مغربی بنگال کی وزیر اعلی ممتا بینرجی کے بعد اب مہاراشٹر کی حکمراں جماعت شیو سینا نے سری لنکا کے اقتصادی بحران کے حوالے سے نریندر مودی حکومت کو متنبہ کرتے ہوئے کہا کہ بھارت بھی اسی راہ پر گامزن ہے جس پر چل کر سری لنکا اس بحران میں گرفتار ہوا اور اگر بروقت اقدامات نہ کیے گئے تو بھارت کی حالت پڑوسی ملک سے زیادہ خراب ہوسکتی ہے۔

 مغربی بنگال کی وزیر اعلی ممتا بینرجی کا کہنا ہے کہ بھارت کی اقتصادی حالت سری لنکا سے بھی بدتر ہے۔ پٹرول اور ڈیزل کی قیمتوں میں مسلسل اضافہ ہورہا ہے لیکن وزیر اعظم نریندر مودی اس کا حل تلاش کرنے کے لیے سیاسی جماعتوں کے ساتھ صلاح و مشورہ کرنے کے بجائے مرکزی ایجنسیوں کا استعمال کرکے اپنے سیاسی مخالفین کا منہ بند کرنے کی کوشش کررہے ہیں۔ ان کا مزید کہنا تھا کہ ایندھن کی بڑھتی قیمتوں پر قابو پانے کے لیے مرکز کے پاس کوئی منصوبہ نہیں ہے۔

شیو سینا کے رکن پارلیمان سنجے راوت نے منگل کے روز کہا کہ سری لنکا کی صورت حال کافی تشویش ناک ہے اور بھارت بھی اسی راستے پر ہے۔ اور اگر ہم نے اسے نہیں سنبھالا تو ہماری حالت سری لنکا سے بھی زیادہ خراب ہوگی۔

ماہرین کیا کہتے ہیں؟

ماہرین کا کہنا ہے کہ سری لنکا کے اقتصادی بحران کے لیے متعدد اسباب ہیں۔

کولمبو یونیورسٹی میں اقتصادیات کے پروفیسر امرتھا لنگم کا کہنا ہے کہ جنوب ایشیائی ملکوں کی تعاون تنظیم سارک کا غیر فعال ہونا بھی سری لنکا کے اقتصادی بحران کی وجہ ہے۔

 پروفیسر لنگم نے فون پر ڈی ڈبلیو سے بات چیت کرتے ہوئے کہا،"سارک کے مقاصد میں اس کے رکن ملکوں کی اقتصادی مدد کرنا بھی شامل ہے لیکن بھارت اور پاکستان کے درمیان تعلقات میں کشیدگی کی وجہ سے سارک ٹھیک سے کام نہیں کر پایا اور سری لنکا کی معیشت کا رخ چین کی طرف ہو گیا۔"

انہوں نے کہا کہ سری لنکا کو یہ احساس ہوگیا ہے کہ اس اقتصادی بحران کے لیے چین بھی ذمہ دار ہے۔ "سری لنکا چین سے لیے گئے قرض کو ادا نہیں کرسکا جس کی وجہ سے اسے اپنی اہم بندرگاہ چین کو 99 سال کے لیے لیز پر دینا پڑی۔" انہوں نے مزید کہا کہ سری لنکا کی پالیسی اب بھارت کی طرف جھک رہی ہے اس کی وجہ یہ ہے کہ نئی دہلی اس کی مدد کررہا ہے۔''

خیال رہے کہ بھارت نے گزشتہ تین ماہ کے دوران سری لنکا کو2.4 ارب ڈالر کی مالی مدد کی ہے۔

سری لنکا بحران سے بھارت کو کیا مسائل ہوسکتے ہیں؟

سری لنکا کے اقتصادی بحران نے بھارت کے جنوبی ساحل پر دستک دے دی ہے۔ اقتصادی بدحالی سے دوچار سری لنکا کے عوام بھارت میں پناہ لینے کی کوشش کررہے ہیں اور بھارت میں ان کی آمد کا سلسلہ شروع ہوگیا ہے۔

اسٹریٹیجک امور کے ماہر امت بنسل کا کہنا ہے کہ سری لنکا میں جب بھی کوئی سیاسی یا سماجی بحران پیدا ہوا وہاں سے بڑی تعداد میں پناہ گزین بھارت آئے ہیں۔ ان کا کہنا ہے کہ اس کے ایک اہم وجہ یہ ہے کہ سری لنکا اور بھارت کی تمل کمیونٹی میں صدیوں پرانے رشتے ہیں۔ ایک اور وجہ یہ بھی ہے کہ سری لنکا میں خانہ جنگی کے بعد تمل کمیونٹی کا سری لنکا کی حکومت پر سے اعتبار کم ہوا ہے۔

امت بنسل کا کہنا تھا کہ بڑے پیمانے پر پناہ گزینوں سے نمٹنا بھارت کے لیے کافی دشوار ہوگا۔ جیسا کہ ہم سن نوے کی دہائی میں دیکھ چکے ہیں۔ لیکن اس مرتبہ یہ مسئلہ اور بھی زیادہ سنگین ہوگا۔ پناہ گزینوں نے بھارت آنا شروع کردیا ہے لہذا نئی دہلی کو اس صورت حال سے نمٹنے کے لیے ایک ٹھوس پالیسی بنانی ہوگی۔

باغیوں کا مسئلہ

امت بنسل کہتے ہیں کہ حالانکہ سری لنکا کی حکومت یہ دعوی کرتی ہے کہ اس نے سن 2009 میں ہی تمل باغیوں کو پوری طرح سے ختم کردیا ہے۔ لیکن حقیقت یہ ہے کہ تملوں کو حکومت میں آج تک خاطرخواہ نمائندگی نہیں مل سکی ہے۔ اور صرف تمل باغی ہی نہیں بلکہ متعدد دیگر ناراض گروپ بھی موجود ہیں جو اس بحران کے وقت ہتھیار اٹھا سکتے ہیں اور یہ بھارت کے لیے فکر مندی کی بات ہوگی۔

بھارت کے لیے تجارتی مسائل

بھارت روایتی طور پر سری لنکا کے سب سے بڑے تجارتی شراکت داروں میں سے ایک ہے۔ سری لنکا کی درآمدات کا 20 فیصد سے زیادہ بھارت سے جاتا ہے۔ سن 2015 سے 2019 کے درمیان بھارت سری لنکا میں سب سے زیادہ غیر ملکی سرمایہ کرنے والے ملکوں میں سے ایک تھا۔

متعدد اہم بھارتی کمپنیوں نے سری لنکا میں سرمایہ کاری کررکھی ہے۔

سری لنکا نے گزشتہ برس آرگینک فارمنگ پر پوری طرح انحصار کرنے اور کیمیائی کھادوں پر پابندی عائد کرنے کا فیصلہ کیا۔ سری لنکا حکومت کا یہ فیصلہ جہاں خود اس کے لیے نقصان دہ ثابت ہوا وہیں اس سے بھارتی تاجر بھی متاثر ہوئے۔ اس وقت تاجروں کے اناج سے بھرے ہزاروں کنٹینر کولمبو بندرگاہ پر موجود ہیں۔