تعلقات خوشی کے حصول میں سب سے اہم کردار ادا کرتے ہیں۔ گہرے اور مضبوط سماجی تعلقات کے حامل لوگ زیادہ آسودہ، صحت مند اور طویل زندگی پاتے ہیں۔ خاندان اور دوستوں کے ساتھ قریبی تعلقات، محبت اور تعاون اپنی زندگی کی قدر و قیمت سمجھنے اور اس میں اضافے کا باعث بنتے ہیں۔ لہٰذا اپنے تعلقات کو مضبوط بنانا اور نئے رابطے استوار کرنا پر مُسرت زندگی گزارنے کے لیے بہت اہم ہے۔

دوسروں کا خیال رکھنا ہماری خوش کے لیے بنیادی اہمیت رکھتا ہے۔ دوسروں کے کام آنے سے نہ صرف اُن لوگوں کو فائدہ پہنچاتا ہے بلکہ ہمیں مسرور کرتا ہے اور ہماری صحت پر مثبت اثرات بھی مرتب کرتا ہے۔ اسی طرح لوگوں کے لیے خرچ کرنا بھی اہم ہے مگر یہ صرف رقم کی بات نہیں بلکہ ہم اپنا وقت، آئیڈیاز اور توانائی بھی دیگر لوگوں کو منتقل کر سکتے ہیں۔ لہٰذا اگر ہم اچھا محسوس کرنا چاہتے ہیں تو ہمیں اچھا کرنا بھی چاہیے۔

ہمارا جسم اور ہمارا دماغ آپس میں ملے ہوئے ہیں۔ جسمانی سرگرمی سے ہمیں خوشی بھی حاصل ہوتی ہے اور یہ ہماری صحت کے لیے بھی بہترین ہے۔ یہ فوری طور پر ہمارے موڈ کو بھی بہتر کرتی ہے اور ڈپریشن کو بھی دور کرتی ہے۔ اس کے لیے پیدل چلنا اور عام ہلکی پھلکی ورزشیں وغیرہ بھی اہم کردار ادا کرتی ہیں۔

مستقبل کے لیے اچھا احساس ہماری خوش کے لیے بھی اہم ہوتا ہے۔ ہمیں پُر عزم رہنے کے لیے اہداف کی ضرورت ہوتی ہے اور یہ اس قدر تک چیلنجنگ ہونے چاہییں کہ ہمیں جوش بھی دلا سکیں مگر اُسی حد تک قابل حصول بھی ہوں۔ پرجوش اور حقیقت پسندانہ اہداف ہماری زندگی کو ایک سَمت فراہم کرتے ہیں اور ان کے حصول پر تکمیل اور کامیابی کا احساس ہمیں مُسرت فراہم کرتا ہے۔

کبھی آپ نے محسوس کیا کہ زندگی کو مزید بہتر ہونا چاہیے۔ یہ بالکل ممکن ہے۔ ضرورت صرف اس بات کی ہے کہ ہم اپنے آس پاس کی چیزوں پر توجہ مرکوز کریں۔ چیزوں کے بارے میں زیادہ جاننا اور ان کا احساس رکھنا ہماری زندگی کے تمام معاملات پر مثبت اثرات مرتب کرتا ہے۔ یہ رویہ ہمیں ماضی میں الجھے رہنے یا مستقبل کے بارے میں پریشان ہونے سے نجات دلاتا ہے۔

مثبت جذبات مثلاﹰ خوشی، شکر گزاری، قناعت، جوش اور فخر صرف وقتی طور پر ہی اچھے نہیں لگتے بلکہ ایک تازہ تحقیق سے معلوم ہوا ہے کہ ان جذبات کا مسلسل احساس آپ کے اندر حیرت انگیز تعمیری اثرات پیدا کرتا ہے۔ لہٰذا حقیقت پسندی کے ساتھ ساتھ معاملات کو مثبت نقطہٴ نظر سے دیکھنا بھی آپ کو مسرور رکھتا ہے۔ آدھے خالی گلاس کی بجائے ہمیشہ آدھے بھرے گلاس کا احساس رکھیے۔

سیکھنے کا عمل ہماری بہبود اور فلاح پر کئی طرح سے مثبت اثرات مرتب کرتا ہے۔ اس طرح ہم نئے خیالات سے متعارف ہوتے ہیں اور مصروفِ عمل اور پُر تجسس رہتے ہیں۔ اس سے ہمیں تکمیل کا احساس بھی ملتا ہے اور ہمارے اندر خود اعتمادی بھی پیدا ہوتی ہے۔ نئی چیزوں کے لیے ہم دوستوں کی مدد بھی لے سکتے ہیں، مختلف کلب بھی جوائن کر سکتے ہیں، گانا بجانا سیکھ سکتے ہیں یا پھر کوئی نیا کھیل کھیلنا شروع کر سکتے ہیں۔

