بھارت: 24 گھنٹے میں تقریباً 200 ہلاکتیں اور سات ہزارنئے کیسز
28 مئی 2020
بھارت میں کورونا وائرس کی وبا سے متاثر اور ہلاک ہونے والوں کی تعداد میں مسلسل اضافہ ہورہا ہے، پچھلے 24 گھنٹوں میں تقریباً سات ہزار نئے کیسز سامنے آئے جبکہ 200 افراد کی موت ہوگئی۔
تصویر: AFP/A. Weiss
اشتہار
کووڈ انیس کے نئے کیسز کی تیز رفتاری کا اندازہ اس بات سے لگایا جاسکتا ہے کہ ملک میں متاثرین کی تعداد ایک لاکھ پہنچنے میں 109 دن لگے تھے لیکن اگلے پچاس ہزار نئے کیسز صرف نو دنوں میں سامنے آئے۔
بھارتی وزارت صحت کی طرف سے جاری بیان کے مطابق کورونا وائرس کی وبا سے متاثرین کی تعداد 27 مئی تک ایک لاکھ 58 ہزار 405 ہوچکی تھی جبکہ چار ہزار 534 افراد ہلاک ہوچکے ہیں۔ لیکن 67 ہزار 749 افراد اس بیماری سے صحت یاب بھی ہوئے ہیں، جسے حکومت اپنی ایک اہم کامیابی کے طور پر پیش کررہی ہے۔
وزارت صحت کے اعداد و شمار کے مطابق پچھلے 24 گھنٹوں میں کووڈ انیس کے 6566 نئے کیسز سامنے آئے جبکہ 194 افراد کی موت ہوگئی۔ اس سے قبل بدھ 27 مئی کو 6387 نئے کیسز سامنے آئے تھے اور 170 لوگوں کی موت ہوگئی تھی جبکہ منگل کے روز نئے کیسز اور اموات کی تعداد بالترتیب 6535 اور 146 تھی۔ پیر 25 مئی کو ریکارڈ 6977 نئے کیسز سامنے آئے تھے۔
سب سے زیادہ متاثرہ ریاست مہاراشٹر میں پچھلے 24 گھنٹے میں 97 اموات ہوئیں جو ایک دن میں اب تک کی سب سے زیادہ تعداد ہے۔ صرف ممبئی شہر میں ہی 39 ہلاکتیں ہوئیں جبکہ ریاست میں 2091 نئے کیسز بھی سامنے آئے۔ اس کے ساتھ ہی مہاراشٹر میں متاثرین کی تعداد بڑھ کر 56 ہزار 948 اور ہلاک ہونے والوں کی تعداد 1897ہوگئی ہے۔
قومی دارالحکومت دہلی میں بھی کووڈ انیس کے معاملات بہت تیزی سے بڑھ رہے ہیں۔ پچھلے 24 گھنٹوں میں دہلی میں کورونا وائرس کے اب تک سب سے زیادہ 792 نئے کیسز درج کیے گئے۔ اس کے ساتھ ہی دہلی میں متاثرہ افراد کی تعداد 15 ہزار 257 ہوگئی ہے جبکہ 303 افراد ہلاک ہوئے ہیں۔ متاثرین کے لحاظ سے دہلی نے گجرات کو پیچھے چھوڑ دیا ہے اور تیسرے نمبر پر پہنچ گئی ہے۔ گجرات میں متاثرین کی تعداد 15 ہزار 205 ہے تاہم وہاں ہلاک ہونے والوں کی تعداد 938 ہوگئی ہے۔ تمل ناڈو 18 ہزار 545 متاثرین کے ساتھ دوسرے نمبر پر ہے۔ اس جنوبی ریاست میں اب تک 136 افراد ہلاک ہوچکے ہیں۔
ہر 10میں سے ایک کی نوکری ختم
مودی حکومت کی طرف سے لاک ڈاون کے دوران اقتصادی حالات کو بہتر بنانے کی تمام تر کوششوں کے باوجود لوگوں کی ملازمتوں کے ختم ہونے کا سلسلہ جاری ہے۔
