ویمپائر یا خونخوار بھوت، انتہائی مقبول کرداروں میں سے ایک ہے۔ سنیما نے خون چوسنے والے اس کردار کو توجہ کا مرکز بنا دیا ہے۔ گزشتہ برس جونی ڈیپ نے ’ڈارک شیڈوز‘ میں خون کی تلاش میں سرگرداں ویمپائر کا کردار ادا کیا تھا۔ جس کے ہدایت کار ٹِم برٹن ہیں۔ ویمپائر کا وجود ہمیں پرانے لٹریچر میں بھی ملتا ہے۔

ویمپائر کی تاریخی جڑیں ہمیں آج کے رومانیہ میں ملتی ہیں۔ روایات کے مطابق 15ویں صدی کے وسط میں یہاں ٹیپیس Tepes نام کا ایک شہزادہ لوگوں کا خون پیتا تھا۔ اس میں کتنی حقیقت ہے اور کتنا افسانہ یہ بات اب جاننا مشکل ہے۔ تاہم ڈریکولا نامی اس کردار کی کہانی کئی صدیوں تک لوگوں کی دلچسپی کا مرکز بنی رہی۔

1897 میں معروف آئرش مصور برام اسٹوکر Bram Stoker نے سات برس کی محنت کے بعد اپنا ناول ڈریکولا شائع کیا۔ اسٹوکر نے ویمپائر کے کردار کو ایک بالکل ہی نرالا رنگ دیا۔ آج تک مشہور مصنفین اور ڈائریکٹر انہی کے ناول کے زیر اثر ہیں۔ تاہم اپنے ناول کی کامیابی سے اسٹوکر کو زیادہ مالی فائدہ نہ پہنچ سکا۔ کیونکہ ان کی موت 1912 میں ہو گئی۔

برام اسٹوکر کی طرف سے اپنا ناول ڈریکولا مکمل کرنے سے چار برس قل ناروے کے پینٹر ایڈورڈ مُنچ Edvard Munch نے اپنی ایک پینٹنگ مکمل کی جسے اُس نے ’لو اینڈ پین‘ یعنی محبت اور تکلیف کا نام دیا۔ اس پینٹنگ میں ایک کردار کو ایک عورت کی گردن سے خون چوستا دکھایا گیا تھا۔ بعد میں اس پینٹر کے دوستوں نے اس کردار کو ویمپائر کا نام دے دیا۔ مُنچ نے بعد ازاں ویمپائر کے متعدد ورژن تیار کیے۔

ویمپائر کے اسطور کے بارے میں ان دنوں ڈوسلڈروف کے فلم میوزیم میں تفصیلی چان بین کی جا رہی ہے۔ ’پرنس آف ڈارک نیس‘ شو کی بہت سی اشیا پہلی مرتبہ جرمنی میں نمائش میں رکھی گئی ہیں۔ یہ نمائش آسکر اکیڈمی کے تعاون سے لگائی گئی ہے۔

جرمن اداکار ماکس شَریک Max Schreck فلمی تاریخ کے ان متعدد نامور اداکاروں میں سے ایک ہیں جنہوں نے ویمپائر کا کردار ادا کیا ۔ ایسے ہی اداکاروں میں ہنگری میں پیدا ہونے والے بیلا لوگوسی Bela Lugosi بھی ہیں جنہوں نے 1930ء میں ڈریکولا کا کردار ادا کیا۔

ماکس شریک کے بعد ڈریکولا کا کردار ادا کرنے والے ایک اور جرمن اداکار کلاؤس کِنسکی Klaus Kinski بھی ہیں جنہوں نے 1979ء میں ڈریکولا کا کردار ادا کیا۔ یہ فلم ہدایتکار ویرنر ہیرسوگ Werner Herzog کی فلم ’فینٹم آف دی نائٹ‘ تھی۔ اس فلم میں معروف فرانسیسی اداکاروہ ازابیل آڈیانی Isabelle Adjani نے بھی کردار ادا کیا تھا۔

فلمی تاریخ میں صرف سفید فام کردار ہی ویمپائر نہیں بنے بلکہ مختلف فلموں میں خون کی پیاسی خواتین، سیاہ فاموں اور ہم جنس پرستوں کو بھی ویمپائر کے روپ میں دکھایا گیا۔ویمپائر کے کردار کو کئی کمپنیوں نے اپنی شہرت کے لیے بھی استعمال کیا۔ ایسا ہی ایک شو جرمن کار ساز ادارے آؤڈی نے گزشتہ برس منعقد کرایا۔

ویمپائر کرداروں کے حوالے سے مختلف کھلونے، کتابیں اور گیمز بھی نوجوانوں کی دلچسپی کا مرکز ہیں۔ ان میں بورڈ اور کارڈ گیمز کے علاوہ ویمپائر کاسٹیومز اور پلاسٹک کے بنے ڈریکولا جیسے دانت بھی شامل ہیں۔

ڈوسلڈورف میں جاری نمائش میں ’پرنس آف ڈارک نیس‘ اکتوبر کے وسط تک موجود رہے گی۔ اس کے علاوہ جرمنی اور دیگر ممالک سے بھی مختلف چیزیں نمائش میں موجود ہیں۔ ان میں اصل اسکرپٹس، اسکرین پلیز، تصاویر اور فلموں کے کلپس بھی شامل ہیں۔ نمائش کے کمروں کو گہرے سُرخ رنگ سے رنگا گیا ہے جو بالکل ویمپائرز کی زندگی یعنی خون سے رنگے دکھائی دیتے ہیں۔