بھارتی شہر امرتسر میں سکھ مذہب کے پیروکاروں کا مقدس ترین مقام ’گولڈن ٹیمپل‘ واقع ہے۔ چھ جون کو اس عبادت گاہ پر حملے کے تیس برس مکمل ہو گئے۔ چھ جون 1984ء کو بھارتی فوج نے ’آپریشن بلیو سٹار‘ کے دوران اس عبادت گاہ میں گھس کر سینکڑوں افراد کو ہلاک کر دیا تھا۔ اس واقعے کی تیس ویں برسی کے موقع پر بھی گولڈن ٹیمپل میں ایک آزاد وطن کے حق میں نعرے لگائے گئے لیکن وقت کے ساتھ ساتھ یہ تحریک کمزور پڑ چکی ہے۔

چھ جون 2014ء کو گولڈن ٹیمپل میں سکھوں کے دو گروپوں کے درمیان تصادم میں دونوں جانب سے تلواریں اور کرپانیں نکل آئیں اور کچھ لوگ زخمی ہو گئے۔ 1984ء کے فوجی آپریشن کے تیس برس مکمل ہونے پر یادگاری تقریب کے دوران سکھ مذہب کی ایک سیاسی جماعت شرومنی اکالی دل کے حامیوں نے معمولی اختلاف کے بعد آزاد ریاست کے حق میں نعرے لگانے شروع کر دیے، جنہیں بعد ازاں سکیورٹی گارڈز نے گوردوارے سے نکال دیا۔

گولڈن ٹیمپل پر حملے کی یاد میں تقریبات کا انعقاد ہر سال ہوتا ہے لیکن نوّے کی دہائی میں ’’خالصتان‘‘ کے لیے شروع ہونے والی تحریک اب ماند پڑتی جا رہی ہے۔ ایک آزاد سکھ ریاست کے مخالف سُکھدیو سندھو کہتے ہیں:’’اب پنجاب کے لوگ 1984ء کے حالات سے بہت آگے جا چکے ہیں۔ تب یہ تحریک اس وجہ سے کامیاب ہوئی تھی کہ نوجوان اس میں شامل تھے۔ ان نوجوانوں کی ترجحیات بدل چکی ہیں۔ وہ بندوقوں کی بجائے روزگار چاہتے ہیں۔‘‘

80ء کے عشرے میں سکھ علیحدگی پسندوں کی قیادت سنت جرنیل سنگھ بھنڈراں والے نے کی، جو چھ جون 1984ء کو بھارتی فوج کے آپریشن کے دوران ہلاک ہو گئے تھے۔ اُس وقت اُن کی عمر صرف سینتیس سال تھی۔

امرتسر میں چھ جون 1984ء کو کیے جانے والے فوجی آپریشن میں تقریباً 500 افراد مارے گئے تھے۔ یہ آپریشن وہاں موجود سکھ علیحدگی پسندوں کو گولڈن ٹیمپل سے نکالنے کے لیے کیا گیا تھا، جو سکھوں کے لیے ایک علیحدہ وطن خالصتان کا مطالبہ کر رہے تھے۔ اس وقت بھارتی فوجی سکھوں کے اس مقدس ترین مقام میں جوتوں سمیت داخل ہو گئے تھے۔ اس دوران ٹیمپل کی عمارت کو بھی نقصان پہنچا تھا۔

گولڈن ٹیمپل میں فوجی آپریشن کے کچھ ہی عرصے بعد اُس وقت کی بھارتی وزیر اعظم اندرا گاندھی کو اُن کے اپنے ہی محافظوں ستونت سنگھ اور بے انت سنگھ نے گولی مار کر ہلاک کر دیا۔ اندرا گاندھی کے قتل کے بعد پھوٹنے والے فسادات میں سرکاری اعداد و شمار کے مطابق صرف نئی دہلی ہی میں 3000 سے زائد سکھوں کو قتل کر دیا گیا تھا۔ سکھ گروپوں کے مطابق یہ تعداد 4000 سے بھی زیادہ تھی۔ ہزاروں سکھ بے گھر بھی ہو گئے تھے۔

یہ تصویر 2009ء کی ہے، جب گولڈن ٹیمپل پر حملے کو پچیس برس مکمل ہوئے تھے۔ سکھ علیحدگی پسند اب بھی ہر سال چھ جون کو گولڈن ٹیمپل پر جمع ہوتے ہیں اور خالصتان تحریک کی قیادت کرنے والے سنت جرنیل سنگھ بھنڈراں والے کو یاد کرتے ہیں۔

امرتسر کے مرکزی سکھ میوزیم میں آویزاں اس پینٹنگ میں سکھ مذہب کے بانی گورو نانک تلونڈی (موجودہ پاکستان کے شہر ننکانہ صاحب) میں اپنے ساتھیوں کے ساتھ نظر آ رہے ہیں۔ گورو نانک کے ایک جانب اُن کے مسلمان ساتھی بھائی مردانہ اور دوسری جانب ہندو ساتھی بھائی بیلا کھڑے ہیں۔

