بھارت میں تعینات دو بنگلہ دیشی سفارت کار برطرف
26 اگست 2024![محمد یونس](https://static.dw.com/image/69887941_800.webp)
ڈھاکہ کی نگراں حکومت کے ایک حکم کے مطابق بھارتی ہائی کمیشن میں خدمات انجام دینے والے دو بنگلہ دیشی سفارت کاروں کو ان کی ذمہ داریوں سے فارغ کر دیا گیا ہے۔ اطلاعات کے مطابق یہ حکم 17 اگست سے نافذ العمل ہوا۔
بنگلہ دیش اور بھارت کے مابین سرحدی کشیدگی کا آغاز کیوں؟
بھارت کے ایک معروف میڈيا ادارے انڈيا ٹوڈے نے ذرائع کے حوالے سے لکھا ہے کہ نئی دہلی میں واقع بنگلہ دیشی ہائی کمیشن میں کام کرنے والے شعبان محمود، فرسٹ سیکرٹری (پریس) سے کہا گیا ہے کہ وہ اپنا معاہدہ ختم ہونے سے پہلے ہی اپنا عہدہ چھوڑ دیں۔
بنگلہ دیش: سابق وزیر اعظم شیخ حسینہ کا سفارتی پاسپورٹ منسوخ
ادھر کولکاتہ میں بنگلہ دیشی قونصل خانے میں فرسٹ سکریٹری (پریس) کے عہدے پر فائز رنجن سین بھی ہفتے کے روز اپنے عہدے سے دستبردار ہو گئے۔ سین سے بھی کہا گیا تھا کہ وہ اپنا عہدہ فوری طور پر چھوڑ دیں۔
بنگلہ دیش: سابق وزیر اعظم خالدہ ضیاء کے بینک کھاتے بحال کرنے کا حکم
ان دونوں سفیروں کو سابق وزیراعظم شیخ حسینہ کی حکومت نے تعینات کیا تھا، جس میں سے رنجن سین کو مدت پوری ہونے کے بعد دوبارہ انہیں اسی عہدے پر برقرار ہنے کو کہا گیا تھا۔ البتہ اطلاعات ہیں کہ ان دونوں کے ڈھاکہ واپس جانے میں ابھی کچھ وقت لگ سکتا ہے۔
نئی دہلی اور ڈھاکہ کے نازک رشتے
بھارتی ذرائع ابلاغ میں لکھا گیا ہے کہ ڈھاکہ کی جانب سے اس طرح کے سخت اقدام سابق وزیراعظم شیخ حسینہ کی حکومت کے خاتمے کے بعد ایسے وقت میں کیے جا رہے ہیں، جب بھارت اور بنگلہ دیش کے درمیان رشتے کافی نازک موڑ پر ہیں۔
اس ماہ کے اوائل میں بھارت نے بھی اپنے پڑوسی ملک میں تشدد کے خدشات کے پیش نظر ڈھاکہ میں بھارتی ہائی کمیشن میں کام کرنے والے "غیر ضروری" عملے اور سفارت کاروں کے اہل خانہ کو واپس بلا لیا تھا۔
واضح رہے کہ شیخ حسینہ طلبہ کی قیادت میں ہونے والے بڑے پیمانے کے پر تشدد مظاہروں کے بعد وزارت عظمی کے عہدے سے مستعفی ہونے کے بعد پانچ اگست کو ملک سے فرار ہو کر بھارت آ گئی تھیں اور تب سے یہیں پر مقیم ہیں۔
امریکہ شیخ حسینہ کو ہٹانے میں ملوث نہیں، وائٹ ہاؤس
چند روز قبل ہی کی بات ہے کہ محمد یونس کی زیرقیادت نگراں حکومت نے شیخ حسینہ اور ان کی حکومت کے کئی سابق وزرا اور ارکان پارلیمان کے ریڈ (سفارتی) پاسپورٹ منسوخ کر دیے تھے۔
بنگلہ دیش کے معروف میڈيا ادارے ڈیلی اسٹار نے سرکاری ذرائع کے حوالے لکھا ہے کہ سابق وزیر اعظم شیخ حسینہ کے خلاف ملک میں قتل کے 42 کیسز سمیت 51 مقدمات دائر کیے گئے ہیں اور وہ ملک کی عدلیہ کو مطلوب ہیں۔
بنگلہ دیش میں اقلیتوں پر مبینہ حملوں کے سبب سرحد پر کشیدگی
بھارتی ذرائع ابلاغ میں مبصرین کے حوالے سے یہ بھی کہا جا رہا ہے کہ شیخ حسینہ کے سفارتی پاسپورٹ کی منسوخی کا مطلب یہ بھی کہ ان کے پاس اب ویزا کی بھی سہولت ختم ہو چکی ہے اور اس صورتحال میں اگر ان کی حوالگی کا مطالبہ ہوا تو ان کے لیے حالات مزید پیچیدہ ہو سکتے ہیں۔
واضح رہے کہ بھارت اور بنگلہ دیش کے درمیان حوالگی کا بھی ایک معاہدہ ہے اور اگر وہ بھارت میں مزید وقت گزارتی ہیں اور ڈھاکہ ان کی حوالگی کا مطالبہ کرتا ہے، تو اس قانونی فریم ورک کے تحت وہ خطرے میں پڑ سکتی ہیں۔
اگر ایسا ہوتا ہے، تو یہ نئی دہلی اور ڈھاکہ کے درمیان مزید پیچیدہ تعلقات کو جنم دے گا، جو پہلے ہی سے ہی کافی نازک ہیں۔
ابھی تک یہ بھی واضح نہیں ہے کہ شیخ حسینہ کا مستقبل کے بارے میں اپنا منصوبہ کیا ہے۔ وہ بھارت میں ہی رہیں گی یا پھر دوسرے ملک میں سیاسی پناہ کی متلاشی ہیں۔ انہوں نے اس پر اب تک کوئی تبصرہ نہیں کیا ہے، تاہم امریکہ میں مقیم ان کے بیٹے سجیب واجد جوائے نے اشارہ کیا ہے کہ وہ ایک طویل مدت کے لیے بھارت میں رہ سکتی ہیں۔
ص ز/ ج ا (نیوز ایجنسیاں)