بھارت میں حکام کا کہنا ہے کہ اتوار کے روز جنوبی ریاست آندھرا پردیش کے ضلع وجیا نگرم میں دو مسافر ٹرینوں کے آپس میں ٹکرانے کے نتیجے میں کم از کم 13 افراد ہلاک اور پچاس سے زائد زخمی ہو گئے۔

بھارت: ٹرین کی ایک بوگی میں آتش زدگی، نو افراد ہلاک

محکمہ ریل کے سینیئر افسر سورب پرساد نے ایسوسی ایٹیڈ پریس نیوز ایجنسی کو بتایا کہ پیچھے سے آنے والی ایک ٹرین آگے پٹری پر کھڑی دوسری ٹرین سے ٹکرا گئی، جس کی وجہ سے کم از کم ریل کے تین ڈبے پٹری سے اتر گئے۔ دوسری طرف بھارتی وزارت ریل نے اپنے بیان میں کہا کہ دو بوگیاں پٹری سے اتر گئیں۔

بھارت: ٹرین کے پٹری سے اترنے پر متعدد افراد ہلاک

وزارت ریل کا مزید کہنا تھا کہ ابتدائی تحقیقات سے پتا چلا ہے کہ ڈرائیو نے ''سگنل کا خیال نہیں رکھا'' اور ریڈ لائٹ کے باوجود اس نے ریل نہیں روکی جس کی بنا پر ''انسانی غلطی'' تصادم کی وجہ بنی۔

اڑیسہ ٹرین حادثہ کی وجہ الیکٹرانک سگنلنگ سسٹم میں خرابی

مالی معاوضے کا اعلان

بھارتی وزیر اعظم نریندر مودی نے سوشل میڈیا ایکس پر اپنے ایک بیان میں کہا کہ انہوں نے اس سلسلے میں وفاقی وزیر ریل سے بات کی ہے۔ انہوں نے ''سوگوار خاندانوں سے تعزیت کا اظہار کیا اور زخمیوں کی جلد صحت یابی کی دعا کی۔''

مودی نے حادثے میں ہلاک ہونے والوں کے لواحقین کے لیے دو لاکھ روپے کے مالی معاوضے کا بھی اعلان کیا ہے۔

ریاست آندھرا پردیش کے وزیر اعلی وائی ایس جگن موہن ریڈی نے حکام سے کہا کہ وہ زیادہ سے زیادہ ایمبولینسیں جائے حادثہ پر بھیجیں اور دیگر امدادی اقدامات کریں۔

بھارت میں ٹرین حادثے ایک عام بات ہیں اور اکثر ان حادثوں کا الزام انسانی غلطی یا سگنل کے پرانے آلات پر عائد کیا جاتا ہے۔

رواں ماہ کی 12 تاریخ کو محکمہ ریل کے حکام نے بتایا تھا کہ دہلی سے روانہ ہونے ایک ٹرین کا بہار میں حادثہ پیش آیا تھا، جس میں چھ افراد ہلاک ہو گئے تھے۔ نارتھ ایسٹ ایکسپریس نا می اس ٹرین کے حادثے میں 80 کے قریب مسافر زخمی بھی ہوئے تھے۔

رواں برس جون میں الیکٹرانک سگنلنگ سسٹم میں خرابی کی وجہ سے ریاست اوڑیسہ میں ایک مسافر ٹرین غلط طریقے سے پٹریوں کو تبدیل کر کے ایک مال بردار ٹرین سے ٹکرا گئی تھی۔

اس حادثے میں 280 سے زیادہ افراد ہلاک اور سینکڑوں زخمی ہو گئے تھے۔ اسے کئی دہائیوں میں ملک کے ہلاکت خیز حادثات میں سے ایک قرار دیا گیا تھا۔

بھارت میں تقریباً 22 لاکھ سے بھی زیادہ لوگ ہر روز 14,000 ٹرینوں کے ذریعے ملک کے مختلف حصوں کا سفر کرتے ہیں۔

ص ز/ ج ا (روئٹرز، اے ایف پی)