گزشتہ ہفتے بھارتی پارلیمنٹ نے اس قانون کو منظور کر لیا، جو نجی اور غیر ملکی کمپنیوں کے لیے جوہری توانائی کی پیداوار کو کھولنے کا راستہ فراہم کرتا ہے۔

تاریخی اٹامک انرجی ایکٹ حکومت کی اہم تبدیلی کی جانب نشاندہی کرتا ہے، جب کہ بھارت جوہری توانائی میں اضافہ اور آب و ہوا کے اہداف کو پورا کرنے کے لیے فوصل ایندھن پر انحصار کم کرنے کی کوشش کر رہا ہے۔

بھارت 2047 تک اپنی جوہری توانائی کی صلاحیت کو دس گنا بڑھا کر 100 گیگا واٹ کرنے کی کوشش کر رہا ہے، جو تقریباً 60 ملین گھروں کو سالانہ بجلی فراہم کرنے کے لیے کافی ہو گا اور 2070 تک کاربن سے کچھ حد تک چھٹکارا حاصل کرنے کے لیے ضروری ہے۔

اس ہدف تک پہنچنے کے لیے تقریباً 20 ٹریلین بھارتی روپے یعنی تقریبا 226 بلین ڈالر کی سرمایہ کاری کی ضرورت ہے۔ نئی قانون سازی کا مقصد اسی مقصد ک لیے نجی ذرائع کو کھولنا ہے۔

بھارتی وزیر اعظم نریندر مودی نے کہا کہ یہ "ہمارے ٹیکنالوجی کے منظر نامے کے لیے ایک تبدیلی کا لمحہ ہے" اور نجی شعبے کے لیے "متعدد مواقع" بھی کھولتا ہے۔

ٹاٹا پاور، اڈانی پاور اور ریلائنس انڈسٹریز سمیت بھارت کی بڑی کمپنیاں پہلے ہی ملک کے سخت کنٹرول والے سول نیوکلیئر پاور سیکٹر میں داخل ہونے میں اپنی دلچسپی کا اشارہ دے چکی ہیں۔

جوہری اصلاحات اور حفاظتی خدشات

حکومت کی امیدیں اپنی جگہ، تاہم بہت سے ماہرین اس بارے میں ممکنہ چیلنجز کے بارے میں بھی خبردار کرتے ہیں۔ اس میں ذمہ داری کی حدود اور ریگولیٹری نگرانی سے لے کر حفاظتی معیارات شامل ہیں، جو بھارت کے جوہری توانائی کے عزائم کو پیچیدہ بنا سکتے ہیں۔

پاکستان میں بھارت کے سابق سفیر اجے بساریہ نے کہا کہ یہ قانون ان قانونی رکاوٹوں کو دور کرتا ہے، جنہوں نے 2010 سے امریکی اور فرانسیسی کمپنیوں کو باہر رکھا تھا، جس سے بھارت کو روس سے آگے بھی تنوع کے قابل بنانے کی کوشش کی گئی۔

بساریہ نے ڈی ڈبلیو کو بتایا، "یہ اصلاحات بھارت اور امریکہ کے درمیان جوہری تعاون کو سیاسی اشارے سے تجارتی حقیقت کی طرف لے جاتی ہیں۔ بڑے ری ایکٹروں اور ایس ایم آرز (چھوٹے ماڈیولر ری ایکٹرز) پر مشترکہ بیانات اب حقیقی منصوبوں میں تبدیل ہو سکتے ہیں۔ اس سے 2026 میں ہند-امریکہ تعلقات میں بہتری کی بھی توقع ہے۔"

تاہم ان کا مزید کہنا ہے، "لائسنسنگ ٹائم لائنز، لوکلائزیشن کی ضروریات، درآمد شدہ ایندھن کے لیے جوہری مواد کے تحفظات، مالیاتی رکاوٹیں اور ریگولیٹری صلاحیت کے بارے میں سوالات بھی ہیں۔"

بھارت کے ایٹمی شعبے میں امریکی دلچسپی پر سوالات

حزب اختلاف کی جماعتوں نے الزام لگایا ہے کہ بھارت کی نئی قانون سازی کو امریکی مطالبات کو پورا کرنے کے لیے تیز تر کیا گیا۔ یہ اصلاحات امریکی صدر ڈونالڈ ٹرمپ کی جانب سے 'نیشنل ڈیفنس آتھرائزیشن ایکٹ' (این ڈی اے اے) پر 18 دسمبر کو پر دستخط کرنے کے فوری بعد ہوئی ہیں۔

این ڈی اے اے میں ایک وسیع دفاعی پالیسی بل نئی دہلی کے گھریلو جوہری ذمہ داری کے قوانین کو بین الاقوامی اصولوں کے ساتھ ہم آہنگ کرنے کے لیے ایک مشترکہ امریکہ انڈیا مشاورتی میکانزم کو لازمی قرار دینے کی دفعات شامل ہیں۔

سرمایہ کاری کے فروغ کے ساتھ حفاظتی بندوبست

بھارت کی اپوزیشن جماعت انڈین نیشنل کانگریس پارٹی کے ایک سینیئر رکن جے رام رمیش نے دعویٰ کیا کہ ملک کے جوہری ذمہ داری کے فریم ورک میں حالیہ تبدیلیوں کو پارلیمنٹ کے ذریعے امریکی مفادات کے ساتھ ملکی قانون کو ہم آہنگ کرنے کے لیے پیش کیا گیا۔