امرتسر میں واقع گولڈن ٹیمپل دنیا بھر کے سکھوں کی مقدس ترین عبادت گاہ ہے، جہاں ہر وقت ایک میلہ سا لگا رہتا ہے۔ 2008ء کی اس تصویر میں پاکستان، بھارت اور دنیا بھر سے گئے ہوئے سکھ اپنے پہلے سکھ گورو گورو نانک دیو کی 539 ویں سالگرہ کی تقریبات میں شریک ہیں۔

نیویارک میں سکھ علیحدگی پسندوں کے اجتماع کا ایک منظر۔ سکھوں کی آزادی کی تحریک اور اُن کے لیے ایک الگ وطن ’’خالصتان‘‘ کی حمایت کرنے والے اب بھی موجود ہیں۔ امریکا، کینیڈا، برطانیہ اور دیگر ملکوں میں مقیم تارکین وطن آج بھی خالصتان کے حق میں ہیں۔ نیوز ایجنسی اے ایف پی کے مطابق بیرون ملک مقیم سکھوں کی تعداد 18 سے 30 ملین کے قریب ہے اور آج بھی پنجاب کے ساتھ ان کے روابط قائم ہیں۔

امرتسر کے گولڈن ٹیمپل کی بنیاد سکھ رہنما گورو ارجن صاحب کی خصوصی خواہش کے احترام میں لاہور سے خصوصی طور پر جانے والے ایک مسلمان صوفی بزرگ حضرت میاں میر نے سولہویں صدی میں رکھی تھی۔ یہ سنہری عبادت گاہ ایک خوبصورت تالاب میں تعمیر کی گئی ہے، جسے سیاحوں کی بھی ایک بڑی تعداد دیکھنے کے لیے جاتی ہے۔ سکھ اپنی اس عبادت گاہ کو مذہبی رواداری، محبت اور امن کی علامت گردانتے ہیں۔

کرتارپور میں گردوارہ جنم استھان میں سکھ مذہب کے بانی بابا گرونانک صاحب کے 550ویں یوم پیدائش کے موقع پر دنیا بھر سے ہزاروں کی تعداد میں سکھ یاتری شریک ہوئے۔

بابا گرونانک کے 550ویں یوم پیدائش کی تقریبات کے لیے دنیا بھر سے سکھ یاتری گرودوارہ دربار صاحب پہنچے ہیں۔ یہ سکھ یاتری گردوارے کے داخلی راستے پر اندر جانے کے منتظر ہیں۔

بابا گرونانک کے یوم پیدائش کی اختتامی تقریب میں پاکستانی وزیر داخلہ سید اعجاز شاہ بھی خصوصی طور پر شریک ہوئے۔

گوردوارہ جنم استھان میں قائم کیے گئے لنگر خانے میں یاتریوں کے لیے کھانوں کا اہتمام کیا گیا ہے۔

گوردوارہ جنم استھان میں رکھی گئی سونے کی پالکی جسے نہایت عقیدت کے ساتھ پھولوں سے سجایا گیا ہے۔

گوردوارہ جنم استھان میں یاتریوں کو طبی سہولیات کی فراہمی کے لیے پاکستانی صوبہ پنجاب کے گورنر چوہدری محمد سرور کی سرور فاونڈیشن کی طرف سے میڈیکل کیمپ بھی موجود ہے۔

بابا گرو نانک کی 550ویں یوم پیدائش کی تقریبات میں شریک یاتریوں کے لیے موجود اس جوتا گھر میں ان کے جوتے مفت پالش کیے جارہے ہیں۔

گردوارہ جنم استھان میں پانی کا ایک ایساکنواں موجود ہے جس کا پانی یاتری حضرات بہت احترام اور عقیدت کے ساتھ پیتے ہیں۔

کرتارپور میں موجود گردوارہ جنم استھان میں سکھوں کی مقدس کتاب گرنتھ صاحب پڑھی جا رہی ہے۔

گرونانک کے جنم دن کی تقریبات میں بڑی تعداد خواتین اور بچے بھی شریک ہوئے۔ ان تقریبات میں فیملیز کی شرکت اب ایک معمول کی بات ہے۔

گوردوارہ جنم استھان میں سکھوں کی مقدس کتاب گرنتھ صاحب کا درشن جاری ہے، سکھوں کا ایک گروپ مذہبی گیت بھی گا رہا ہے۔

گورونانک کے جنم دن کی تقریبات میں شریک یاتریوں کی خدمت کے لیے گوردوارہ جنم استھان کے ایک گوشے میں یاتریوں کے کپڑے بلا معاوضہ استری کیے جانے کی سہولت موجود ہے۔

1921ء میں انگریزوں اور ہندوؤں سے گوردوارہ دربار صاحب کا قبضہ واپس لینے کے لیے ہونے والی لڑائی میں مارے جانے والے سکھوں کی یادگار مرکزی گردوارے کے احاطے موجود ہے۔

سکھ خواتین یاتریوں کی سیوا کے لیے اپنے ہاتھوں سے روٹیاں بنا رہی ہیں۔ دوسری طرف جلیبیاں تیار ہو رہی ہیں۔