دارالحکومت دہلی سے ملحق گروگرام (گڑگاؤں) شہر کی پولیس نے عدالت کے حکم پر سابق روسی ٹینس اسٹار ماریا شاراپووا اور سابق فارمولا ون عالمی چیمپیئن مائیکل شوماخر اور دیگر گیارہ افراد کے خلاف دھوکہ دہی اور مجرمانہ سازش جیسے تعزیرات کے تحت مقدمہ درج کیا ہے۔ یہ کیس دہلی کی ایک خاتون کی شکایت پر درج کیا گیا ہے، جنہوں نے ان دونوں عالمی کھلاڑیوں پر دھوکہ دہی کے الزامات عائد کیے تھے۔

کیا ہے معاملہ؟

شیفالی اگروال نامی خاتون نے میڈیا سے بات چیت کرتے ہوئے کہا کہ انہوں نے شاراپووا کے نام پرتعمیر کیے جانے والے ایک رہائشی کمپلکس میں ایک اپارٹمنٹ بک کرایا تھا۔ اسی رہائشی کمپلکس میں شوماخر کے نام پر بھی ایک ٹاور تعمیر کرانے کی بات کی گئی تھی۔ تعمیراتی کمپنی ریئل ٹیک ڈیولپمنٹ اینڈ انفرااسٹرکچر لمیٹیڈ نے سن 2016 میں ہی اپارٹمنٹ ان کے حوالے کرنے کا وعدہ کیا تھا لیکن تعمیر کا کام اب تک شروع ہی نہیں ہوسکا ہے۔

شیفالی اگروال کا کہنا ہے کہ شاراپووا اور شوماخر نے ان کے ساتھ 80 لاکھ روپے کی دھوکہ دہی کی۔ انہوں نے سن2018 میں اس کی شکایت، شکایتوں کے ازالہ کے قومی کمیشن (این سی ڈی آر سی) میں کی۔ جس نے دونوں کے خلاف کیس درج کرنے کا حکم دیا۔ لیکن متعلقہ حکام نے کوئی کارروائی نہیں کی جس کے بعد انہیں عدالت سے رجوع کرنا پڑا۔ عدالت نے ان دونوں بین الاقوامی کھلاڑیوں کے خلاف مقدمہ درج کرنے کا حکم دیا۔

گروگرام پولیس کا کہنا تھا، ''ان دونوں کے خلاف بدھ کے روز دھوکہ دہی اور مجرمانہ سازش کا کیس درج کرلیا گیا ہے اور ہم معاملے کی تفتیش کررہے ہیں۔‘‘ انہوں نے بتایا کہ کیس میں تعمیراتی کمپنی کے کئی عہدیداروں کو بھی نامزد کیا گیا ہے۔

شاراپووا اور شوماخر کے نام پر دھوکہ دہی

شکایت کنندہ شیفالی اگروال کا کہنا ہے کہ شاراپووا اور شوماخر مذکورہ تعمیراتی پروجیکٹ کے پروموٹرز میں سے تھے۔ انہوں نے کسٹمرز کو لبھانے کے لیے کئی جھوٹے وعدے اور دعوے کیے۔ پروجیکٹ کے حوالے سے جو تعارفی کتابچہ شائع کیا گیا تھا اس پر دونوں کھلاڑیوں کی تصویریں تھیں۔ شاراپووا نے وعدہ کیا تھا کہ مکان خریدنے والوں کے ساتھ وہ ڈنر کریں گی۔ جبکہ انہوں نے ایک ٹینس اکیڈمی اور اسپورٹس اسٹور کھولنے کا بھی وعدہ کیا تھا۔

شیفالی اگروال کا مزید کہنا تھا کہ ان کھلاڑیوں کے وعدوں کے جال میں پھنس کر انہوں نے اپنے تقریباً 80 لاکھ روپے لگا دیے لیکن مکان تو دور کی بات ابھی تک اس کا سنگ بنیاد بھی نہیں رکھا گیا ہے۔

ماریا شاراپووا اور شوماخر کے خلاف بھارتی تعزیرات کی جن دفعات کے تحت کیس درج کیے گئے ہیں ان کی رو سے تین سال تک قید ، جرمانہ یا دونوں کی سزا ہوسکتی ہے۔