ایک سروے کے مطابق بھارت میں 10میں سے کم از کم ایک شخص ملازمت سے محروم ہوچکا ہے جبکہ 10میں سے تین لوگوں کو ملازمت سے محروم ہوجانے کا خطرہ لاحق ہے۔ ملازمت سے نکالے گئے لوگوں میں سے 15 فیصد ایئر لائنز اور ای کامرس انڈسٹری اور 14 فیصد ہاسپیٹلیٹی انڈسٹری سے ہیں۔
لاک ڈاون میں توسیع کا امکان
بھارت میں کورونا وائرس کی وبا پر قابو پانے کے اقدامات کے تحت گزشتہ 25 مارچ سے ملک گیر لاک ڈاون جاری ہے۔ اس کا چوتھا مرحلہ 18 مئی سے شروع ہوا تھا جو 31 مئی کو ختم ہورہا ہے۔ گوکہ ابھی حکومت نے اس میں توسیع کرنے کا کوئی اعلان نہیں کیا ہے تاہم تمام حالات اس جانب اشارہ کررہے ہیں کہ اس میں توسیع ہوسکتی ہے۔ بعض ذرائع کے مطابق پانچویں مرحلے کے تحت 15جون تک کے لیے لاک ڈاون کا اعلان کیا جاسکتا ہے۔
ج ا / ص ز (ایجنسیاں)
کورونا وائرس کی عالمی وبا، آج دنيا کہاں کھڑی ہے؟
مئی کے وسط تک کورونا وائرس کے متاثرين ساڑھے چار ملين سے متجاوز ہيں۔ انفيکشنز ميں مسلسل اضافے کے باوجود دنيا کے کئی حصوں ميں پابنديوں ميں بتدريج نرمياں بھی جاری ہيں۔ يہ وائرس کيسے اور کب شروع ہوا اور آج دنيا کہاں کھڑی ہے؟
تصویر: Reuters/Y. Duong
نئے کورونا وائرس کے اولين کيسز
اکتيس دسمبر سن 2019 کو چين ميں ووہان کے طبی حکام نے باقاعدہ تصديق کی کہ نمونيہ کی طرز کے ايک نئے وائرس کے درجنوں مريض زير علاج ہيں۔ اس وقت تک ايسے شواہد موجود نہ تھے کہ يہ وائرس انسانوں سے انسانوں ميں منتقل ہوتا ہے۔ چند دن بعد چينی محققين نے ايک نئے وائرس کی تصديق کر دی۔
تصویر: AFP
وائرس سے پہلی موت
گيارہ جنوری سن 2020 کو چينی حکام نے نئے وائرس کے باعث ہونے والی بيماری کے سبب پہلی ہلاکت کی اطلاع دی۔ مرنے والا اکسٹھ سالہ شخص اکثر ووہان کی اس مارکيٹ جايا کرتا تھا، جس سے بعد ازاں وائرس کے پھيلاؤ کو جوڑا جاتا رہا ہے۔ يہ پيش رفت چين ميں اس وقت رونما ہوئی جب سالانہ چھٹيوں کے ليے لاکھوں لوگ اندرون ملک سفر کرتے ہيں۔
يہ تصويو سيول کی ہے، جس ميں ديکھا جا سکتا ہے کہ لوگ ماسک خريدنے کے ليے قطاروں ميں کھڑے ہيں۔ رواں سال جنوری کے وسط ميں عالمی ادارہ صحت نے اس بارے ميں پہلی رپورٹ جاری کی اور بيس جنوری کو جاپان، جنوبی کوريا اور تھائی لينڈ ميں نئے وائرس کے اولين کيسز کی تصديق ہوئی۔ اگلے ہی دن ووہان سے امريکا لوٹنے والے ايک شخص ميں وائرس کی تشخيص ہوگئی اور يوں اکيس جنوری کو امريکا ميں بھی پہلا کيس سامنے آ گيا۔
تصویر: Reuters/K. Hong-Ji
ووہان کی مکمل بندش
