اترپردیش میں امروہہ شہر کی رہنے والی اڑتیس سالہ شبنم نے اپنے عاشق کے ساتھ مل کر اپنے کنبے کے سات افراد کو قتل کر دیا تھا۔ اس ہولناک جرم کے لیے سپریم کورٹ نے بھی ان کی سزائے موت کو برقرار رکھا اور بھارتی صدر بھی ان کی رحم کی اپیل مسترد کر چکے ہیں۔

تیاریاں تقریباﹰ مکمل

متھرا جیل کے سپرنٹنڈنٹ شیلیندر کمار میتریہ نے میڈیا کو بتایا کہ شبنم کو پھانسی پر لٹکانے کی تاریخ ابھی مقرر نہیں کی گئی ہے لیکن تمام ضروری تیاریاں شروع کردی گئی ہیں اور ڈیتھ وارنٹ جاری ہوتے ہی شبنم کو پھانسی دے دی جائے گی۔ میرٹھ سے پون جلاد کو بلالیا گیا ہے، جس نے نربھیا کیس کے مجرموں کو پھانسی دی تھی۔ بہار کے بکسر جیل سے پھانسی کے لیے خصوصی رسی بھی منگوا لی گئی ہے۔

جیل سپرنٹنڈنٹ نے مزید بتایا کہ پون جلاد پھانسی گھاٹ کا کئی بار معائنہ کر چکا ہے اور اس میں بعض ضروری ترمیم کا مشورہ بھی دیا ہے۔

بھارت میں صرف متھرا جیل میں ہی خواتین کو پھانسی دینے کا انتظام ہے۔ یہ پھانسی گھاٹ تقریباً ڈیڑھ سو برس پہلے تعمیر کیا گیا تھا لیکن وہاں آج تک کسی کو پھانسی پر لٹکایا نہیں گیا۔ اس پھانسی گھاٹ کی حالت بہت خراب ہے لہذا اسے ٹھیک کیا جا رہا ہے۔

ابھی امید باقی ہے

شبنم کی سزائے موت کے فیصلے کو نچلی عدالت سے لے کر سپریم کورٹ تک سب نے برقرار رکھا ہے اور بھارتی صدر رام ناتھ کووند نے بھی رحم کی اپیل مسترد کر دی ہے تاہم ماہرین قانون کا خیال ہے کہ امید اب بھی باقی ہے۔

سپریم کورٹ کے وکیل سارتھک چترویدی کہتے ہیں کہ شبنم سپریم کورٹ میں فیصلے پر نظرثانی کے لیے ایک اور اپیل کر سکتی ہیں۔ وہ کیوریٹیو پٹیشن داخل کر سکتی ہیں۔ ان کا کہنا ہے کہ کسی شخص کو تمام قانونی چارہ جوئی ختم ہونے تک پھانسی پر نہیں لٹکایا جانا چاہیے۔

شبنم کے بارہ سالہ بیٹے تاج نے بھی بھارتی صدر سے ایک جذباتی اپیل کرتے ہوئے کہا ”صدر انکل جی! پلیز میری ماں شبنم کو معاف کر دیجیے۔"

عشق تیرے انجام پر رونا آیا

امروہہ کے باون کھیڑی گاؤں کی رہنے والی شبنم نے اپنے عاشق سلیم کے ساتھ مل کر 14 اپریل 2008 ء کی رات اپنے کنبے کے سات افراد کو قتل کر دیا تھا۔ ان میں والدین، دو بھائی، بھابھی، چچا زاد بھائی اور دس ماہ کا بھتیجا بھی شامل تھا۔ اس واردات کے چند دنوں بعد ہی دونوں کو گرفتار کرلیا گیا تھا۔

جائیداد کا کوئی وارث نہ بچے

شبنم سلیم سے شادی کرنا چاہتی تھی لیکن سماجی اور اقتصادی حیثیت میں کافی فرق ہونے کی وجہ سے شبنم کے گھر والے اس کے لیے تیار نہیں تھے۔ شبنم نے دو مضامین میں ایم اے کر رکھے ہیں اور وہ ایک اسکول میں ٹیچر تھیں جبکہ سلیم محض مڈل اسکول پاس ہے اور یومیہ مزدوری کرتا تھا۔ گرفتاری کے وقت شبنم دو ماہ کی حاملہ تھی۔ ان کے بیٹے کی پیدائش جیل میں ہی ہوئی۔ بھارتی قانون کے مطابق بیٹا پانچ برس تک ماں کے ساتھ رہا۔ بعد میں ایک شخص نے بچے کو گود لے لیا جو اب بارہ برس کا ہو چکا ہے اور ایک اسکول میں زیر تعلیم ہے۔

سپریم کورٹ نے اپنے فیصلے میں کہا ہے کہ مجرموں نے نہایت چالاکی سے قتل کا پورا منصوبہ تیار کیا۔ شبنم نے رات میں کھانے کے بعد چائے میں نیند کی گولیاں ملادیں اور جب سب لوگ بے خبر ہو گئے تو ان کے گلے کاٹ دیے گئے۔

سپریم کورٹ کے چیف جسٹس ایس اے بوبڈے پر مشتمل تین رکنی بنچ نے اپنے فیصلے میں لکھا ہے”ان لوگوں کا مقصد یہ تھا کہ شبنم کے علاوہ خاندان کا کوئی وارث باقی نہ رہے تاکہ اس کے والدین کی کافی بڑی جائیداد پر قبضہ کر لیا جائے، جو ان کی شادی کے خلاف تھے۔"

پھانسی کی منتظر دیگر خواتین

دو سوتیلی بہنیں رینوکا شنڈے اور سیما گاوت بھی پھانسی کی منتظر ہیں۔ انہیں تیرہ بچوں کے اغوا اور ان میں سے کم از کم پانچ کو قتل کر دینے کا قصوروار ٹھہرایا گیا ہے۔

دہلی کی نیشنل لاء یونیورسٹی کی ایک رپورٹ کے مطابق بھارت میں آزادی کے بعد سے اب تک 750 سے زائد مردوں کی پھانسی کی سزا پر عمل درآمد کیا جا چکا ہے۔ گزشتہ دو عشروں کے دوران آٹھ افراد کو پھانسی دی گئی ہے۔