بھارتی صحرائی ریاست راجستھان کے شہر پھلودی میں 123.8 فارن ہائٹ نے ملک بھر میں گرمی کا اب تک کا ریکارڈ توڑ دیا ہے۔ اس سے قبل بھارت میں سن 1956 میں سب سے زیادہ درجہ حرارت 50.6 ڈگری سینٹی گریڈ ریکارڈ کیا گیا تھا۔

بھارتی محکمہ موسمیات کے ڈائریکٹر بی پی یادو نے خبر رساں ادارے اے ایف پی کو بتایا کہ جمعرات پھلودی میں بھارت کی تاریخ کا گرم ترین دن تھا۔

شمالی بھارت میں مئی اور جون عام طور پر سال کے گرم ترین مہینوں میں شمار ہوتے ہیں، جب یہاں درجہ حرارت چالیس ڈگری سے اوپر چلا جاتا ہے لیکن درجہ حرارت کا 50 ڈگری سینٹی گریڈ سے تجاوز کر جانا غیر معمولی ہے۔

بھارت کے محکمہ موسمیات کے مطابق اس ہفتے کے آخر میں ملک کے شمالی اور مغربی علاقے شدید گرمی کی لپیٹ میں رہیں گے۔ سخت گرمی سے متاثرہ علاقوں میں مغربی ریاست گجرات اور راجستھان کے علاوہ وسطی ریاست مدھیہ پردیش کے کچھ علاقے بھی شامل ہیں۔ حکام کے مطابق آئندہ دو روز میں ان علاقوں میں درجہ حرارت سینتالیس ڈگری سینٹی گریڈ تک یا پھر اس سے بھی تجاوز کر سکتا ہے۔

اسی دوران حکام نے عوام کو موسم کی شدت سے بچنے کے لیے احتیاطی تدابیر اختیار کرنے کی ہدایات جاری کر دی ہیں۔ بھارت پہلے ہی خبردار کر چکا ہے کہ اس سال ملک میں زیادہ گرمی پڑے گی اور گرم علاقوں میں درجہ حرارت گزشتہ سالوں سے اوسطاً 5 ڈگری زیادہ ہو سکتا ہے۔

یاد رہے کہ بھارت میں اس برس اپریل کے اوائل سے ہی گرمی کی شدت میں اضافہ ہو گیا تھا، جب موسم گرما کی ابتدائی لہر کی وجہ سے بھارت کی جنوبی ریاستوں تلنگانہ اور آندھرا پردیش میں کم از کم چورانوے افراد لقمہ اجل بن گئے تھے۔