گيارہ ملين کی آبادی والے شہر ووہان کو تيئس جنوری کو بند کر ديا گيا۔ شہر کے اندر اور باہر جانے کے تمام ذرائع بشمول ہوائی جہاز، کشتياں، بسيں معطل کر ديے گئے۔ نيا وائرس اس وقت تک تيئس افراد کی جان لے چکا تھا۔
تصویر: AFP/H. Retamal
گلوبل ہيلتھ ايمرجنسی
چين ميں ہزاروں نئے کيسز سامنے آنے کے بعد تيس جنوری کے روز عالمی ادارہ صحت نے صورت حال کو ’گلوبل ہيلتھ ايمرجنسی‘ قرار دے ديا۔ دو فروری کو چين سے باہر کسی ملک ميں نئے کورونا وائرس کے باعث کسی ایک شخص کی ہلاکت رپورٹ کی گئی۔ مرنے والا چواليس سالہ فلپائنی شخص تھا۔ چين ميں اس وقت تک ہلاکتوں کی تعداد 360 تھی۔
تصویر: picture-alliance/empics/The Canadian Press/J. Hayward
’کووڈ انيس‘ کا جنم
عالمی ادارہ صحت نے گيارہ فروری کو نئے کورونا وائرس کے باعث ہونے والی پھيپھڑوں کی بيماری کا نام ’کووڈ انيس‘ بتایا۔ بارہ فروری تک يہ وائرس چين ميں گيارہ سو سے زائد افراد کی جان لے چکا تھا جبکہ متاثرين ساڑھے چواليس ہزار سے زائد تھے۔ اس وقت تک چوبيس ملکوں ميں نئے وائرس کی تصديق ہو چکی تھی۔
تصویر: AFP/A. Hasan
يورپ ميں پہلی ہلاکت
چودہ فروری کو فرانس ميں ايک اسی سالہ چينی سياح جان کی بازی ہار گيا۔ يہ ايشيا سے باہر اور يورپی بر اعظم ميں کووڈ انيس کے باعث ہونے والی پہلی ہلاکت تھی۔ چين ميں اس وقت ہلاکتيں ڈيڑھ ہزار سے متجاوز تھیں، جن کی اکثريت صوبہ ہوبے ميں ہی ہوئی تھیں۔
تصویر: Getty Images/M. Di Lauro
پاکستان ميں اولين کيس
پاکستان ميں نئے کورونا وائرس کا اولين کيس چھبيس فروری کو سامنے آيا۔ ايران سے کراچی لوٹنے والے ايک طالب علم ميں وائرس کی تشخيص ہوئی۔ اٹھارہ مارچ تک ملک کے چاروں صوبوں ميں کيسز سامنے آ چکے تھے۔
تصویر: picture-alliance/AP Photo/F. Khan
کورونا کا دنيا بھر ميں تيزی سے پھيلاؤ
آئندہ دنوں ميں وائرس تيزی سے پھيلا اور مشرق وسطی، لاطينی امريکا و ديگر کئی خطوں ميں اولين کيسز سامنے آتے گئے۔ اٹھائيس فروری تک نيا کورونا وائرس اٹلی ميں آٹھ سو افراد کو متاثر کر چکا تھا اور يورپ ميں بڑی تيزی سے پھيل رہا تھا۔ اگلے دن يعنی انتيس فروری کو امريکا ميں کورونا وائرس سے پہلی ہلاکت رپورٹ کی گئی۔
يورپ اور امريکا کے دروازے بند
امريکی صدر نے گيارہ مارچ کو يورپ سے تمام تر پروازيں رکوا ديں اور پھر تيرہ مارچ کو ہنگامی حالت کے نفاذ کا اعلان کر ديا۔ بعد ازاں سترہ مارچ کو فرانس نے ملک گير سطح پر لاک ڈاون نافذ کر ديا اور يورپی يونين نے بلاک سے باہر کے تمام مسافروں کے ليے يورپ ميں داخلہ بند کر ديا۔
