برصغیر میں تقریباً تمام کھانوں میں استعمال ہونے والے ٹماٹر کی قیمتیں ان دنوں بھارت میں آسمان چھو رہی ہیں۔ عام طورپر 20 روپے فی کلوگرام فروخت ہونے والا ٹماٹر ان دنوں 160روپے کلو تک فروخت ہو رہا ہے۔

وزیر اعظم نریندر مودی کے انتخابی حلقے وارانسی میں ایک شخص نے اس 'قیمتی شئے' کی حفاظت کے لیے محافظوں کی خدمات حاصل کرلیں۔ لیکن اس معاملے میں سیاسی رنگ شامل ہوگیا اور پولیس نے سبزی منڈی میں "افراتفری پھیلانے اور نقص امن" کا الزام لگاکر اپوزیشن سماج وادی پارٹی کے ایک رہنما سمیت پانچ افراد کو گرفتار کرلیا۔

معاملہ کیا تھا؟

بڑھتی ہوئی مہنگائی اور ٹماٹر کی آسمان چھوتی قیمتوں کی جانب حکومت کی توجہ مبذول کرانے کے لیے سماج وادی پارٹی کے ایک مقامی رہنما اجئے یادو نے احتجاج کا ایک نیا طریقہ اپنایا۔ انہوں نے مقامی سبزی منڈی میں ٹماٹر فروخت کرنے والے ایک دکان پر پانچ باونسرز تعینات کر دیے۔ ان کا کہنا تھا کہ باونسرز اس لیے تعینات کیے گئے تاکہ کوئی اس قیمتی چیز کو لوٹ نہ لے۔

ٹماٹر: پاک بھارت کشیدگی کی زد میں

اجئے کا کہنا تھا کہ انہوں نے ایسا بطور احتجاج کیا تھا تاکہ وزیر اعظم مودی کی توجہ بھی اس جانب مبذول ہو سکے جو ان دنوں وارانسی دورے پر آئے ہوئے تھے۔

مقامی پولیس افسر متھلیش یادو نے بتایا کہ اجئے یادو اور دکاندار سمیت پانچ لوگوں کو گرفتار کیا گیا ہے۔ ان کے مطابق اس احتجاج کی وجہ سے نقص امن کا خطرہ پیدا ہو گیا تھا اس لیے انہیں گرفتار کرلیا گیا۔ تاہم اس کی مزید تفصیلات نہیں بتائیں۔

نقص امن کا خطرہ

پولیس افسر کا کہنا تھا، "ان لوگوں نے سبزی کی ایک دکان پر احتجاج کیا اور احتجاجاً خود بھی سبزیاں فروخت کیں۔ انہوں نے دو باونسرز کی خدمات حاصل کی تھیں اور میڈیا کو بتایا تھا ایسا ٹماٹروں کی حفاظت کے لیے کیا ہے۔ ان لوگوں نے دکان پر پلے کارڈ بھی لگا رکھے تھے جن پر ٹماٹروں اور دیگر سبزیوں کی آسمان چھوتی قیمتوں کے خلاف نعرے درج تھے۔"

پولیس افسر نے حالانکہ تسلیم کیا کہ باونسروں یا اجئے یادو کی کسی سے کوئی لڑائی نہیں ہوئی۔

ٹماٹر کی قیمتوں میں 288 فیصد اضافہ

شمالی بھارت میں ٹماٹر کی قیمتوں میں ایک ماہ کے اندر288 فیصد کا اضافہ ہوا ہے۔ تین ہفتے قبل یہ 20 روپے کلو مل رہے تھے لیکن اب ان کی قیمت بڑھ کر 160روپے فی کلوگرام تک ہو گئی ہے۔ جس کی وجہ سے بہت سے لوگوں نے ٹماٹر کھانا بھی چھوڑ دیا ہے۔

اجئے یادو کا کہنا تھا کہ ٹماٹر اب لوگوں کے کھانے میں نایاب ہو گیا ہے اور لوگ مجبوراً اب 50 اور 100 گرام ٹماٹر خرید رہے ہیں۔

 معروف عالمی فوڈ چین میک ڈونلڈ نے بھی ٹماٹر کی قلت کا حوالہ دیتے ہوئے اس ہفتے اپنے برگرز میں ٹماٹر ڈالنے بند کر دیے۔

’اب لال ٹماٹر کو ترسے گا پاکستان‘

اجئے یادو کے ایک رشتہ دار نے کہا کہ انہیں خدشہ ہے کہ انہیں اس احتجاج کی بھاری قیمت ادا کرنی پڑسکتی ہے کیونکہ وارانسی ڈیولپمنٹ اتھارٹی کے حکام ان کے گھر آئے تھے اور گھر کے دستاویزات طلب کیے۔ انہوں نے کہا کہ انہیں ڈر ہے کہ اترپردیش میں یوگی ادیتیہ ناتھ حکومت ان کے گھر کو منہدم کرنے کے لیے کوئی جواز تلاش کر رہی ہے۔

خیال رہے کہ بی جے پی کی قیادت والی یوگی ادیتیہ ناتھ حکومت مبینہ مجرموں کے گھروں کو منہدم کرنے کے لیے بدنام ہے۔

دریں اثنا اترپردیش کے سابق وزیر اعلیٰ اکھلیش یادو نے ایک طنزیہ ٹویٹ میں کہا،"بی جے پی کو ٹماٹروں کو زیڈ پلس سکیورٹی دینی چاہئے۔ "