بھارت: کشمیر میں فوجی قافلے پر حملہ، درجنوں فوجی ہلاک
14 فروری 2019
بھارت کے زیر انتظام کشمیر میں نیم فوجی دستوں کے ایک قافلے پر ہونے والےخود کش کار بم حملے میں تیس سے زائد فوجی ہلاک جبکہ درجنوں دیگر زخمی ہو گئے ہیں۔ کشمیر کے گورنر نے اس حملے کی ذمہ داری پاکستان پر عائد کی ہے۔
تصویر: picture-alliance/AP Photo/U. Asif
اشتہار
کشمیر کے گورنر ستیاپال ملک نے کہا ہے کہ اس حملے کے پیچھے پاکستان کا ہاتھ ہے، ’’جیش محمد کی جانب سے ذمہ داری قبول کرنے کے بعد تو ایسا دکھائی دیتا ہے جیسے اس واقعے کی ہدایات سرحد پار سے دی گئی ہوں۔‘‘ بھارتی وزیر اعظم نریندر مودی نے بھی اس حملے کی شدید مذمت کی ہے۔
گریٹر کشمیر نامی اخبار نے بھی تصدیق کی ہے کہ شدت پسند تنظیم جیش محمد نے اس حملے کی ذمہ داری قبول کر لی ہے۔ مقامی ذرائع ابلاغ مرنے والے فوجیوں کی تعداد 34 سے زائد بتا رہے ہیں۔ سماجی ویب سائٹس پر پہلے سے بنائی گئی نو منٹ طویل ایک ویڈیو میں جنگی کپڑوں میں ملبوس مشتبہ حملہ آور کو دیکھا جا سکتا ہے، جس کے ارد گرد اسلحہ و بارود رکھا ہوا ہے۔
تصویر: Reuters/Y. Khaliq
ایک مقامی ذریعے نے حملہ آور کی عادل احمد نامی ایک کشمیری باغی کے طور پر شناخت کی ہے، جس کا تعلق پلوامہ کے علاقے سے ہے۔ خبر رساں اداروں کے مطابق فوجی قافلے کو اس وقت نشانہ بنایا گیا، جب وہ ایک اہم ہائی وے سے گزر رہا تھا۔ اسے اس خطے میں ہونے والے خونریز ترین حملوں میں سے ایک قرار دیا جا رہا ہے۔
ایک پولیس افسر منیر احمد خان نے بتایا کہ حملہ آور نے قافلے کو سری نگر کے مضافات میں واقع جنوبی لیتہ پورہ کے علاقے کے قریب نشانہ بنایا۔ خان کے مطابق دھماکے سے بس مکمل طور پر تباہ ہو گئی جبکہ مزید پانچ گاڑیوں کو بھی نقصان پہنچا۔
تصویر: AFP/H. Naqash
بھارتی حکام نے بتایا کہ ایک مقامی کشمیری نے بارود سے بھری اپنی گاڑی فوجی قافلے سے جا ٹکرائی۔ بتایا گیا ہے کہ نشانہ بننے والی بس میں کم از کم پینتیس فوجی اہلکار سوار تھے۔
’کشمیری‘پاک بھارت سیاست کی قیمت کیسے چکا رہے ہیں؟
بھارت اور پاکستان کشمیر کے موضوع پر اپنی لڑائی جاری رکھے ہوئے ہیں۔ ہمالیہ کے اس خطے کو گزشتہ تین دہائیوں سے شورش کا سامنا ہے۔ بہت سے کشمیری نئی دہلی اور اسلام آباد حکومتوں سے تنگ آ چکے ہیں۔
تصویر: Getty Images/AFP/T. Mustafa
بڑی فوجی کارروائی
بھارتی فوج نے مسلح باغیوں کے خلاف ابھی حال ہی میں ایک تازہ کارروائی کا آغاز کیا ہے۔ اس دوران بیس دیہاتوں کا محاصرہ کیا گیا۔ نئی دہلی کا الزام ہے کہ اسلام آباد حکومت شدت پسندوں کی پشت پناہی کر رہی ہے۔
تصویر: picture alliance/AP Photo/C. Anand
فوجیوں کی لاشوں کی تذلیل
بھارت نے ابھی بدھ کو کہا کہ وہ پاکستانی فوج کی جانب سے ہلاک کیے جانے والے اپنے فوجیوں کا بدلہ لے گا۔ پاکستان نے ایسی خبروں کی تردید کی کہ سرحد پر مامور فوجی اہلکاروں نے بھارتی فوجیوں کو ہلاک کیا ان کی لاشوں کو مسخ کیا۔
تصویر: H. Naqash/AFP/Getty Images
ایک تلخ تنازعہ
1989ء سے بھارت کے زیر انتظام کشمیر میں مسلم باغی آزادی و خود مختاری کے لیے ملکی دستوں سے لڑ رہے ہیں۔ اس خطے کی بارہ ملین آبادی میں سے ستر فیصد مسلمان ہیں۔ اس دوران بھارتی فورسز کی کاررائیوں کے نتیجے میں 70 ہزار سے زائد کشمیری ہلاک ہو چکے ہیں۔
تشدد کی نئی لہر