تصویر: picture-alliance/Xinhua/A. Morrisard
متاثرين کی تعداد ايک ملين سے متجاوز
دو اپريل تک دنيا کے 171 ممالک ميں نئے کورونا وائرس کی تصديق ہو چکی تھی اور متاثرين کی تعداد ايک ملين سے زائد تھی۔ اس وقت تک پوری دنيا ميں اکاون ہزار افراد کووڈ انيس کے باعث ہلاک ہو چکے تھے۔ دس اپريل تک يہ وائرس دنيا بھر ميں ايک لاکھ سے زائد افراد کی جان لے چکا تھا۔
تصویر: picture-alliance/xim.gs
ہلاکتيں لگ بھگ دو لاکھ، متاثرين اٹھائيس لاکھ
بائيس اپريل تک متاثرين کی تعداد ڈھائی ملين تک پہنچ چکی تھی۔ پچيس اپريل کو کووِڈ انیس کی وجہ سے دنیا بھر میں ہونے والی ہلاکتیں ایک لاکھ ستانوے ہزار سے تجاوز کر چکی ہیں جب کہ اس مرض سے متاثرہ افراد کی تعداد بھی اٹھائیس لاکھ پندرہ ہزار سے زائد ہو چکی ہے۔ عالمی سطح پر اس بیماری سے صحت یاب ہونے والے افراد کی تعداد سات لاکھ پچیانوے ہزار سے زائد ہے۔
تصویر: picture-alliance/dpa/F. Gambarini
متاثرين ساڑھے چار ملين سے اور ہلاک شدگان تين لاکھ سے متجاوز
مئی کے وسط تک نئے کورونا وائرس کے متاثرين کی تعداد ساڑھے چار ملين سے جبکہ ہلاک شدگان کی تعداد تين لاکھ سے متجاوز ہے۔ امريکا ساڑھے چودہ لاکھ متاثرين اور قريب ستاسی ہزار اموات کے ساتھ سب سے زيادہ متاثرہ ملک ہے۔ متاثرين کی تعداد کے معاملے ميں بھارت نے چين پر سولہ مئی کو سبقت حاصل کر لی۔ بھارت ميں کووڈ انيس کے مريضوں کی تعداد تقريباً چھياسی ہزار ہے جبکہ ڈھائی ہزار سے زيادہ لوگ ہلاک ہو چکے ہيں۔
تصویر: Reuters/J. Cabezas
بنڈس ليگا پھر سے شروع، شائقين غائب
سولہ مئی سے جرمن قومی فٹ بال ليگ بنڈس ليگا کے ميچز شروع ہو رہے ہيں۔ يورپی سطح پر بنڈس ليگا پہلی قومی ليگ ہے، جس کے ميچز کئی ہفتوں کی معطلی کے بعد دوبارہ شروع ہو رہے ہيں۔ البتہ سماجی فاصلہ برقرار رکھنے کی ہدايات کے مطابق شائقين کو اسٹيڈيمز کے اندر موجود ہونے کی اجازت نہيں ہے۔ حکام نے شائقين کو خبردار کيا ہے کہ اگر اسٹيڈيمز کے باہر شائقين مجمے کی صورت ميں جمع ہوئے، تو ميچز منسوخ کيے جا سکتے ہيں۔
تصویر: picture-alliance/dpa/I. Fassbender
يورپ بھر ميں پابنديوں ميں نرمياں جاری
دو مئی کو اسپين کے مشہور بارسلونا بيچ کو عوام کے ليے کھول ديا گيا۔ سولہ مئی سے فرانس اور اٹلی ميں بھی سمندر کنارے تقريحی مقامات لوگوں کے ليے کھول ديے گئے ہيں۔ يورپ کے کئی ممالک ميں پابنديوں ميں بتدريج نرمياں جاری ہيں اور بلاک کی کوشش ہے کہ جون کے وسط تک تمام تر سرحدی بنشيں بھی ختم ہوں اور يورپ ميں داخلی سطح پر سياحت شروع ہو سکے۔