اگر بیت الخلاء جیسی بنیادی سہولت مسیر نہ ہو تو پانی کے ذریعے پھیلنے والی بیماریاں (ٹائیفائڈ اور اسہال وغیرہ) تیزی سے پھیلتی ہیں۔ یہی مسئلہ کینیا میں غریبوں کی بستی کِبیرا کو لاحق تھا۔ وہاں لوگ پاخانہ پلاسٹک کے شاپر میں کرتے تھے اور اسے پھینک دیا جاتا تھا۔ جب سے وہاں ایسے ٹائلٹس بنے ہیں، بیماریوں میں کمی ہوئی ہے۔

بھارت کے کئی علاقوں میں ابھی تک ایسی کچی لیٹرینیں استعمال کی جاتی ہیں، جہاں پانی کی فراہمی کا کوئی نظام نہیں ہوتا۔ گزشتہ بیس برسوں سے بھارت میں اس کام کے لیے لوگوں کو بھرتی کرنا ممنوع ہے لیکن یہ عمل ابھی بھی جاری ہے۔ نئی دہلی میں رواں برس کے آغاز سے نام نہاد ’دستی صفائی‘ پر پابندی عائد ہے۔

بحران یا آفت زدہ علاقوں میں لاجسٹکس کی مشکلات کی وجہ سے ٹائلٹس کا قیام ایک مشکل کام ہے۔ بے گھر افراد کو انتظار میں کئی کئی گھنٹے لائن میں کھڑا ہونا پڑتا ہے۔ صومالیہ کے ان مہاجرین کو صاف ٹائلٹس کی اضافی سہولیات کی ضرورت ہے لیکن بنیادی ڈھانچے کے مسائل اس راہ میں رکاوٹ ہیں۔

شام کی تمام بین الاقوامی سرحدوں پر مہاجر کیمپ قائم ہو چکے ہیں۔ ہزار ہا مہاجرین کردستان کے نیم خود مختاد علاقے میں قائم اس عارضی کیمپ میں رہائش پذیر ہیں۔ ایسے کیمپ ضرورت سے زیادہ بھر چکے ہیں۔ گندے پانی کے ذریعے پولیو اور دیگر متعدی بیماریاں پھیل رہی ہیں۔

بولیویا کے دارالحکومت لاپاز کے مضافات میں واقع شہر ایل آلٹو میں ایسے بیت الخلاء بنائے گئے ہیں، جو فضلے کو مختلف حصوں میں تقسیم کر دیتے ہیں اور اسے دوبارہ کھاد کے طور پر استعمال کیا جا سکتا ہے۔ اس علاقے کے کسانوں کو یہ کھاد مفت فراہم کی جاتی ہے۔

تقریباﹰ بیس ملین یورپی باشندوں کو صفائی ستھرائی کی مناسب سہولیات میسر نہیں ہیں۔ مشرقی یورپ کے دیہات میں ابھی بھی لکڑی یا پھر لوہے کی چادروں سے بنی لیٹرینیں استعمال کی جاتی ہیں۔ ان علاقوں میں پینے کا پانی بھی آلودہ ہے اور اسے کنوؤں سے حاصل کیا جاتا ہے۔

غربت کے خلاف جنگ کا سستا ترین ذریعہ ایک سادہ قسم کا ٹائلٹ ہے۔ ایک امدادی تنظیم نے ایتھوپیا کی 55 سالہ ٹیرام آیاگو کے گھر میں ایک بیت الخلاء تعمیر کیا ہے۔ پہلے اس کے بچے اکثر بیمار رہتے تھے۔ اب ایسا نہیں ہے اور ادویات پر خرچ ہونے والی رقم سے اسکول کے اخراجات پورے کیے جا رہے ہیں۔

دنیا کے دور دراز علاقوں میں ٹائلٹس کے لیے نہ تو پانی ہے، نہ ہی بجلی یا نہ ہی کوئی سیوریج سسٹم۔ الاسکا کے ماؤنٹ مَیک کَینلی پر واقع اس بیت الخلاء سے شمالی امریکا کے سب سے اونچے پہاڑ کو دیکھا جا سکتا ہے۔ دنیا کے بہترین ٹائلٹس کے بارے میں کتاب لکھنے والے لُوک بارکلے نے اسے A loo with a view کا نام دیا ہے۔