بھارت میں بحریہ کے حکام کا کہنا ہے ممبئی کے پاس ساحلی علاقوں میں طوفان کی زد میں آنے والا بحری جہاز جو دو روز قبل ڈوب گيا تھا اس میں 261 افراد سوار تھے۔ تازہ اطلاعات کے مطابق اس میں سے 181 افراد کو بچا لیا گيا ہے اور اب تک 37 لاشیں سمندر سے نکالی جا چکی تاہم حکام کے مطابق اب بھی 38 افراد لا پتہ ہیں۔

یہ تمام افراد تیل اور قدرتی گيس کی بھارت کی معروف کمپنی (اوا ین جی سی) سے کے لیے کام کرتے تھے۔ بھارتی بحریہ کے ایک ترجمان کے مطابق لا پتہ عملے کی تلاش کی مہم زور شور سے جاری ہے جس میں فضائیہ، ہیلی کاپٹر اور دیگر کشتیوں سے مدد لی جا رہی ہے۔

بعض ماہرین نے ان خدشات کا اظہار کیا ہے کہ لا پتہ افراد شاید زندگی کی جنگ ہار گئے ہوں۔ تاہم بھارتی بحریہ کے کمانڈر اجئے جھا  کا کہنا تھا کہ ان افراد کی تلاش کے لیے آئندہ تین روز تک مزید امدادی کارروائی جاری رکھی جائے گی۔

بحیرہ عرب سے اٹھنے والے طاقت ور سمندری طوفان تواتے نے منگل 18 مئی سے ہی بھارت کے ساحلوں کو متاثر کرنا شروع کر دیا تھا۔ اس سے خطرات کے لیے پہلے ہی سے لوگوں کو خبردار کیا گيا تھا اور لاکھوں افراد کو محفوظ مقامات پر بھی پہنچایا گيا تھا۔

تو سوال یہ ہے کہ مرکزی حکومت کے ماتحت اوا ین جی سی کے لیے کام کرنے والے ان ملازمین کو وہاں سے پہلے ہی کیوں نہیں نکالا  گيا اور اتنے لوگ طوفان میں پھنس کر کیسے ہلاک ہو گئے۔ واضح رہے کہ تیل اور قدرتی گيس پر تحقیق اور اسے نکالنے کے لیے کا یہ ادارہ کافی گہرے سمندر میں کام کرتا ہے۔ اس سے آگاہی رکھنے والے تجزیہ کار کہتے ہیں کہ ’یہ کمیونکیشن گیپ کی ایک صریح مثال ہے‘۔

ممبئی کے ایک سینیئر صحافی محمد شاہد نے ڈی ڈبلیو سے بات چیت میں کہا، ’’بحریہ نے تو سب کو متنبہ کر دیا تھا۔ تمام ماہی گیروں اور ساحلی علاقوں میں بسنے والے لوگوں کا بھی انخلا کروا لیا گيا تھا تاہم وزارت پیٹرولیم نے اس بارے میں اپنے ملازمین کو صحیح معلومات نہیں دی اور اسی لیے وہ اپنے جہاز میں رہنے پر مجبور تھے۔ اگر مرکزی وزارت نے بحریہ سے کہا ہوتا تو شاید وہ ان کی بھی مدد کرتے تاہم یہ کمیونکیشن گیپ مہلک ثابت ہوا۔‘‘

اس دوران کوسٹ گارڈز کی جانب سے ایک بیان میں کہا گيا ہے کہ اوا ین جی کو موسم سے متعلق دو ایڈوائزری بھیجی گئی تھیں اور اس میں اس بات کا اعادہ بھی کیا گيا تھا کہ ممبئی کے پاس سمندروں میں موجود تمام جہازوں کو فوری طور پر ساحل کی جانب واپس آنے کی ضرورت ہے۔ 

تفتیش کا حکم

اس دوران بھارتی وزارت پیٹرولیم اور گیس نے اس پورے معاملے کی تفتیش کا اعلان کیا ہے۔ وزارت کا کہنا ہے کہ اس کی ابتدا سے انتہا تک تمام پہلوؤں کی جانچ  کی جائے گی تاکہ یہ پتہ چل سکے آخر اس کے ملازمین کا جہاز طوفان کے دوران سمندر میں کیوں پھنسا رہا۔

مقامی میڈیا میں ڈوبنے والے جہاز کے چیف انجینیئر رحمان شیخ کا ایک بیان شائع ہوا جس میں انہوں نے کہا ہے کہ اگر جہاز کے کپتان نے طوفان سے متعلق تنیبہ کو سنجیدگی سے لیا ہوتا اور بہت سی لائف جیکٹ یا رافٹ پنکچر نہیں ہوتیں تو اس میں سوار سبھی افراد بچ سکتے تھے۔

اس دوران حزب اختلاف کی کئی سیاسی جماعتوں نے بھی اس کی عدالتی تفتیش کا مطالبہ کرتے ہوئے قصور واروں کو سزا دینے کا مطالبہ کیا ہے۔ حزب اختلاف کا کہنا ہے کہ آخر یہ کیسے ممکن ہے کہ طوفان کی پیشگی اطلاع کے بعد سبھی سمندر سے باہر آ جائیں اور مرکزی حکومت کے ملازمین کے جہاز کو طوفان میں پھنسنے کے لیے وہیں چھوڑ دیا جائے۔

 طوفان سے تباہی

بحیرہ عرب سے اٹھنے والے سمندری طوفان تاوتے نے بھارت کی متعدد جنوبی اور مغربی ریاستوں میں تباہی مچائی ہے جس کی وجہ سے زبردست جانی و مالی نقصان ہوا ہے۔ گجرات، مہاراشٹر، کیرلا اور کرناٹک جیسی ریاستوں میں اس طوفان سے درجنوں افراد ہلاک ہوئے ہیں۔

حکام کے مطابق تیز رفتار ہوائیں چلنے سے تقریباً 17 ہزار مکانات منہدم ہو گئے جبکہ 40 ہزار سے بھی زیادہ پیڑ جڑوں سے اکھڑ  گئے۔ اس طوفان کی آمد سے ایک دن قبل ہی تقریباً دو لاکھ افراد کو ساحلی علاقوں سے محفوظ مقام پر پہنچایا گيا تھا لیکن اس دوران اور بھی بہت سے لوگوں کو جان بچانے کے لیے اپنے گھروں سے دور جا کر پناہ لینا پڑی ہے۔