گزشتہ برس جولائی میں ایک نوجوان علیحدگی پسند رہنما برہان وانی کی ہلاکت کے بعد سے بھارتی کشمیر میں حالات کشیدہ ہیں۔ نئی دہلی مخالف مظاہروں کے علاوہ علیحدگی پسندوں اور سلامتی کے اداروں کے مابین تصادم میں کئی سو افراد مارے جا چکے ہیں۔
تصویر: Reuters/D. Ismail
اڑی حملہ
گزشتہ برس ستمبر میں مسلم شدت پسندوں نے اڑی سیکٹر میں ایک چھاؤنی پر حملہ کرتے ہوئے سترہ فوجی اہلکاروں کو ہلاک جبکہ تیس کو زخمی کر دیا تھا۔ بھارتی فوج کے مطابق حملہ آور پاکستان سے داخل ہوئے تھے۔ بھارت کی جانب سے کی جانے والی تفتیش کی ابتدائی رپورٹ میں کہا گیا کہ حملہ آوروں کا تعلق پاکستان میں موجود جیش محمد نامی تنظیم سے تھا۔
تصویر: UNI
کوئی فوجی حل نہیں
بھارت کی سول سوسائٹی کے کچھ ارکان کا خیال ہے کہ کشمیر میں گڑ بڑ کی ذمہ داری اسلام آباد پر عائد کر کے نئی دہلی خود کو بے قصور نہیں ٹھہرا سکتا۔ شہری حقوق کی متعدد تنظیموں کا مطالبہ ہے کہ وزیر اعظم نریندر مودی کو چاہیے کہ وہ وادی میں تعینات فوج کی تعداد کو کم کریں اور وہاں کے مقامی افراد کو اپنی قسمت کا فیصلہ خود کرنے دیں۔
تصویر: Getty Images/AFP/T. Mustafa
انسانی حقوق کی خلاف ورزیاں
بھارتی حکام نے ایسی متعدد ویڈیوز کے منظر عام پر آنے کے بعد، جن میں بھارتی فوجیوں کو انسانی حقوق کی خلاف ورزیاں کرتے دیکھا جا سکتا ہے، کشمیر میں سماجی تعلقات کی کئی ویب سائٹس کو بند کر دیا ہے۔ ایک ایسی ہی ویڈیو میں دیکھا جا سکتا کہ فوج نے بظاہر انسانی ڈھال کے طور پر مظاہرہ کرنے والی ایک کشمیری نوجوان کواپنی جیپ کے آگے باندھا ہوا ہے۔
تصویر: Getty Images/AFP/
ترکی کی پیشکش
ترک صدر رجب طیب ایردوآن نے بھارت کے اپنے دورے کے موقع پر کشمیر کے مسئلے کے ایک کثیر الجہتی حل کی وکالت کی۔ ایردوآن نے کشمیر کے موضوع پر پاکستان اور بھارت کے مابین کشیدگی پر تشویش کا اظہار بھی کیا۔ بھارت نے ایردوآن کے بیان کو مسترد کر تے ہوئے کہا کہ مسئلہ کشمیر صرف بھارت اور پاکستان کے مابین دو طرفہ طور پر ہی حل کیا جا سکتا ہے۔
تصویر: Reuters/A. Abidi
غیر فوجی علاقہ
پاکستانی کشمیر میں جموں کشمیر لبریشن فرنٹ کے صدر توقیر گیلانی نے ڈی ڈبلیو کو بتایا، ’’وقت آ گیا ہے کہ بھارت اور پاکستان کو اپنے زیر انتظام علاقوں سے فوج ہٹانے کے اوقات کار کا اعلان کرنا چاہیے اور ساتھ ہی بین الاقوامی مبصرین کی نگرانی میں ایک ریفرنڈم بھی کرانا چاہیے‘‘
تصویر: picture-alliance/dpa/J. Singh
علیحدگی کا کوئی امکان نہیں
کشمیر پر نگاہ رکھنے والے زیادہ تر مبصرین کا خیال ہے کہ مستقبل قریب میں کشمیر کی بھارت سے علیحدگی کا کوئی امکان موجود نہیں۔ ان کا کہنا ہے کہ کشمیر میں شدت پسندوں اور علیحدگی پسندوں سےسخت انداز میں نمٹنے کی بھارتی پالیسی جزوی طور پر کامیاب رہی ہے۔ مبصرین کے بقول، جلد یا بدیر نئی دہلی کو اس مسئلے کا کوئی سیاسی حل ڈھونڈنا ہو گا۔
تصویر: Getty Images/AFP/T. Mustafa
10 تصاویر1 | 10
بھارتی نیم فوجی دستوں کے ترجمان سنجے شرما نے بتایا کہ متعدد زخمیوں کی حالت تشویشناک ہے، ’’دھماکا اس قدر شدید تھا کہ بس کے کچھ آہنی ٹکڑے ہی باقی بچے ہیں۔‘‘
پولیس افسر خان نے مزید بتایا کہ قانون نافذ کرانے والے اداروں کے اہلکاروں نے تلاشی کے غرض سے علاقے کو گھیرے میں لے لیا ہے۔ آج جمعرات کو ہی ہزاروں افراد نے حملہ آور کے حق میں نعرے بازی کی۔ ان افراد نے بھارت مخالف نعرے بلند کرتے ہوئے عادل کے گاؤں میں مارچ کیا۔
کشمیری باغی رہنما کی تدفین میں پاکستانی پرچم لہرائے گئے