فرض کر لیجیے کہ امریکی صدر باراک اوباما نے گوانتانامو کی جیل میں مقید پانچ طالبان قیدیوں کے بدلے میں افغانستان میں طالبان کے زیر حراست امریکی فوجی بو بیرگڈال کو رہا نہ کروایا ہوتا، یہ امریکی فوجی طالبان کے ہاتھوں قتل ہو جاتا یا یرغمالی کے طور پر خرابیء صحت کے سبب دم توڑ دیتا، جیسا کہ واشنگٹن انتظامیہ نے طالبان کے ساتھ اپنی ڈیل کا جواز پیش کیا تھا، تو سوال یہ ہے کہ بیرگڈال کی موت پر کیسا سیاسی اور عوامی رد عمل سامنے آتا؟

یقیناً اوباما پر سیاسی اور عوامی حلقوں کی طرف سے تنقید اور الزامات کی بوچھاڑ ہوتی کہ اُن کی انتظامیہ نے طالبان کی طرف سے جنگی قیدی بنائے گئے اس امریکی فوجی کی رہائی کے لیے تمام ممکنہ کوششیں نہیں کیں۔

برہم ٹی پارٹی

وہی ٹی پارٹی جس کے سرگرم عناصر اس وقت اوباما کے اقدامات کی مذمت کرتے ہوئے ان پر نکتہ چینی کر رہے ہیں، اوباما پر بُزدل ہونے کا لیبل لگاتے اور اُن پر الزام عائد کرتے کہ بطور صدر انہوں نے یرگڈال کو بچانے کے عمل میں کوتاہی برتی اور صدر ہونے کے باوجود ایک امریکی فوجی کو بچانے کے لیے اپنے فرائض کی انجام دہی میں ناکام رہے۔

وہی امریکی قانون ساز جو اس وقت وائٹ ہاؤس پر سیخ پا ہو رہے ہیں اور اس امر پر برہمی کا اظہار کر رہے ہیں کہ اوباما انتظامیہ نے قیدیوں کے تبادلے کے بارے میں کانگریس کو پہلے سے مطلع نہیں کیا تھا، اس بارے میں تفتیشی کارروائی کا مطالبہ کرتے کہ آیا امریکی صدر اوباما نے ملکی فوجی بو بیرگڈال کی رہائی کے لیے تمام تر کوششیں کی تھیں؟ اوباما کی طالبان کے ساتھ ڈیل کے بارے میں کرائے گئے ایک سروے کے نتائج کے مطابق 45 فیصد امریکی باشندوں نے اس ڈیل کی مخالفت کی۔ اگر بیرگڈال طالبان کی قید میں ہلاک ہو جاتے تو یہی امریکی باشندے اُن کی موت کا ذمہ دار اوباما کو ٹھہراتے اور کہتے کہ اوباما نے بیرگڈال کی رہائی کے لیے کافی اقدامات نہیں کیے۔

معقول فیصلہ

اگر اس خیال کو دُرست مان بھی لیا جائے کہ بیرگڈال کی زندگی خطرے میں تھی، اور اس تصور کے خلاف کوئی ثبوت بھی اگر اب تک موجود ہیں، تو بھی اوباما نہایت مشکل صورتحال سے دو چار ہوتے۔ اس اعتبار سے بھی بیرگڈال کی زندگی بچانے کا امریکی صدر اوباما کا فیصلہ بالکل معقول تھا، جس کی راہ میں انہوں نے تمام تر اخلاقی اور قانونی مشکلات کو ایک طرف رکھ دیا۔ اوباما کی جگہ کوئی اور امریکی صدر بھی ہوتا تو بھی وہ یہی فیصلہ کرتا۔ افغانستان میں واحد امریکی جنگی قیدی بیرگڈال کی رہائی کے بعد امریکی حکومت پر کی جانے والی تنقید اور اظہار برہمی اوباما انتظامیہ کے لیے کوئی نئی اور باعث تعجب بات نہیں ہے۔ وہ اس قسم کی تنقید سننے کی عادی ہے۔ قدامت پسند امریکی قانون ساز حلقوں میں بیرگڈال کو امریکا لانے کی بجائے جرمن ملٹری ہسپتال منتقل کرنے کے سوال پر چھڑنے والی بحث ہو یا دائیں بازو کے بلاگرز کی طرف سے اوباما کا اسٹالن سے موازنہ کرنے اور اوباما کو ذہنی مریض قرار دینے کا عمل، ان سب سے یہ بات ظاہر ہو رہی ہے کہ امریکا کا سیاسی کلچر شدید مشکلات سے دوچار ہے۔