہ معاہدہ مذاکرات کے 21 ادوار کے بعد بلآخر طے پایا ہے۔ سوئس اقتصادی امور کے سربراہ گائے پرملین نے بھارت کو تجارت اور سرمایہ کاری کے بے پناہ مواقع کی منڈی قرار دیا ہے۔

بھارت نے گزشتہ دو سالوں میں آسٹریلیا اور متحدہ عرب امارات کے ساتھ بھی تجارتی معاہدوں پر دستخط کیے ہیں۔ بھارتی حکام کے مطابق برطانیہ کے ساتھ بھی تجارتی معاہدہ آخری مراحل میں ہے۔ یہ تمام تر پیش رفت وزیراعظم نریندر مودی کے 2030 تک سالانہ برآمدات میں 1 ٹریلین ڈالر کا اضافہ حاصل کرنے کے ہدف کا حصہ ہے۔

یہ یورپی تجارتی گروپ، جو 1960 میں یوروپی یونین کے تجارتی حجم کے مقابل تشکیل دیا گیا تھا، دنیا کا 10 واں سب سے بڑا تجارتی گروہ اور سروسز کے حوالے سے پانچواں سب سے بڑا گروپ ہے۔

اس تجارتی گروپ نے اب تک یورپی یونین سے باہر 40 ممالک اور خطوں کے ساتھ تقریباً 30 تجارتی معاہدوں پر دستخط کیے ہیں۔

ر ب/ ع ط (روئٹرز)