کیٹگری چار کا شدید طوفان امریکی ریاست ٹیکساس کے ساحلوں سے ٹکرا گیا۔ اس کے ہمراہ تیز رفتار جھکڑ اور موسلا دھار بارش بھی تھی۔ اب اس طوفان کی قوت میں غیرمعمولی کمی واقع ہو گئی ہے۔

سب سے پہلے یہ کارپس کرسٹی کے مقام پر کیٹگری چار کے طوفان کے طور پر ٹکرایا اور اس کے عقب میں آنے والے طوفانی حصے نے راک پوٹ کے شہر کو اپنے جھکڑوں اور تیز رفتار بارش کی لپیٹ میں لے لیا۔

ہاروی کے ساتھ آنے والے تیز رفتار جھکڑوں نے بے شمار درختوں کو جڑوں سے اکھاڑ پھینکا۔ ان جھکڑوں کی رفتار دو سو کلومیٹر فی گھنٹہ سے زائد تھی۔ ابھی تک ساحلی علاقوں میں مجموعی نقصان کا اندازہ نہیں لگایا جا سکا۔

ٹیکساس کے ساحل پر واقع نشیبی علاقے اس وقت ہاروی طوفان کے ساتھ برسنے والی شدید بارش کی وجہ سے زیر آب ہیں۔ ان علاقوں میں سے ہزاروں افراد کو طوفان کے ٹکرانے سے قبل ہی محفوظ مقامات پر منتقل کر دیا گیا تھا۔

امریکی ریاست ٹیکساس کے گورنر نے سیلاب سے متاثرہ علاقوں کو آفت زدہ قرار دے دیا ہے۔ صدر ڈونلڈ ٹرمپ نے بھی اپنے منصبِ صدارت کے پہلے سمندری طرفان کے ٹکرانے پر ٹویٹ کیا کہ حکومتی امداد متاثرین کے لیے وقف کر دی جائے۔

ہاروی کے ساتھ آنے والے تیز رفتار جھکڑوں نے مختلف علاقوں میں بجلی کے کھمبے اور ٹریفک کے سگنلز بھی اکھاڑ پھینکے۔ اس وقت کئی مقامات پر معطل نظام زندگی کی بحالی کا عمل شروع ہو چکا ہے۔

ٹیکساس کے ساتھ جڑے خلیج میکسیکو میں سمندری لہروں کی بلندی تیرہ فٹ تک ریکارڈ کی گئی جب کہ 90 سینٹی میٹر تک بارش نے کارپس کرسٹی، راک پورٹ اور اِن کے ملحقہ علاقوں میں جل تھل کر دیا۔ ان علاقوں میں کئی عمارتیں شدید متاثر ہوئیں۔ چار لاکھ سے زائد افراد کو محفوظ علاقوں میں منتقل ہونا پڑا۔

سمندری طوفان کے ٹکرانے سے قبل سَرفر تیز رفتار اور بلند ہوتی لہروں پر سرفنگ کا لطف اٹھاتے ہیں۔ ہاروی طوفان کی آمد سے قبل خلیج میکسیکو کے مقام گیلویسٹن میں ایک سَرفر بلند ہوتی موجوں پر سرفنگ کا لطف اٹھا رہا ہے۔

سمندری طوفان ہاروی کی قوت میں ساحل سے ٹکرانے کے بعد کمی آنا شروع ہو گئی تھی۔ یہ قوت اور شدت بتدریج کم ہوتی جاری ہے اور اب یہ معمول کی بارشوں کا حامل کم شدت والا ایک طوفان بن کر رہ گیا ہے۔