ہم تمام لوگ مشکلات، نقصانات، ناکامیوں اور صدمات سے گزرتے رہتے ہیں، لیکن ہم ان کا مقابلہ کیسے کرتے ہیں، اس بات کی بہت زیادہ اہمیت ہے۔ نقصانات یا مشکلات کو روکنا ہمارے بس میں نہیں ہوتا، مگر اس کے ردعمل میں ہم کیا کرتے ہیں، یہ ہمارے اپنے بس میں ہوتا ہے۔ یہ آسان تو نہیں مگر مثبت انداز فکر کی بدولت ہم مشکل حالات سے نکل سکتے ہیں۔

پرفیکٹ یا کامل کوئی بھی نہیں ہوتا۔ لیکن اگر ہم اپنے پاس موجود چیزوں کو چھوڑ کر اُن چیزوں کا ماتم کرتے رہیں، جو ہم حاصل نہیں کر پائے تو یہ چیز ہماری خوشی کی راہ میں سب سے بڑی رکاوٹ بن جاتی ہے۔ ہم جو کچھ ہیں، اس بات کو تسلیم کرنے اور کسی غلطی کی صورت میں اپنی ذات کو معاف کر دینے سے ہماری زندگی زیادہ پر مسرت اور مسرور ہو سکتی ہے۔ پھر یہ ہماری اپنی فلاح کے لیے بھی اہم ہے۔

وہ لوگ جو زندگی کا کوئی مقصد رکھتے ہیں، ان کی زندگی زیادہ آسودہ ہوتی ہے۔ وہ ذہنی دباؤ، پریشانی اور ڈپریشن کا بھی کم شکار رہتے ہیں۔ لیکن ہم زندگی کا مقصد کیسے حاصل کریں؟ یہ ہمارا مذہب بھی ہو سکتا ہے، اپنے بچوں کی بہتری بھی یا پھر کوئی نئی ملازمت بھی۔ مختلف لوگوں کے لیے اس کا جواب تو مختلف ہو سکتا ہے مگر پُرمسرت زندگی کے لیے اس کے اثرات یقیناﹰ مثبت ہوتے ہیں۔

ہندو کمیونٹی رام نامی سماج سے تعلق رکھنے والے زیادہ تر افراد نچلی ذات کے ہندو تصور کیے جاتے ہیں۔ اپنے جسم کے مختلف حصوں پر رام کے نام کے ٹیٹوز بنواتے ہوئے دراصل وہ یہ دکھانا چاہتے ہیں کہ دیوتا صرف اعلیٰ ذات کے ہندوؤں تک ہی محدود نہیں بلکہ ہر جگہ موجود ہوتے ہیں۔

اپنے ان ٹیٹوز کے ذریعے وہ ہندو دیوتا رام کے لیے اپنی گہری عقیدت کا بھی اظہار کرتے ہیں۔ ہندو دیوتا رام کو ایک بادشاہ کے ساتھ ساتھ بہت عالم فاضل اور دیکھنے میں بہت خوبصورت تصور کیا جاتا ہے۔ رام کے ایک سو سے زیادہ مختلف نام ہیں، ’ہمیشہ رہنے والا‘ اور ’اعلیٰ ترین روح‘ سے لے کر ’ابدی زندگی عطا کرنے والا‘ تک۔

نچلی ذات سے تعلق رکھنے کی بناء پر رام نامیوں کو مندروں میں جانے کی اجازت نہیں ہوتی اور وہ اُن پانیوں میں بھی نہیں جا سکتے، جہاں اعلیٰ ذات کے ہندو جاتے ہیں۔ اپنے وقار کو قائم رکھنے کے لیے رام نامیوں نے ٹیٹوز کا راستہ اختیار کیا۔ آج کے بھارت میں ذات پات سے وابستگی کی بناء پر کسی شخص کے ساتھ کسی بھی طرح کا امتیازی سلوک کرنا منع ہے۔ اس کے باوجود ذات پات کو بدستور بے حد اہمیت دی جاتی ہے۔

رام کا نام سنسکرت یعنی پرانی ہندی زبان میں جِلد کے اندر کھود کر لکھا جاتا ہے۔

رام نامی سماج کی خواتین بھی اپنے بدن پر ٹیٹوز بنواتی ہیں۔ بھارت میں رام نامی سماج سے تعلق رکھنے والے شہریوں کی مجموعی تعداد تقریباً ایک لاکھ بتائی جاتی ہے۔

رام نامی اپنی پوری زندگی کو رام کے نام وقف کر دیتے ہیں۔ تقریباً ہر گھر میں رامائن کی ایک جلد موجود ہوتی ہے۔ رام نامیوں کے ملبوسات پر بھی اور اندر باہر سے اُن کے گھروں میں بھی ہر جگہ رام دیوتا کا نام لکھا نظر آتا ہے۔

رام نامیوں کی نوجوان نسل اپنے پورے جسم پر ٹیٹوز نہیں بنواتی اور اس ہندو کمیونٹی کے بزرگوں کے لیے اپنی نئی نسل کا یہ رجحان قابلِ فہم ہے۔ بزرگ کہتے ہیں کہ بھلے ہی نئی نسل پورے جسم پر ٹیٹوز نہیں بنواتی لیکن اس کا یہ مطلب نہیں ہے کہ اُس نے اپنا عقیدہ بھی چھوڑ دیا ہے۔