چین کی طرح بھارت نے بھی ایران پر پابندیوں کو تسلیم کرنے سے انکار کردیا ہے۔ بھارت کے ریزرو بینک کے ڈپٹی گورنر ایچ آر خان نے ایجنسی فرانس پریس کو بتایا کہ امریکہ اور یورپی یونین کی پابندیوں کے تناظر میں بھارت ایران سے امپورٹ ہونے والے خام تیل کی ادائیگیوں کے حوالے سے مختلف آپشنر کو زیر بحث لا رہا ہے۔ خان کے مطابق سردست تیل کی امپورٹ اور اس کے بدلے میں ادائیگی کا معاملہ خوش اسلوبی سے جاری ہے۔

بھارتی ذرائع کے مطابق اس کا بھی امکان ہے کہ ایران کو بھارتی کرنسی روپے میں ادائیگی کی جائے۔ ایسے امکانات بھی ظاہر کیے جا رہے ہیں کہ بھارت کو تیل فراہم کر کے ایران بارٹر سسٹم کے تحت ضروریات زندگی کی اشیاء بھی لے سکتا ہے لیکن ریزرو بینک انڈیا کے ڈپٹی گورنر کے مطابق بارٹر سسٹم کے تحت اشیا کا تبادلہ یقینی طور پر لاکھوں ٹن بیرل کی متبادل نہیں ہو سکتا۔

اس وقت بھارت ایران سے وصول ہونے والے خام تیل کی ادائیگی ایک ترک بینک کے ذریعے کر رہا ہے۔

یہ امر اہم ہے کہ بھارت کی جانب سے ایران کو ہر ماہ ایک ارب ڈالر ادا کیا جا رہا ہے اور اس کے بدلے میں تین لاکھ 70 ہزار بیرل خام تیل بھارت پہنچ رہا ہے۔ یہ مقدار بھارت کی ضروریات کا بارہ فیصد ہے۔ بھارت کی نیوز ایجنسی پریس ٹرسٹ آف انڈیا کے مطابق ترک بینک نے مالی معاملات کو روکنے کا عندیہ دیا ہے۔

امریکہ کے دورے پر گئے ہوئے بھارتی وزیر خزانہ پرنب مکھر جی نے امریکی شہر شکاگو میں رپورٹرز سے بات چیت کرتے ہوئے کہا تھا کہ ان کا ملک ایران سے امپورٹ کو کم قطعاً نہیں کرے گا۔ مکھر جی کا یہ بھی کہنا تھا کہ سر دست یہ ممکن نہیں کہ بھارت ایرانی تیل کی امپورٹ میں کمی لانے کا کوئی غیر معمولی فیصلہ کرے۔ بھارتی وزیر خزانہ کا یہ بھی کہنا تھا کہ امریکہ اور یورپی یونین کی پابندیوں کے باوجود بھارت کے لیے ایران ایک انتہائی اہم ملک ہے۔

امریکہ اور یورپی یونین کی پابندیوں کو چین نے مسترد کردیا ہے۔ جاپان کی حکومت ایران سے امپورٹ معاملات کی تفصیلات پر غور کر رہی ہے۔ جنوبی کوریا نے اس مناسبت سے ابھی تک کوئی بڑا فیصلہ نہیں کیا ہے۔ ترک حکومت نے بھی کہا ہے کہ وہ ایرانی تیل کی امپورٹ کو اس وقت تک نہیں روکے گی جب تک اقوام متحدہ کے ادارے سکیورٹی کونسل کی جانب سے پابندیوں کو حتمی شکل نہیں دی جاتی۔ ترکی اپنی تیل کی امپورٹ کا تقریباً نصف ایران سے حاصل کرتا ہے۔ ترک وزیر خارجہ احمد داؤد اوگلونے اس مناسبت سے پالیسی بیان جاری کیا۔

رپورٹ: عابد حسین

ادارت: شادی خان سیف