جبکہ بھارتی حکومت کا موقف ہے کہ ملک کی توانائی کی حفاظت کی ضروریات اور صاف توانائی کے وعدے جوہری اصلاحات کو آگے بڑھانے کا کام کرتے ہیں۔

ایک تھنک ٹینک آبزرور ریسرچ فاؤنڈیشن میں سکیورٹی، حکمت عملی اور ٹیکنالوجی سینٹر کے ڈائریکٹر سمیر پاٹل نے کہا کہ پالیسی میں تبدیلی ایک ضروری ڈھانچہ جاتی اصلاح ہے تاکہ بھارت کے جوہری عزائم کے لیے نجی سرمایہ کاری کو غیر مقفل کیا جا سکے۔

پاٹل نے ڈی ڈبلیو کو بتایا، "تاہم، کئی چیلنجز ہیں، جیسے کہ ایندھن کی سپلائی کی مقامی فراہمی کی کمی ایک اہم تشویش ہے۔ حفاظت اور نگرانی کا سوال، واضح طور پر، میری رائے میں، تجارتی شرکت کی ترغیب دینے اور معقول حفاظتی اقدامات نافذ کرنے کے درمیان ایک تجارت ہے۔"

پاٹل نے نوٹ کیا کہ جوہری قانون سازی کی موجودہ دفعات جوہری حادثے سے ہونے والے ممکنہ نقصان کے پیش نظر ناکافی معلوم ہوسکتی ہیں، لیکن وہ نجی کمپنیوں کو بھارت کے جوہری توسیعی منصوبوں میں دلچسپی رکھنے کے لیے کافی ہیں۔

نجی شعبے کے کردار پر شکوک و شبہات

تاہم جوہری شعبے سے واقف ایک سرکاری اہلکار نے نام ظاہر نہ کرنے کی شرط پر شکوک و شبہات کا اظہار کیا۔

اہلکار نے ڈی ڈبلیو کو بتایا، "بھارت کی جوہری صنعت مسلسل اہداف سے محروم رہی ہے، اور گیس اور ہائیڈرو جیسے ہائی رسک منصوبوں کو ترک کرنے کا نجی شعبے کا ٹریک ریکارڈ کمزور ذمہ داری کے تحفظات کے ساتھ سرمائے سے متعلق جوہری وعدوں کو برقرار رکھنے کے بارے میں سوالات اٹھاتا ہے۔"

جوہری اور تخفیف اسلحہ کے امور کا وسیع تجربہ رکھنے والے سابق سفارت کار انیل وادھوا نے ڈی ڈبلیو کو بتایا کہ بھارت کو اپنے اولوالعزم ہدف کو حاصل کرنے کے لیے عمل درآمد کے چیلنجوں کا سامنا ہے۔

وادھوا نے کہا، "سپلائی کے ضمنی مسائل میں گھریلو یورینیم کا خراب معیار، ہنر مند افرادی قوت کی ترقی کی ضرورت، اور ری ایکٹر کے اجزاء کے لیے ناکافی مینوفیکچرنگ کی صلاحیت جیسے عوامل شامل ہیں۔"

سیفٹی اور سپلائی سب سے اہم امور ہیں

وادھوا نے کہا کہ اہم مسائل پر بحث اب بھی جاری ہے۔

ان کا کہنا تھا کہ "کیا ذمہ داری کے لیے 15 بلین بھارتی روپے کی حدیں بڑے حادثات کے لیے کافی ہیں، کیا ریگولیٹری ادارہ، اٹامک انرجی ریگولیٹری بورڈ، کو حکومت سے مکمل آزادی حاصل ہے، اور پھر تجارتی مراعات کو حفاظتی معیارات کے ساتھ کس طرح مناسب طریقے سے متوازن کیا جائے۔"

2011 میں جاپان کی فوکوشیما آفت کی صفائی اور معاوضے میں 200 بلین ڈالر سے زیادہ لاگت آئی ہے، جو کہ بھارت کی مجوزہ ذمہ داری کی حد سے 1,200 گنا زیادہ ہے۔

طویل مدتی صحت کے اخراجات، انخلاء، اور آلودہ زمین کے نقصان کے حساب سے چرنوبل حادثے کا مجموعی اقتصادی اثر 700 بلین ڈالر سے بھی تجاوز کر گیا۔

غیر ملکی کمپنیوں کے لیے وادھوا نے کہا، بھارت کے پہلے سول لائیبلیٹی فار نیوکلیئر ڈیمیج ایکٹ (سی ایل این ڈی اے) 2010 نے عالمی اصولوں کے برعکس آپریٹرز کو سامان کی خرابیوں کے لیے سپلائرز پر مقدمہ کرنے کی اجازت دی تھی۔

ان کا کہنا ہے، "غیر ملکی ملکیت کو آپریشنل اور لائسنسنگ کے تقاضوں کے ساتھ 49 فیصد تک محدود کیا گیا ہے، لیکن یہ بل شرکت کے ایسے راستے بناتا ہے جو پہلے موجود نہیں تھے، جو کہ پچھلی حکومت کے فیصلوں کے مقابلے اہم پیش رفت کی نشاندہی کرتا ہے۔"

ص ز/ ج ا (مرلی کرشنن)